Kür çayında şirin su getdikcə acılaşır - Azərbaycanın yeni ekoloji fəlakəti...

img

Neftçalada dəniz suyu Kürə qarışır, şor su hər gün çayın axınına əks istiqamətdə irəliləyir. Qeyd edək ki, ötən ilin iyun ayında baş vermiş hadisənin bu günlərdə yenidən təkrarlanma ehtimalı yaranıb.

Artıq şor su Salyan rayonu istiqamətinə doğru 39 kilometr irəliləyib. Bu da Kür çayının suyundan istifadə edən Neftçala sakinləri üçün problemə çevrilib. Bu hal sakinlər üçün də problem yaradır. Təsərrüfatların və mal-qaranın suvarılmasında ciddi çətinliklər ortaya çıxır. Hazırda əsasən Bankə qəsəbəsi və Kür çayının sahil boyu 13 kəndində vəziyyət daha kritikdir. Bu ərazilər çaya yaxın olduğundan, illərdir suya olan ehtiyaclarını Kürün hesabına təmin ediblər.

Xatırladaq ki, Kür çayında analoji vəziyyət ötən il də baş vermişdi. Mütəxəssislərin sözlərinə görə, bu vəziyyət həm təbii amillərdən, həm də Kür boyu qanunsuz yaradılan balıq vətəgələrinin sayının ilbəil artması ucbatından yaranır.

  • Ekologiya və Təbii Sərvətlər Nazirliyi - Rafiq Verdiyev: “Kürün sululuğunun, ümumiyyətlə, normadan az olması onun axarının sürətinin azalmasına...

Ekologiya və Təbii Sərvətlər Nazirliyinin Milli Hidrometeorologiya Xidmətinin rəis müavini Rafiq Verdiyev bildirdi ki, dəniz səviyyəsi keçən ilin aprel ayı ilə müqayisədə 18 sm aşağıdır və bunu nəzərə alaraq son günlərdə qrunt sularının təsiri nəticəsində duzluluğun artması  ehtimalı yüksək deyil: “Lakin digər meteoroloji amillərin təhlili göstərir ki, aprelin birinci ongünlyü küləkli hava şəraiti ilə səciyyələnib. Belə ki, ongünlüyün 7 günü küləyin sürəti 13 m/s-dən çox, 2, 5, 6, 7, 9 və 10 apreldə 16-18 m/s, arabir 22-28 m/s çatıb. Eyni zamanda, Neftçalada külək davamlı olaraq əsasən şərq, şimal-şərqdən əsib. Kürün sululuğunun, ümumiyyətlə, normadan az olması onun axarının sürətinin azalmasına, bu da öz növbəsində, küləyin gücləndiyi zaman dəniz suyunun çayın məcrasına daxil olmasına səbəb olur. İqlim dəyişmələri fonunda biz çaylarımızın suyunun azalmasını qeyd edirik ki, bu da sudan qənaətlə və səmərəli istifadə olunmasına bir işarə olmalıdır”.

  • Natiq Cəfərli: “Neftçalada ekoloji fəlakət təhlükəsi var, artıq dəniz suyu 40 km Kür çayında irəliləyib, su şoranlaşıb”

İqtisadçı-ekspert Natiq Cəfərli qeyd etdi ki, Neftçalada ekoloji fəlakət təhlükəsi var. Artıq dəniz suyu 40 km Kür çayında irəliləyib, su şoranlaşıb. Nəticədə Neftçala ekoloji fəlakətlə üz-üzədir. Rayonun Mayak, Şirvanlı, Kürkəndi, Bankə, Tatarməhlə, Mirqurbanlı və ümumilikdə, 15 yaşayış məntəqəsində su problemi var: “Əhali istifadə etməyə su tapmır, çox ciddi içməli su qıtlığı yaranıb. Aqrar sektorda suvarma problemi var. Bəzi fermerlər əkin sahələrini suvarmaq üçün şor sudan istifadə etmək məcburiyyətində qalıb ki, bu da səhv qərardır”.

Günel CƏLİLOVA

Son xəbərlər