“Sədərək” ticarət mərkəzinin girişində və çıxışında quraşdırılan şlaqbaumlardan şikayət var. Şikayətçilər bildirirlər ki, ticarət mərkəzinin sahibi qanunsuz olaraq yolu kəsib, nəqliyyat vasitəsilə ticarət mərkəzinin ərazisinə daxil olan hər kəsdən 50 qəpik pul alır.
Məlumdur ki, “Sədərək” və “Binə” ticarət mərkəzlərinə daxil olmaq üçün mütləq 50 qəpik ödənilməlidir. Əks halda şlaqbaum açılmır. O da bəllidir ki, gün ərzində minlərlə maşın adıçəkilən ticarət mərkəzinə daxil olur. Ancaq onu da qeyd edək ki, sürücülərin ticarət mərkəzinə daxil olmaq üçün verdikləri 50 qəpiyin qarşılığında onlara hər hansı bir qəbz verilmir. Bu isə o deməkdir ki, sürücülərdən alınan məbləğ hansısa tarifə uyğun müəyyənləşdirilməyib. Hər sürücüdən 50 qəpik alınmaqla bazarda milyonlar dövr edir. Həmçinin, bu vəsaitlərdən vergi verilməməsi məsələsi də dəfələrlə mediada müzakirə edilib.
“...bunun heç bir vergisi, hesabatı yoxdur”
Məsələ ilə bağlı fikir bildirən nəqliyyat üzrə ekspert Elməddin Muradlının sözlərinə görə, Bakı şəhərində parkinq nəzarətçilərindən tutmuş, “Sədərək” və “Binə” ticarət mərkəzlərinə giriş-çıxışa qədər sürücülərdən qanunsuz olaraq pul yığılır və bu tamamilə özbaşınalıqdır: “Hansısa şirkət parkinqlərə öz işçilərini göndərir ki, nəzarətçi kimi orada dayansınlar və vətəndaşlardan pul alsınlar. Eyni zamanda, “Sədərək” və “Binə” ticarət mərkəzləri bu özbaşına addımı atırlar. Yolun pullu olub-olmaması dövlət tərəfindən müəyyən edilən məsələdir. Təsəvvür edin ki, Azərbaycanda yollar salınır və bu yolların pullu olacağı barədə dövlət rəsmiləri əvvəlcədən əhaliyə xəbərdarlıq edirlər. Hökumət rəsmiləri bu yollarda qiymətin neçə manat olacağına, neçə kilometr məsafədə ödənişli, qalan hissəsinin ödənişsiz olmasına qərar verirlər. Dövlətin öz siyasəti olmalıdır ki, pullu yol anlayışı da həyata keçsin. Ancaq “Binə” və “Sədərək” ticarət mərkəzləri bunu tam olaraq qanunsuz şəkildə ediblər. Orada vətəndaşlardan pullar yığılır. Heç bir vergisi, hesabatı yoxdur. Sürücülərə qəbz verilmir. Sürücü ərazidən çıxanda əl uzadanlara 50 qəpik verir ki, oradan çıxsın. İnsanlar buna dəfələrlə etiraz etsələr də, nəticəsi olmayıb.
Bir sözlə, “Sədərək” ticarət mərkəzi özü üçün post qurub, gələn-gedəndən 50 qəpik pul alır. Yoldan keçənlərdən yol vergisi alırlar və bunun heç bir rəsmiyyəti yoxdur. Sanki havaya atılan pullardır və bu pullar birbaşa ticarət mərkəzi rəhbərliyinə çatır. Onu da qeyd edim ki, qanunvericiliyə görə, parkinqlərdən istifadə 15 dəqiqə ərzində ödənişsizdir. 15 dəqiqə ərzində həmin yeri tərk edirsənsə, səndən heç kim ödəniş almamalıdır. Amma hazırkı vəziyyətdə dəqiqəsindən asılı olmayaraq, ora giriş edirsənsə, mütləq pul ödəməlisən. Bunun sistemi, qanun-qaydası niyə yoxdur?”
Günel CƏLİLOVA
