İcbari tibbi xidmətlər zərfinə aid xidmətlər yalnız dövlət müəssisələrində deyil, özəl klinikalarda da göstəriləcək. “Trend”in məlumatına görə, bunu İcbari Tibbi Sığorta üzrə Dövlət Agentliyinin (İTSDA) Tibbi iddialar departamentinin rəhbəri Vüqar Qurbanov deyib.
Onun sözlərinə görə, bəzi xidmətləri İTSDA tabeliyində olan dövlət tibb müəssisələrində göstərmək mümkün deyil: “Ona görə də əhalinin bu xidmətləri daha rahat şəkildə, ödənişsiz əldə edə bilməsi üçün özəl klinikalarla da müqavilələrimiz var. Əsasən aorta koronar şuntlama, anjoplastika, ağır neyrocərrahiyyə əməliyyatları, müştərək travmalar, qapalı ürək əməliyyatları və sair bu kimi əməliyyatlar bizim müqaviləmiz olan özəl klinikalarda həyata keçiriləcək. Sadəcə olaraq, bu əməliyyatların edilməsi üçün vətəndaş, ilkin olaraq, agentliyin tabeliyində olan ərazi üzrə tibb müəssisələrinə müraciət etməlidir”.
İcbari Tibbi Sığorta üzrə Dövlət Agentliyi rəsmisinin fikirləri birmənalı qarşılanmır. Bu mənada ki, bəzi ekspertlərin fikrincə, ölkəmizdə özəl klinikaların xidmət səviyyəsinin dövlət xəstəxanalarından üstün tutulması yolverilməzdir. Ekspertlər hesab edirlər ki, bu gün dövlət xəstəxanaları bütün üstün şəraitlərə malikdirlər və burada xidmət səviyyəsi həm ucuzdur, həm də keyfiyyətli. Dövlət xəstəxanalarının hər cür tibbi ləvazimatlarla təmin edildiyini deyən bəzi ekspertlərin sözlərinə görə, bəziləri özəl klinikaları məqsədli şəkildə reklam etməklə dövlət xəstəxanalarının nüfuzunu zədələmək istəyirlər.
Ölkədə elə bir özəl klinika yoxdur ki, dövlət klinikasından üstün olsun və orada xidmət aşağı olsun.
Bəzi ekspertlər deyirlər ki, elə əvvəldən ölkəmizdə tibbi sığortaya qoşulan müəyyən şirkətlərin əməkdaşlarının müalicəsi həmişə özəl klinikalara yönəldilib.
Nəsib Quliyev: “Bəzi özəl klinikalarda elə üsullar tətbiq olunur ki...”
Professor Nəsib Quliyev “Bakı-Xəbər”ə bildirdi ki, əslində, həqiqətən də bəzi xidmət sahələri hələ dövlət klinikalarında tətbiq edilmədiyi üçün, xəstələrin özəl klinikalara yönəldilməsi uyğundur. “Elə spesifik xidmət sahələri var ki, onlar özəl xidmət sahələrində tətbiq edilir. Dünyada elə dövlət yoxdur ki, hər şeyi əldə etmiş olsun. Söhbət təkcə səhiyyədən getmir, istənilən sahəni götürsək belədir. Ona görə də özəl qurumların işləyib hazırladığı bir müayinə-müalicə metodikası varsa və o, dövlətdə hələ tətbiq edilməyibsə, bundan özəl klinikalarda istifadə edə bilərlər. Dövlətdə hər şey olsaydı, onda özəl sektora ehtiyac olmazdı və inkişaf da dayanardı. Ona görə özəl tibb müəssisələrini yaradan adamlar özəl sahələr axtarırlar ki, onlar orada işləsinlər və onların tətbiq etdikləri başqalarında olmasın, təkcə bunlarda olsun. Bu ideya həmişə tibbdə biznes quran insanların beynində olur - “mən elə bir müayinə, müalicə işi tətbiq edim ki, mənim müəssisəmə müraciət etsinlər, başqalarına yox”. Ona görə də bu gün doğrudan da bəzi özəl klinikalarda elə üsullar tətbiq olunur ki, bu hələ dövlət xəstəxanalarında tətbiq olunmayıb. Bu baxımdan, əhalinin bəzi xidmətlərdən ödənişsiz istifadə etməsi üçün onların özəl klinikalara yönəldilməsi mümkündür. Göndəriş əsasında vətəndaşı seçilən özəl klinikalara göndərə bilərlər, amma bu şərtlə ki, İcbari Tibbi Sığorta Agentliyi onların maliyyə məsələsini həll etsin, onlar da müalicə üsulu tətbiq etsinlər” - deyə N.Quliyev qeyd etdi.
Adil Qeybulla: “Burada şəxsi maraq da var”
Professor Adil Qeybulla bildirdi ki, dövlət xəstəxanalarının əksəriyyətinin maddi-texniki bazası elə də yüksək deyil. “Dövlət xəstəxanalarında maddi-texniki bazanın gücləndirilməsi, təmir və sair adı altında işlər görülüb, bura köhnə avadanlıqları alıb doldurublar. Dövlət xəstəxanaları bu baxımdan, hamısından olmasa da, bəzi özəl xəstəxanalardan geridə qalırlar. Elə klinikalar var ki, maddi-texniki bazası, kadr potensialı elə də yüksək deyil. Amma bəzi tanınmış klinikalar var ki, daha müasir avadanlıqlar alıblar və sair. Burada şəxsi maraq da var. Təəssüflər olsun ki, dövlət xəstəxanaları həm təchizat, həm də digər baxımdan bəzi özəl xəstəxanalara çata bilmirlər. Ona görə də bəzi müayinələr, prosedurlar özəl klinikalarla bağlanan müqavilələr şəklində həyata keçirilsin. Amma səhiyyə elə qurulmalıdır ki, icbari tibbi sığorta üçün nəzərdə tutulan xəstəxanaların hər birində xidmət səviyyəsi çox yüksək olmalıdır. Çox təəssüf ki, bu bizdə belə deyil. Ən yaxşı variantlardan biri Almaniya səhiyyəsidir. Orada bu çox gözəl qurulub, səhiyyə tam sosialdır, orada icbari tibbi sığorta bütün xəstəxanalarda işləyir. Düşünürəm ki, o model bizim üçün çox uyğundur”.
A.Qeybullanın sözlərinə görə, tibbi sığorta elə təşkil olunmalıdır ki, ondan sui-istifadə halları olmasın.
İradə SARIYEVA
