Aprelin 14-dən müsəlmanların müqəddəs Ramazan ayı başlayır. Bu ayda oruc tutanlar, həmçinin, tutmayanlar savab qazanmaq üçün iftar süfrələri açırlar. Koronavirus pandemiyası dövründə kütləvi yığıncaqların keçirilməsi qadağan olunsa da, artıq Şaban ayında oruc tutanlar arasında iftar süfrələri təşkil edənlər var.
Qafqaz Müsəlmanları İdarəsinin (QMİ) sədr müavini Fuad Nurullayev media nümayəndələrinə açıqlmasında bildirib ki, bu il də Ramazan ayı pandemiya dövrünə təsadüf edir: “Ötən il də Ramazan ayı pandemiya dövrünə təsadüf etmişdi. Pandemiya dövründə, təbii ki, hər bir insan xəstəliklə mübarizə aparır. Hər kəs də xəstəlikdən qorunmaq üçün əlindən gələni etməlidir. Adətən, Ramazan ayında insanlar məscidlərə yığışırdı. Amma indi məscidlərə kütləvi yığışma qadağası davam edir. Bunlar müvəqqəti haldır, xəstəlik dünyada öz gücünü itirdikdən sonra bu qadağalar aradan götürüləcək. İnsanlar bu müqəddəs ayda iftar süfrələri təşkil edirdi. Bu cür süfrələrə 100-200 adam qatılırdı. Amma pandemiya dövründə bunu edə bilmirik. Ona görə də hamı yalnız öz ailəsi ilə iftar süfrəsində oturmalıdır”.
F.Nurullayev qeyd edib ki, Ramazan ayında imkansız şəxslər üçün kütləvi iftar süfrələrinin açılması savabdır: “Pandemiya ilə əlaqədar həmin süfrələr üçün istifadə olunan xərcləri pul və ya ərzaq şəklində imkansız ailələrə verə bilərik. İmkansız ailələrə yardım edə bilərik ki, onlar ehtiyaclarını ödəyə bilsinlər. Savabı bu cür də qazanmaq olar”.
Pandemiya dövründə iftar süfrələrinin açılması əhalinin sağlamlığı baxımından düzgün hesab edilməsə də, artıq sosial şəbəkədə iftar süfrələrinin veriləcəyi barədə elanlar paylaşılır.
“İftar süfrəsində kimsə virusa yoluxub, vəziyyəti ağırlaşıb, dünyasını dəyişərsə, bu zaman iftar süfrəsi təşkil edən şəxs savab qazanmaq əvəzinə, günah qazanacaq”
İlahiyyatçı Cəmişid Əliyev qeyd etdi ki, iftarda bir araya gəlib oturmaq vacib deyil: “Qafqaz Müsəlmanları İdarəsi də Ramazan ayında iftar süfrələri ilə bağlı qərarını açıqlayıb. Qərara əsasən, geniş, kütləvi iftar süfrələri təşkil edilməməlidir. Hər kəs pandemiya dövrünün tələblərinə əməl etməlidir. Çox yaxşı olardı ki, pandemiya dövründə iftar süfrəsi üçün hazırlanan yeməklər imkansız şəxslərin evlərinə göndərilsin. Ərzaqlar oruc tutanlara da verilə bilər. Məlumdur ki, pandemiya dövründə bir araya gəlmək, toplaşmaq xəstəliyin yayılmasına səbəb olur. İftar süfrəsində kimsə virusa yoluxub, vəziyyəti ağırlaşıb, dünyasını dəyişərsə, bu zaman iftar süfrəsi təşkil edən şəxs savab qazanmaq əvəzinə, günah qazanacaq”.
Günel CƏLİLOVA
