Bakı şəhəri, Hacı Zeynalabdin Tağıyev və Tərlan Əlyarbəyov küçələrinin 75 sakini adından 4 nümayəndə - Tamilla Quliyeva, Səriyyə Ağayeva, Zülfiyyə Cəlilova, Fatimə Dadaşzadə Azərbaycan Respublikasının Birinci vitse-prezidenti Mehriban Əliyevaya müraciət ediblər.
Sakinlərin etdiyi müraciətin surəti isə Bakı Şəhər İcra Hakimiyyətinin başçısı Eldar Əzizova, Səbail Rayon İcra Hakimiyyətinin başçısı Vüqar Zeynalova, ekologiya və təbii sərvətlər naziri Muxtar Babayevə, eyni zamanda, “Bakı-Xəbər” də daxil olmaqla bir neçə KİV-ə ünvanlanıb.
Hacı Zeynalabdin Tağıyev və Tərlan Əlyarbəyov küçələrinin 75 sakini adından bir surəti də redaksiyamıza göndərilən, “Fəvvarələr meydanı, yoxsa “köşklər meydanı?” adlı müraciətdə sakinlər Fəvvarələr meydanında normal gəzib istirahət edə bilmədiklərini qeyd edirlər. Sakinlərin yazdığına görə, Fəvvarələr meydanında sosiska və balıq köşklərinin sayı günü-gündən artır və ətrafı üfunət bürüyür, orada iydən gəzmək olmur. Sakinlərin bildirdiyinə görə, ərazidə olan köşklər onların istirahətinə problemlər yaradır. Onlar müraciətlərində adları çəkilən əlaqədar qurumların rəhbərlərindən şikayətlərinə biganə qalmamağı xahiş edirlər.
“Narazılığımız Fəvvarələr bağındakı köşklərlə bağlıdır”
Müraciəti araşdırmaq məqsədilə adları məktubda qeyd edilən sakinlərlə əlaqə saxladıq. Zülfiyyə Cəlilova “Bakı-Xəbər”ə bildirdi ki, Hacı Zeynalabdin Tağıyev küçəsi 19-da yaşayır və Fəvvarələr meydanından gələn toyuq və balıq iyindən evdə oturmaq, əraziyə qoyulan köşklərin əlindən bağda rahat oturmaq mümkün deyil: “Biz, 70-dən artıq qonşu yığışıb rahatlığımızı əlimizdən alan bu məsələ ilə bağlı birgə müraciət etmişik. Müraciəti imzalayanların hamısı qonşularımızdır. Narazılığımız Fəvvarələr bağındakı köşklərlə bağlıdır. Düşüb gəzmək istəyirik, amma gəzə bilmirik. Əvvəllər burada skamyalar vardı, ağacların altında oturub istirahət edirdik. Amma bir ildir ki, bu mümkün deyil. Düz bağdan gələn kabel bizim həyətimizdən keçirdi, biz şikayət edəndən sonra o kabeli yığışdırdılar. “Ali və Nino” kitab mağazasının qabağında yenə də kabellər qalır və gedib-gəlməyə mane olur, məcbursan maşın yoluna çıxasan. Şikayət etdik, o gün “Azərişıq”dan gəlib həyətdəki elektrik avadanlıqlarını yığışdırdılar, çünki hamısı ortalıqda dururdu. Görün nə qədər müddətdir zülm çəkirik. Oradan bura “tok” gəlirdi. Özü də o qutuları niyə yığışdırmırlar, bilmirəm. Əvvəl bayramdan-bayrama qoyurdular. Keçən il Yeni ildə “Soyuq əllər, isti ürəklər” kampaniyası çərçivəsində qoyulan qutular hələ də durur. Gəlin, görün, o qutuların araları, buralar nə gündədir. Əvvəllər skameykalar vardı, ağacın altında oturub nəfəs alırdıq. Bizim Fəvvarələr bağından başqa düşüb oturmağa, istirahət etməyə yerimiz yoxdur. Çünki evimizin yanındadır. Biz üzləşdiyimiz bu məsələ ilə bağlı çox yerə şikayət etmişik ki, rahatlığımızı əlimizdən alan bu problem həll edilsin. Gəlin, baxın, “tok” keçir, yarısı da qırılıb kanalizasiyanın içinə düşüb, çox eybəcər hal yaradıb. Həyət, bağ nə gündədir. Biz nə qədər vaxtdır yazırıq, hey yazırıq. Bizim binanın altında bir nəfər “toyuq plov” açıb, toyuq, yağ iyindən baş çatlayır. Bütün günü qapı-pəncərəsi açıqdır, iy evlərə dolur, evdə də oturmaq olmur. Biz şikayət etməkdən yorulmuşuq. Zəng etmədiyimiz yer qalmayıb. Yığışıb İcra Hakimiyyətinə şikayət ərizəsi yazmaq istəyirik. Biz yazıb bir yeri bağlayırıq, o biri gəlib başqa bir yeri açır”.
Z.Cəlilovanın sözlərinə görə, əvvəllər belə şey olmayıb, onları narahat edən bu hal son 5-10 ildə meydana çıxıb.
Z.Cəlilova qəzetimiz vasitəsilə Bakı şəhəri, Hacı Zeynalabdin Tağıyev və Tərlan Əlyarbəyov küçələrinin sakinləri adından əlaqədar qurumlardan onların müraciətlərinə biganə qalmamağı, problemlərini həll etməyi xahiş etdi.
İradə SARIYEVA
