Məlum olduğu kimi, bloger Mehman Hüseynov icazəsiz olaraq dron əldə etdiyi üçün saxlanmışdı. Daxili İşlər Nazirliyinin Mətbuat xidmətinin rəisi, polis polkovniki Ehsan Zahidov mediaya açıqlamasında qeyd edib ki, M.Hüseynovun istifadəsinə xüsusi icazə tələb olunan dron aparatını ölkəyə gətirməsi barədə əməliyyat məlumatı əldə olunub:
“Məlumatın yoxlanılması məqsədilə saxlanan M.Hüseynovdan 1 ədəd dron aparatı aşkar edilərək götürülüb. Müvafiq ekspertiza təyin edilməklə hazırda araşdırma aparılır”.
Qeyd etdiyimiz kimi, bloger icazəsiz dron əldə etdiyi üçün saxlanmışdı. Maraqlıdır, dronlardan icazəsiz istifadə nəyə səbəb ola bilər? İstənilən şəxsin drondan sərbəst istifadə etmək imkanına malik olması cəmiyyətdə nə cür problemlər yaradar?
İbrahim Rüstəmli: “Qanunsuz drondan istifadə etməklə şəxsi həyata müdaxilə etmək mümkündür, ancaq bu düzgün deyil və cəmiyyət tərəfindən xoş qarşılanmır”
Suallarımıza cavab tapmaq üçün ehtiyatda olan polkovnik-leytenant İbrahim Rüstəmliyə müraciət etdik. O, “Bakı-Xəbər”ə açıqlamasında qeyd etdi ki, icazəsiz dronlardan istifadə düzgün deyil: “Qanunsuz drondan istifadə etməklə şəxsi həyata müdaxilə etmək mümkündür. Ancaq qeyd etdiyim kimi, bu düzgün deyil və cəmiyyət tərəfindən xoş qarşılanmır. Ümumiyyətlə, şəxsi həyata müdaxilə etmək qəbuledilməzdir”.
Həmsöhbətimiz onu da vurğuladı ki, 44 günlük müharibədən sonra dronların həyatımızdakı statusu dəyişib: “Məlumdur ki, dron kəşfiyyat xarakteri daşıyır və onun müxtəlif növləri var. Elə dron var ki, təxminən arı ölçüsündədir. Həmin ölçülü dronlarla da gizli çəkiliş aparmaq mümkündür. İcazəsiz dronlardan istifadə cəmiyyətdə narazılığa səbəb ola bilər”.
Osman Gündüz: “...dronlardan istifadəyə görə məsuliyyət nəzərdə tutulub”
Azərbaycan İnternet Forumunun rəhbəri Osman Gündüz drondan istifadə qaydalarına aydınlıq gətirdi. Onun sözlərinə görə, hazırda ölkəmizdə mülki silah və ya hansısa partladıcılardan istifadəyə icazə qaydası ilə dronlardan istifadə qaydası eynidir: “Daxili İşlər Nazirliyi bloger M.Hüseynovun saxlanması səbəbinin dronla bağlı olduğunu bildirib. Ondan 1 ədəd dron aparatının götürüldüyünü açıqlayıb. Ölkəmizdə dronlardan istifadəyə məhdudiyyətlər qoyulub.
Dron gətirmək üçün mülki dövriyyəsi məhdudlaşdırılan əşyaların siyahısına uyğun olaraq, 6 dövlət qurumundan icazə alınmalıdır. Bunlar NRYTN-in Dövlət Mülki Aviasiya Administrasiyası, XDMX, DTX, DSX, MN və DİN-dir. Cinayət Məcəlləsinin 156-cı maddəsində dronlardan istifadəyə görə məsuliyyət nəzərdə tutulub”.
Günel CƏLİLOVA
