COVİD-19 pandemiyasına qarşı peyvənd olunmaq üçün Lerik Rayon Mərkəzi Xəstəxanasına getmişdim. Sağlamlıq ocağında olan şərait ilk baxışdan nümunəvi xidmətdən xəbər verirdi. Xəstəxananın inzibati şöbəsində virusla mübarizə məqsədilə tərkibi dörd həkim, on tibb bacısi, üç operatordan ibarət komissiya üzvlərinin səmimi münasibətinə heyran qaldım.
İnfeksionist həkim tərəfindən müasir avadanlıqlarla yüksək səviyyədə müayinə olundum. Operator Ayət Səmədov məni qeydiyyata aldıqdan sonra vaksinasiya otağına keçdim. Burada tibb işçiləri Fəridə Əliyevanın, Günel Ağayevanın qoluma vurduğu iynədən bir balaca da incimədim. Vaksin edilmiş şəxslərdən ötrü gözləmə otağında müəyyən müddət istirahət edib rahatlandım.
Bütün işlər Lerik Rayon Mərkəzi Xəstəxanası publik- hüquqi şəxsin direktoru Maqsud Ağayevin nəzarəti altında görülürdü. Söhbət əsnasında o dedi: - Rayonda COVİD-19 infeksiyasına qarşı dövlət hesabına vaksinasiya prosesi uğurla gedir. Hər gün həkimlərimiz əhali arasında peyvəndləmənin vacibliyi və əhəmiyyəti barədə geniş izahat işləri aparır. Vaksinasiya prosesində əsas məqsəd əhalidə kollektiv immunitetin yaranmasına nail olmaqdır. Eyni zamanda, kütləvi vaksinasiyanın görülməsi, infeksiyanın azalması və idarə olunma səviyyəsində saxlamasıdır. Həm də vaksinasiyadan keçən adam infeksiyaya yoluxduğu halda onu yüngül keçirir. Peyvəndləmə kampaniyasından əlavə, virusa tezliklə qalib gəlməkdən ötrü sosial məsafə prinsiplərinə daha ciddi riayət etmək tövsiyə olunur. 1,5-2 metr deyil, imkan olduqda daha çox məsafə saxlamaq məsləhət görülür. Yoluxma sayının az olması üçün qorunma tədbirlərini düzgün yerinə yetirmək lazımdır. Bəzən əhali arasında vaksinasiyanın əks təsirləri barədə yanlış fikirlər yayanlar tapılır. Bu tendensiya düzgün deyil, qabaqlayıcı tədbirlər zəruridir, heç kəs vaksinasiyadan qorxmasın. Fəqət, vaksinasiya prosesi tam başa çatandan sonra COVİD-19 təhlükəsindən yaxa qurtarmaqla, vurulan peyvəndin müsbət effektini hər kəs öz həyatında hiss edəcək.
Onu da bildirim ki, əhalinin rahat və operativ şəkildə vaksinasiya olunması üçün bizdə normal şərait və kifayət qədər vaksin preparatı vardır. Vətəndaşlara bir daha müraciət edirik: Vaksinasiya prosesindən vaxtında keçin, dünyanın dəhşətli bəlasına çevrilən “taclı” düşmənə qalib gəlin!”
Bəli, qlobal sosial bəlanın hələ bitmədiyini nəzərə alaraq, maskadan düzgün istifadə etməklə, sosial məsafə saxlamaqla, bütün gigiyena qaydalarına uyğun davranmaqla və ən əsası, vaksinasiya olunmaqla COVİD-19 pandemiyasının ağır, öldürücü təhlükəsindən qurtula bilərik.
Zəfər ORUCOĞLU Azərbaycan Jurnalistlər Birliyinin üzvü
