Son dövrlər qəribə məlumatlar ortaya çıxır və istər-istəməz, bu, müəyyən sualların yaranmasına səbəb olur.
Məsələ ondadır ki, 9 ay ərzində (28 aprel 2020 – 28 yanvar 2021) Bakıdakı bir ünvanda (Nizami rayonu, Yavər Səfərov küçəsi, ev 28, mənzil 28) nə az, nə çox, düz 214 şirkət (MMC) qeydiyyata alınıb. Şirkətlərin adları, nizamnamə kapitalları, qanuni təmsilçiləri müxtəlif şəxslərdir. Bu şirkətlərin hərəsi 50-100 minlik tenderlərin qalibi olur.
Burada digər maraqlı məqam ondan ibarətdir ki, MMC-lərin qeydiyyatı sentyabr ayının 22-də dayandırılıb. Müharibə dövrü ərzində həmin ünvanda heç bir şirkət qeydə alınmayb. Ancaq noyabr ayının 10-da - müharibənin başa çatdığı gün həmin ünvanda 28 şirkət qeydə alınıb. Sanki səbrsizliklə Vətən müharibəsinin başa çatmasını gözləyiblər ki, yeni şirkət qeydiyyata aldırsınlar. Maraqlıdır, bir ünvanda 9 ay ərzində bir belə şirkətin qeydiyyatdan keçməsinin arxasında hansı məqsəd ola bilər?
“Ya bu müəssisələr qeyri-sağlamdır, ya da kiməsə məxsusdurlar”
Sözügedən məsələ ilə bağlı fikirlərini baki-xeber.com-la bölüşən sabiq maliyyə naziri, professor Fikrət Yusifovun fikrincə, bu qədər şirkətin bir ünvanda qeydiyyata düşməsi heç bir məntiqə sığmır: “Eyni zamanda, belə bir halın baş verməsi heç bir reallığa uyğun gəlmir. Bir mənzildə bir belə şirkətin qeydiyyatdan keçməsinin bir izahı olmalıdır. Hər halda, sözügedən məsələdə qaranlıq məqamlar var. Çünki belə bir hal normal sayıla bilməz. Ona görə də bu, normal hal olmadığı qədər də bunun arxasında yəqin ki, xoşa gəlməyən qara işlər var. Ona görə də hesab edirəm ki, sözügedən vəziyyəti aidiyyəti qurumlar araşdırmalıdırlar. Yəni bunlar nə şirkətlərdir və həmin MMC-lər kimə məxsusdur? Nəyə görə bir ünvanda ayrı-ayrı şəxslərə məxsus şirkətlər qeydiyyatdan keçirlər? Adətən, kimsə şirkət açırsa, onu yaşadığı ünvanda və yaxud da digər mənzilində qeydiyyatdan keçirir. Ona görə də burada bir sıra qaranlıq məqamlar ola bilər. Yəqin ki, bir belə şirkət ona görə bir ünvanda qeydiyyatdan keçib ki, həmin müəssisələr hardasa bir yerdən idarə olunur. Ona görə də bunun arxasında sağlam heç nə görmürəm. Belə bir anormal qeydiyyat fonunda, müəssisələrin fəaliyyətindəki sağlamlığı görmürəm. Ya bu müəssisələr qeyri-sağlamdır, ya da kiməsə məxsusdurlar”.
Professor hesab edir ki, bütün hallarda, sözügedən məsələ diqqət cəlb edən haldır və müvafiq qurumlar bunu araşdırmalıdırlar.
Vidadi ORDAHALLI
