Azərbaycanda koronavirusa yoluxanların sayının artmasına baxmayaraq, ölkədə koronavirus infeksiyası ilə mübarizə tədbirlərində iştirak edən həkimlərə ödənişlərin həcmində azalma müşahidə olunur. Halbuki, Nazirlər Kabinetinin qərarına əsasən, bu kateqoriyadakı tibb və qeyri-tibb işçiləri üçün iş vaxtlarına nisbətdə əməkhaqqının 3-5 misli miqdarında təcili müavinətlər verilir.
Ancaq araşdırmamız zamanı məlum oldu ki, Nazirlər Kabinetinin koronavirus infeksiyasına qarşı mübarizədə iştirak edən tibb və qeyri-tibb işçiləri üçün maaşların 3-5 misli miqdarında təcili artımların ödənilməsinə dair qərarı icra edilmir.
İcbari Tibbi Sığorta üzrə Dövlət Agentliyi - Aynurə Əhmədova: “COVID-19 infeksiyasına qarşı mübarizədə iştirak edən bir tibb işçisi üçün maaş artımı iş saatları ilə mütənasib olaraq, tibb müəssisəsi rəhbəri tərəfindən müəyyən edilir”
İcbari Tibbi Sığorta üzrə Dövlət Agentliyinin İctimaiyyətlə əlaqələr şöbəsinin müdiri Aynurə Əhmədova bildirdi ki, tibb müəssisələrinin rəhbərləri onlara koronavirusla mübarizədə iştirak edən həkimlərin siyahısını təqdim edirlər: “Agentliyimiz bu qurumların hesablarına pul köçürür. COVID-19 infeksiyasına qarşı mübarizədə iştirak edən bir tibb işçisi üçün maaş artımı iş saatları ilə mütənasib olaraq, tibb müəssisəsi rəhbəri tərəfindən müəyyən edilir”.
Adil Qeybulla: “...təcili müavinətlərin yalnız işlənmiş saatlarla mütənasib olaraq ödənildiyi ifadələri heç bir məntiqə sığmır”
Professor, tibbi ekspert Adil Qeybulla bildirdi ki, koronavirus infeksiyasına qarşı mübarizə tədbirlərində iştirak edən həkimlər üçün təcili müavinətlərin yalnız işlənmiş saatlarla mütənasib olaraq ödənildiyi ifadələri heç bir məntiqə sığmır: “Nəzərə almaq lazımdır ki, işləyən saatlardan asılı olmayaraq, həkimlər koronavirus virusuna yoluxa bilərlər. Axı onlar daim koronavirusa yoluxmuş xəstələrə baxmaq məcburiyyətindədirlər. Bu vaxta qədər təxminən yüz həkim koronavirusla mübarizədə həyatını itirib. COVID-li xəstələrlə işləyən həkimlərə həssas yanaşılmalı, onlar üçün əməkhaqqı olduğu şəkildə verilməlidir”.
Günel CƏLİLOVA
