Ölkəmizdə koronavirusun yayılmasının qarşısının alınması məqsədilə rəsmi qaydada toy, nişan, ad günü, yas mərasimlərinin, o cümlədən də bütün kütləvi tədbirlərin keçirilməməsi ilə bağlı verilən qərar hələ də qüvvədədir.
Əhalinin sağlamlığının qorunması, virusa yoluxma risqinin minimuma endirilməsi baxımından böyük əhəmiyyət daşıyan bu qərara qarşı gələnlər də az deyil. Əlbəttə, bu qərarı ən çox pozan, onun əleyhinə çıxan şou-biznes əhlidir ki, onlar ölkəmizdə toyların bərpa edilməsi ilə bağlı bütün imkanlardan istifadə edərək çağırışlar edirlər. Deyirlər ki, toylar, xınayaxdılar olmadığı üçün acından ölürlər, hətta bəziləri başqa işlərlə məşğul olub çörək qazandıqlarını deyirlər. Bu öz yerində.
Koronavirusun üçüncü dalğasının tüğyan etdiyi bir vaxtda bizim toysuz şou əhlinin və aparıcıların üzlərinə yeni qazanc qapısı açılıb. Acından öldüklərini iddia edən şou əhli toy üçün Rusiyaya, Orta Asiya respublikalarına üz tutur. Bu gün şou müğənniləri və toy aparıcıları kütləvi olaraq Rusiya və Orta Asiya toylarına axışırlar. Koronavirusun ən dəhşətli dövründə, virusun üçüncü dalğasının tüğyan etdiyi bir vaxtda bizim müğənnilər ölkədən kənarda toylardadırlar, onların hər biri ölkəyə potensial virus daşıyıcısı olaraq qayıda bilər. Sənətləri toy üzərində qurulan şou əhli toy tutmaq üçün xaricə gedir və qayıdanda özləri ilə böyük xəstəlik dalğası gətirə bilər. Rusiyada, Gürcüstanda, Orta Asiyada toylar davamlı olaraq keçirilir və müğənnilər də rahatlıqla gedib orada toy şənliyində iştirak edirlər, pul qazanırlar. Əvvəllər getdikləri toyların şəkil və videolarını sosial şəbəkələrdə paylaşsalar da, son zamanlar elə də kütləvi paylaşımlar etmirlər.
“Bəzi şou müğənniləri pulu özlərinin və cəmiyyətin sağlamlığından üstün tutur və bunu davranışlarında açıq göstərirlər”
“Vəfa” Sosail-İctimai Birliyinin rəhbəri, sosioloq Fatimə Hacıbəyli bizimlə söhbətində qeyd etdi ki, şou əhli pula görə həm öz, həm də başqa vətəndaşların həyatını təhlükə altına alaraq, Rusiyaya və başqa respublikalara toylara gedir: “Hər bir vətəndaşın vəzifəsi həm öz sağlamlığını qorumaq, həm də digərlərinin sağlamlığına zidd addımlar atmamaqdır. Ölkəmizdə pandemiya ilə əlaqədar karantin rejimi elan edildikdən sonra müəyyən faiz vətəndaş buna dözümsüz yanaşır. Xüsusən də şou əhli. Bir ildən artıqdır ki, toy olmur, şou müğənniləri və toy aparıcıları “acından ölürük” deyirlər. İllərdir camaatı soyub qazandıqları yəni tamam tükənib ki, bunlar belə şou yaradırlar. Bütün hallarda, toyların, kütləvi yığıncaqların olması virusun artmasına səbəb olur. Ona görə də bizdə toylar, kütləvi mərasimlər keçirilmir. Şou müğənniləri də başqa ölkələrə toylara gedirlər. Çoxları şəkil və video qoyurdular, amma indi çox da toylara getdiklərini reklam etmirlər. Bu gün şou müğənnilərinin çoxunun Rusiyada, Orta Asiyada toylarda olması barədə özləri paylaşımlar edirlər və pul qazanmaq üçün yeni qaynaqlar tapdıqlarını qeyd edirlər. Ölkədən kənara çıxıb toylarda iştirak edən şou-biznesçilər, toy aparıcıları potensil virus daşıyıcısı ola bilərlər. Hesab edirəm ki, onların hər biri ölkəyə gəldikdə ciddi şəkildə yoxlamadan keçməlidir. Toylarda onlar daha çox insanla ünsiyyətdə, təmasda olurlar, bu baxımdan şou müğənnilərinin yoluxma risqləri daha yüksəkdir. Onlar özləri ilə ölkəyə virus da gətirə bilərlər. Yəqin yadınıza gəlir, bir müddət əvvəl ölkəmizdə gizlin keçirilən toylardan birində müğənninin və aparıcının virusa yoluxduğu müəyyən edilmişdi. İndi xaricə gedən müğənnilər burada test verib gedirlər, hətta bəziləri tələm-tələsik peyvənd vurdurub gedirlər ki, üz tutduqları ölkələrdə virusa tutulmasınlar. Amma heç kəs virusdan sığortalanmayıb. Bəzi şou müğənniləri pulu özlərinin və cəmiyyətin sağlamlığından üstün tutur və bunu davranışlarında açıq göstərirlər. Fikrimcə, toylarda iştirak etmək üçün ölkəmizdən kənara gedən hər bir şou müğənnisinin ölkəyə qayıtdıqdan sonra karantinə alınması daha məqsədəuyğun olar, bu vacibdir” - deyə F.Hacıbəyli qeyd etdi.
İradə SARIYEVA
