Norveç Dərman Preparatları Agentliyinin (DPA) baş həkimi Siqurd Hortemo və Norveç İctimai Səhiyyə İnstitutu Azərbaycanın da alacağı COVID-19 əleyhinə "AstraZeneca" vaksini ilə bağlı narahatlıq doğuran məlumat yayıb.
Məlumata görə, "AstraZeneca" vaksini vurulmuş şəxslərin ağ ciyər arteriyasında yüksək tromboemboliya (qan damarının laxta ilə tıxanması), venaların trombozu və ya trombosit səviyyəsinin düşməsi kimi simptomlar yaranıb. Danimarka və Norveçin "AstraZeneca"nın tətbiqini dayandırmasından öncə Avstriya qanın laxtalanmasının pozulması və ağ ciyər arteriyasında tromboemboliya səbəbindən ölüm faktını araşdırması üçün bu peyvəndin istifadəsinə ara verib. Niderland, İspaniya, Almaniya, Fransa və İtaliya da "AztraZeneca" vaksininin tətbiqini dayandırıb. İtaliyanın Biella şəhərinin prokurorluğu isə peyvənd vurulmuş musiqi müəlliminin ölümündən sonra “AstraZeneca” vaksin partiyasına həbs qoyub.
Qeyd edək ki, Baş nazir Əli Əsədov koronavirus (COVID-19) infeksiyasının Azərbaycan Respublikasının ərazisində yarada biləcəyi təhlükənin qarşısının alınması və bu sahədə immunizasiya tədbirlərinin həyata keçirilməsi məqsədilə sərəncam imzalayıb. Həmin sərəncama görə, "İcbari Tibbi Sığorta üzrə Dövlət Agentliyi ilə GAVİ ALLİANCE arasında imzalanmış dərman vasitəsinin tədarükünə dair 2020-ci il 18 sentyabr tarixli Sazişə əsasən, İsveç Krallığının "AztraZeneca" Şirkətinə məxsus 432 000 doza COVID-19 vaksin dərman vasitəsinin Azərbaycana idxalı 180 gün müddətində həyata keçirilməlidir. Ölkəmiz üçün bu vaksindən istifadənin nə kimi təhlükəsi var?
“Sağlamlığa Xidmət” İctimai Birliyinin icracı direktoru Pərvanə Vəliyeva “Bakı-Xəbər”ə açıqlamasında bildirdi ki, “AstraZeneka” ilə bağlı bu tip hallar baş verib: “Ancaq bu halın birbaşa olaraq vaksin səbəbi ilə baş verdiyi hələ müəyyənləşməyib. Martın 8-dən bəri Avropa və ABŞ-da “AstraZeneka” alan insanların sayı 17 milyonu ötüb. “AstraZeneka” özünün yaydığı məlumatda 37 nəfərdə belə halların olması haqda məlumat gəldiyini bildirib. Bu olsa belə, neqativ halların baş verməsinin ümümi vaksin edilmiş şəxslər arasındakı nisbəti 0.000218 faizdir. Bu da çox cuzi bir rəqəmdir”.
Ekspertin sözlərinə görə, bu məsələdə digər ölkələrin mövqeyi də çox önəmlidir: “Bu vaksini təhlükəli hesab edib istifadəsini kütləvi dayandırmış olarlarsa, onun tətbiqi ölkəmizdə də dayandırıla bilər. Ancaq hələ ki, "AstraZeneca" vaksininin çox ciddi yan təsirləri ilə bağlı məlumatlar təsdiq olunmamış bu peyvənddən imtina etmək doğru olmaz. "AstraZeneca" vaksininin zərəri hələ ki, tam sübut olunmayıb. "AstraZeneca" vaksinini, ürək-damar sistemi xəstəliklərinin ciddi xroniki xəstəliyi yoxdursa, vurmaq olar. Bu gün elə şəxslər var ki, ürəyində iki stenti var, amma ona vaksin vurulub. Trombun vaksinlə əlaqələndirilməsi sübut olunmayıb. Bu baxımdan da ciddi təşviş üçün əsas görmürəm”.
Məhəmmədəli QƏRİBLİ
