Bakı Şəhər Baş Səhiyyə İdarəsi tərəfindən keçirilən tenderlərin qalibi “Piramida - F.R.” MMC olub. Açıqlanan rəsmi məlumatlarda qeyd olunur ki, həmin MMC liftlərə texniki xidmət göstərəcək. Bu iş üçün Bakı Şəhər Baş Səhiyyə İdarəsi “Piramida - F.R.” MMC-yə 28 min 79 manat 92 qəpik ödəyəcək.
Onu da vurğulayaq ki, rəsmi məlumatlarda “Piramida - F.R.” MMC-nin VÖEN-i (vergi ödəyicisinin eyniləşdirmə nömrəsi) “1500429791” olaraq göstərilib. Kommersiya qurumlarının dövlət reyestri məlumatlarında qeyd olunan VÖEN nömrəsinə uyğun “Piramida - F.R.” MMC adlı şirkət mövcud deyil. Reyestr məlumatlarında VÖEN-i “1500429791” olan yalnız “Harmony İndustrial Construction and Enginering Group” MMC barədə məlumat var. Bu şirkətin 28.02.2005-ci ildə dövlət qeydiyyatına alındığı qeyd olunur. Məlumat üçün bildirək ki, hüquqi ünvanı Nərimanov rayonu, Ceyhun Hacıbəyli, ev 52, m. 20-də yerləşən şirkətin qanuni təmsilçisi Orucov Əlövsət Bilal oğludur.
Reyestr məlumatlarında “Piramida - F.R.” adlı şirkət mövcud olmadığı halda, bu şirkətin tender müsabiqələrində necə iştirak etdiyi müəmma olaraq qalır.
Araşdırma zamanı o da məlum oldu ki, 20.08.2020-ci il tarixinə olan məlumata əsasən, kommersiya qurumlarının dövlət reyestri məlumatlarında adı “Harmony İndustrial Construction and Enginering Group” MMC olan, lakin “etender.gov.az” saytında “Piramida - F.R.” MMC olaraq göstərilən şirkətin dövlət büdcəsinə 542 min 291 manat 38 qəpik vergi borcu olub. Məlumatlara görə, MMC-nin dövlət büdcəsinə hələ də 96 min 947 manat 13 qəpik vergi borcu var.
Xüsusi olaraq qeyd edək ki, vergi borcu olan şirkətlərin tenderdə iştirakı qanunvericiliyin tələbinə əsasən mümkün deyil. Keçirilən tenderlərlə bağlı son zamanlar çoxlu sayda şikayət var.
“Vergi borcu olan şirkət tenderlərdə iştirak edə bilməz, ancaq biz bunun əksini müşahidə edirik”
Sosial sahə üzrə ekspert İlqar Hüseynli bildirdi ki, cəmiyyətdə əsas narazılıq yaradan məsələlərdən biri də dövlət müəsissələrinin şəffaf olmayan bu cür tenderlər vasitəsilə büdcəni talamalarıdır: “Tender sözünün hərfi mənası müəyyən satış və xidmətlərin təşkili ilə bağlı açıq müsabiqənin keçirilməsidir. Bu proses çox şəffaf şəkildə həyata keçirilməlidir. Təəssüflər olsun ki, son zamanlar keçirilən tenderlərdə şəffaflıq prinsipinə əməl edilmir. Həmin qurumlara ictimai nəzarət də olduqca zəifdir. Məhz üzərlərində ciddi ictimai nəzarət görmədiklərinə görə belə sövdələşmələri istədikləri formada edirlər”.
Həmsöhbətimiz onu da əlavə etdi ki, vergi borcu olan şirkət tenderlərdə iştirak edə bilməz. Ancaq biz bunun əksini müşahidə edirik. Həmçinin, dövlət reyestrində adı olmayan şirkətlər də tenderlərdə qalib olurlar. Bu kimi problemlərin yaşanmaması üçün qeyd olunan sahəyə aidiyyəti qurumların nəzarəti artmalıdır.
Mövzu ilə bağlı Bakı Şəhər Baş Səhiyyə İdarəsi ilə əlaqə saxlamağa çalışdıq. Lakin idarədən telefona cavab verən tapılmadı.
Günel CƏLİLOVA
