Paytaxtın ətrafında yerləşən qəsəbələrdə, onlara yaxın ərazilərdə salınan yaşayış sahələrində kanalizasiya ən ciddi problemlərdən biridir. Yüz minlərlə evin tullantı suları həyətlərdə qazılmış quyulara axıdılır. Bu isə müxtəlif ərazilərdə qrunt sularının səviyyəsinin artmasına, torpağın aşınmasına səbəb olur.
Ekoloji baxımdan belə quyular bir sıra fəsadlara səbəb olur. Düzdür, bu quyular qapalı olur, ancaq oradan suyun sızması torpağı çirkləndirir. Bu cür tullantı suları torpağı çirkləndirməklə yanaşı, sürüşmələrə də şərait yaradır. Çünki bu yolla torpağa axıdılan sular itmir. Nəticədə bəzi ərazilərdə sürüşmə aktivləşir. Bakının bir çox rayonunun bəzi ərazilərində kanalizasiya sisteminin olmaması onsuz da 3 tərəfi su ilə əhatə edilən Abşeron yarımadasında qrunt sularının artmasına gətirib çıxarır.
Belə yaşayış məntəqələrindən biri də Maştağanın Savalan yaşayış massividir. Adıçəkilən massivdə yaşayan sakinlər deyirlər ki, kanalizasiya olmadığına görə massivdə yağış yağan kimi gölməçələr yaranır və bu da nəmliyin artmasına səbəb olur. Zatən, ərazidə qrunt suları üstünlük təşkil edir, o biri tərəfdən də kanalizasiyanın olmaması vəziyyəti bir qədər də çətinləşdirir.
Əlövsət Məmmədov: “Qrunt sularının artmasının başlıca səbəbi kanalizasiyanın olmamasıdır”
Sözügedən məsələ ilə bağlı Savalan sakini Əlövsət Məmmədov bildirdi ki, neçə ildir yaşayış massivində kanalizasiya yoxdur: “Qış mövsümündə Savalanda bir çox yer suyun içində olur. Bu, təkcə həmin yerlərin çökəkdə olması ilə bağlı deyil. Düzdür, adətən, su çökək yerlərdə toplanır. Ancaq kanalizasiya xətti olsa, o zaman bu cür sular axıdılacaq. Xüsusən də qış bir balaca sərt olan kimi, bu problemlər daha çox özünü göstərir. Bu il də qış, bildiyiniz kimi, soyuq keçdi. Evlərin bəzilərinin altı sudur. Bu, evin harada yerləşməsindən asılı olaraq dəyişir. Elə ev var ki, altına daha çox su yığılıb, elə ev var nisbətən azdır. İstənilən halda, nəmlik səviyyəsi artır və bu da xəstəlikdir. Kanalizasiya olmadığına görə sakinlər məişət tullantılarını axıtmaq üçün anbar qazırlar. Nəticədə tullantı suları yerə hopur. Qrunt sularının artmasının başlıca səbəbi kanalizasiyanın olmamasıdır. Kanalizasiya olsa, o zaman bu problemlər də olmaz. Savalan yaşayış massivi son illər xeyli böyüyüb, əhalinin sayı artıb. Əvvəllər burada məktəb yox idi və əhali çox çətinlik çəkirdi. İki il əvvəl yeni məktəb kompleksi tikildi və problem öz həllini tapdı. Çox istərdik ki, kanalizasiya problemi də həll edilsin”.
Anar Cəbrayıllı: “Hökumət kanalizasiya xəttinin çəkilməsi ilə bağlı qərar versə, vəsait ayırsa, bu iş görüləcək”
Məsələyə aydınlıq gətirmək üçün “Azərsu” ASC-nin mətbuat katibi Anar Cəbrayıllı ilə əlaqə saxladıq. O, qəzetimizə açıqlamasında bildirdi ki, Savalan massivində kanalizasiya sistemi qurulacaq: “Ancaq bunun nə zaman reallaşacağı bilinmir. Məsələ ondadır ki, bu kimi layihələr dövlət investisiyaları çərçivəsində reallaşdırılır. İnvestisiyalar ayrıldıqca, bu layihələr icra olunur. Ona görə də Savalanda kanalizasiya sisteminin bu il, yoxsa gələn il olacağını dəqiq söyləmək qeyri-mümkündür. Bu gün biz Bakıətrafı qəsəbələrdə əsasən su xətlərinin çəkilməsini icra edirik. Yəni əsasən su şəbəkəsinin yaradılması, yenidən qurulması işləri həyata keçirilir. Hökumətin təsdiqlədiyi tədbirlər planında su çəkilişi öz əksini tapıb. Hökumət kanalizasiya xəttinin çəkilməsi ilə bağlı qərar versə, vəsait ayırsa, bu iş görüləcək”.
Belə məlum oldu ki, Savalan sakinləri kanalizasiya xəttinin çəkilməsini hələ gözləməli olacaqlar.
Vidadi ORDAHALLI
