Son günlər “Bakı Metropoliteni” QSC-də müxtəlif vəzifələrdə çalışan əməkdaşlar əməhhaqlarının kəsilməsindən narahatdırlar. İşçilərin narahatlığına səbəb əməkhaqlarına ödənilən əlavələrin dayandırılması barədə xəbərlərdir. Səbəb kimi isə pandemiya dövründə metroda sərnişindaşımanın olmaması bidirilir.
Məlumat üçün bildirək ki, Bakıda metro ötən il mart ayının son 3 günü ərzində səhər saat 7-dən 9-a, axşam isə 5-dən 8-ə qədər olmaqla, yalnız 5 saat xidmət göstərib. Martın 31-i saat 22:00-dan etibarən sərnişindaşıma fəaliyyəti ilk dəfə uzun müddətə dayandırılan metro mayın 9-u yenidən stansiyalarının qapılarını sərnişinlərinin üzünə açıb.
İyun ayının 4-dən isə həftənin şənbə və bazar günləri fəaliyyət göstərməyib. Azərbaycan Respublikası Nazirlər Kabinetinin 3 iyul 2020-ci il tarixli, 236 nömrəli “Xüsusi karantin rejiminin sərtləşdirilməsi ilə bağlı əlavə tədbirlər barəfə” qərarına uyğun olaraq, 4 iyul saat 00:00-dan sərnişindaşıma fəaliyyəti ikinci dəfə dayandırılıb. Növbəti dəfə metro 2020-ci il oktyabrın 19-dan “COVID-19” virusunun yayılmasının qarşısının alınması məqsədilə bağlanıb.
“...Əmək Məcəlləsinin tələblərinə və Metropoliten İşçiləri Həmkarlar İttifaqı ilə imzalanmış kollektiv müqavilənin şərtlərinə qeyd-şərtsiz əməl olunur”
Metropoliten işçilərinin əməkhaqlarının və əlavələrin nə səbəbdən ödənilməməsi ilə bağlı fikir bildirən “Bakı Metropoliteni” QSC-nin mətbuat xidmətinin rəhbəri Bəxtiyar Məmmədovun sözlərinə görə, işçilərin əməkhaqları əməyin ödənilməsinin vahid tarif cədvəlinə uyğun olaraq hesablanır: “Əməyin qiymətləndirilməsi və ödənilməsi zamanı əlavələrin verilməsində Azərbaycan Respublikasının Əmək Məcəlləsinin tələblərinə və Metropoliten İşçiləri Həmkarlar İttifaqı ilə imzalanmış kollektiv müqavilənin şərtlərinə qeyd-şərtsiz əməl olunur. İstər pandemiya, istərsə ondan əvvəlki dövrlərdə əməkhaqlarına əlavələrin hesablanması və ödənilməsi ilə bağlı qaydalarda hər hansı dəyişiklik edilməyib. Xüsusi şərait, iş növbəsi üzrə, eləcə də kollektiv müqavilədə nəzərdə tutulmuş digər əlavə və üstəliklər faktiki işlənilmiş vaxta mütənasib olaraq ödənilir”.
Günel CƏLİLOVA
