Sosial şəbəkə istifadəçiləri #nəfəsalaq həştaqı ilə kampaniyaya başlayıblar. İstifadəçilərin istəyi açıq havada, parklarda, küçələrdə tibbi maskadan məcburi istifadənin ləğv edilməsidir.
Aksiyaya qoşulan şəxslər bildirirlər ki, tibbi maskalardan məcburi istifadə qapalı və iaşə obyektlərində olsa daha doğru olar. Eyni zamanda, hava getdikcə istiləşir və belə havada maska ilə nəfəs almaq çətinlik yaradır.
Xatırladaq ki, Nazirlər Kabineti yanında Operativ Qərargahın verdiyi qərara əsasən, 2020-ci il 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskadan istifadə məcburi hesab olunub.
Onu da nəzərə almaq lazımdır ki, koronavirus infeksiyasının üçüncü dalğası dünyada başlayıb. Bu səbəbdən də əksər dünya ölkəsi qapanma rejiminə keçir. Hətta inkişaf etmiş ölkələr belə koronavirusun üçüncü dalğası ilə əlaqədar sərt karantin rejimi tətbiq edirlər.
Artıq yerli həkimlərimiz də üçüncü dalğadan qorunmaqla bağlı ölkə əhalisinə çağırışlar edirlər. Onu da vurğulayaq ki, son zamanlar koronavirus infeksiyasına yoluxanların sayı günbəgün artır. Belə bir vaxtda açıq havada maskadan imtina etmək çağırışı ölkə ictimaiyyəti tərəfindən xoş qarşılanmır. Əhalinin sağlamlığı üçün virus infeksiyası tam şəkildə bitənə qədər maskadan istifadə edilməlidir.
- Elçin Mirzəbəyli: “Ən böyük mədəniyyət başqalarını düşünməkdir”
"Xalq Cəbhəsi" qəzetinin baş redaktoru Elçin Mirzəbəyli bildirdi ki, virusa yoluxanların sayı gündən-günə artır: “Hər gün sevdiyimiz, tanıdığımız insanları itiririk. Amma yenə də sanki virus yoxmuş, yaxud "mənə heç nə olmaz" arxayınçılığıyla özümüzü və ətrafımızdakı insanları qorumamaqda israrlıyıq.
Bir neçə gündür sosial şəbəkələrdə "açıq havada maska taxmaq tələbi ləğv edilsin" həştaqı ilə kampaniya aparılır. Qoşulanların arasında tanıdığım insanlar da var. Olsun. Problem deyil. Hər kəs mövqeyini ifadə etməkdə azaddır. Maska taxmağı mən də sevmirəm, qadağaları da həmçinin... Qaydalara əməl edirəm, məsuliyyətli davranıram. Amma bu o demək deyil ki, virusa yoluxa və başqalarını yoluxdura bilmərəm. Yaxud məsuliyyətli olduğuma görə mənim üçün fərdi və fərqli qaydalar müəyyənləşdirilməlidir. Hər gün qapalı məkanlarda qaydalara əməl etməyən saysız-hesabsız insanla qarşılaşıram. Heç açıq havada belə sosial məsafə gözləmirlər. Hər kəsin həyatı dəyərlidir. Hətta bircə nəfərin açıq havada yoluxmaq risqi varsa, deməli, onu belə bir risq qarşısında qoymamalıyıq. Ən böyük mədəniyyət başqalarını düşünməkdir”.
- Azər Həsrət: “Hər halda, maska ilə nəfəs almaq aparata qoşulu halda nəfəs almaqdan daha rahat olar, ona görə də bir az səbrli olaq”
Ekspert Azər Həsrət bildirdi ki, COVID-19-la bağlı yenə də kimlərsə kampaniyaçılıq edirlər: “Maskasız gəzməyə izn verilsin deyə çağırışlar edilir. Lakin bir şeyi anlamalıyıq ki, bu maska bizi doğrudan da ciddi şəkildə qoruyur. Düzdür, maskasız gəzmək pis olmazdı. Amma indiki halda çarə budur. Hər halda, maska ilə nəfəs almaq aparata qoşulu halda nəfəs almaqdan daha rahat olar, deyilmi? Ona görə də bir az səbrli olaq. Hələlik maska ilə nəfəs alaq. Çox keçməz, bir də gördünüz bu maskadan da, hər cür məhdudiyyətdən də qurtulduq”.
Günel CƏLİLOVA
