Autizm artıq günümüzün acı gerçəkliyidir və ildən-ilə durmadan artır. Bütün dünyada olduğu kimi, ölkəmizdə də bu xəstəlikdən əziyyət çəkənlərin sayı çoxalır. Autizm sindromlu uşaqlara xüsusi qayğı tələb olunur. Dövlətimiz tərəfindən də bu uşaqlara xüsusi münasibət sərgilənir. Hətta qeyd olunan xəstəlik aşkar olunursa, həmin uşağa müavinət də təyin olunur.
Ancaq bu günlərdə Göyçayda anadangəlmə autizim xəstəsinin sosial müavinətinin dayandırılması haqqında məlumat yayılıb. Məlumat üçün bildirək ki, Göyçay rayonu Yenikənd kənd sakini Fəzi Fəzili anadangəlmə autizim xəstəsidir. Valideynləri onun bu xəstəliyini 3 yaşında olarkən hiss ediblər, lakin qısa zamanda bu xəstəliyin keçəcəyini düşünərək Fəzini müalicə etdirməyiblər. 8 yaşına qədər heç bir müalicə aparılmayıb. Fəzinin valideynləri onun vəziyyətinin getdikcə ağırlaşdığını görəndən sonra onu həkimə aparıblar. Aparılan müayinə zamanı uşağın autizm daşıyıcısı olduğu müəyyən edilib. Beləliklə, 2015-ci ildən etibarən Fəziyə sosial müavinət təyin edilib. 2015-ci ildən 2020-ci ilin avqustuna kimi haqqında bəhs edilən şəxsə müavinət ödənilib.
Fəzinin anası Xeyransa Fəziliyeva bildirir ki, 2020-ci ilin avqust ayında övladına təyin olunan sosial müavinət kəsilib. Bununla bağlı Göyçay Rayon Mərkəzi Xəstəxanasının poliklinika şöbəsinə müraciət ediblər. Şöbədən lazımi sənədlər toplanaraq aidiyyəti üzrə göndərilsə də, hansı səbəbdən imtina olunması haqqında heç bir məlumat verilməyib.
Dövlət Tibbi-Sosial Ekspertiza və Reabilitasiya Agentliyi - Gülnar Əzizova: “Edilən müraciətdə çatışmazlıqlar var”
Dövlət Tibbi-Sosial Ekspertiza və Reabilitasiya Agentliyinin mətbuat katibi Gülnar Əzizova məsələ barədə bildirdi ki, edilən müraciətdə çatışmazlıqlar var: “Çatışmazlıqlar aradan qaldırıldıqdan sonra yenidən Göyçay Rayon Mərkəzi Xəstəxanasında əlillik sisteminə forma 88 sənədi daxil edilməlidir”.
Günel CƏLİLOVA
