İntihar (suisid) bütün hallarda arzuolunmaz bir insan faciəsidir. Çox təəssüflər olsun ki, suisid dünyada artıq, bir növ, epidemiya halını alıb. Arzuedilməz hal olsa da, Azərbaycanda da tez-tez intihar hadisələri haqqında məlumatlar yayılır.
Ölkəmizdə də yayılan intihar epidemiyasının qurbanı olan insanlar arasında gənc və orta yaşlı kişilər də var. Əlbəttə, intiharın səbəbi kimi konkret bir-iki amili göstərib onunla kifayətlənmək olmaz. Burada digər faktorların olması, insanı bu faciəyə sürükləməsi də gizlin deyil. İntiharın daha çox mənəvi-psixoloji problemdən doğduğu məlumdur.
Güclü cinsin nümayəndələrinin, xüsusən də həyatda artıq öz ayaqlarını bərkitmiş insanların intihara əl atmasının bir neçə izahı var. Şübhəsiz, hər bir şəxsin intiharı ilə bağlı hüquq-mühafizə orqanları tərəfindən müvafiq cinayət işi açılır və onun səbəbləri araşdırılır.
Gənc kişilərin, oğlanların arasında müşahidə edilən və az qala kütləviləşən intiharların səbəblərinin bir çox halda “Topaz” oyunu ilə bağlı olduğu ehtimalını irəli sürənlər də var. Belə deyirlər ki, intihar edən kişi və oğlanların bəziləri “Topaz”da pul uduzanlar və bu şirkətə borclu olanlardır. Bu insanlar uduzurlar və tələb edilən vaxtda borcu ödəyə bilmirlər, bu barədə yaxınlarına, ailəsinə heç nə demirlər, çıxış yolunu intiharda görürlər. İndiyə qədər nə qədər insan “Topaz” oyununa görə ağır duruma düşüb. Elə adamlar olub ki, “Topaz” oyununa görə 20-25 min manat borcu yaranıb.
Hətta bu günlərdə sosial mediada bir məlumat yayılmışdı ki, bir vətəndaş müvafiq orqanlara müraciət edərək hədələndiyini, izlənildiyini bildirib, müstəntiq isə prosesi araşdırdıqda vətəndaşın yalan danışdığını və onun “Topaz”a külli miqdarda borcu olduğunu, borcu ödəyə bilmədiyi üçün bu cür yalana əl atdığını müəyyən edib.
“Topaz” oyunu kişilərin intiharına nə dərəcədə səbəb ola bilir?
“Ard-arda uduzanda, buna görə borca düşəndə, borcunu ödəyə bilməyəndə iradəsi zəif insanlar çıxış yolunu intiharda görə bilirlər”
“Polisə Dəstək” İctimai Birliyinin rəhbəri, hüquqşünas Şəmsəddin Əliyev bizimlə söhbətində bildirdi ki, “Topaz” oyunu tam olaraq intiharların səbəbi olmasa da, ona yol açan səbəblərdən biridir. “Topaz” oyunu qanunsuz qumar oyunlarından biridir. Arzuedilməz bir oyundur, təəssüflər olsun ki, gənclərimiz arasında da bu oyuna meyl göstərənlər var. Bütün hallarda, bu oyunun əleyhinəyəm.
Qumar oynayan insanlarda yalan danışmaq vərdişləri yaranır, hətta onlar borclarına görə öz yaxın ailə üzvlərindən belə oğurluqlar edə bilirlər. “Topaz” oyunu kişilər arasında baş verən intihar hadisələrinin səbəblərindən biri kimi diqqətdən qaçmır, amma tam səbəb deyil. Bilirsiniz ki, intiharların səbəbləri müxtəlifdir. Bu çox ciddi məsələdir. Çünki insanlar o oyunda iştirak etmək üçün müəyyən məbləğ əldə etməlidirlər. O məbləği tapmaq üçün müəyyən yollara əl atır, hətta cinayətlə onu əldə edirlər. Onlarda belə fikir olur ki, nə vaxtsa udacaqlar və borclarını bağlayacaqlar. Amma sonradan məsələ onun xeyrinə həllini tapmayanda, ard-arda uduzanda, buna görə borca düşəndə, borcunu ödəyə bilməyəndə iradəsi zəif insanlar çıxış yolunu intiharda görə bilirlər. Bu da faktordur. Cəmiyyətdə təəssüf ki, “Topaz” oyununa maraq göstərib, həyatını puç edənlər var” - deyə Ş.Əliyev qeyd etdi.
İradə SARIYEVA
