Piyadaların təhlükəsizliyinin, şəhər nəqliyyatının maneəsiz hərəkətinin təmin edilməsi yönündə ölkəmizdə dövlət tərəfindən intensiv işlər görülür və bu istiqamətdə fəaliyyət davam etdirilir. Bildiyimiz kimi, Prezident İlham Əliyev Mərdəkan-Zuğulba avtomobil yolunda yerüstü piyada keçidinin açılışında iştirak edib.
Bakıda və respublikamızın ayrı-ayrı yerlərində indiyə qədər saysız yeraltı və yerüstü piyada keçidi inşa edilib və şübhəsiz ki, bunun respublikamızın müasir inkişafı, əhalinin rahatlığının və təhlükəsizliyinin təmin edilməsində çox əhəmiyyətli rolu var.
Bakı şəhərində 113 piyada keçidi tikilərək istifadəyə verilib. Onlardan 41-i yerüstü piyada keçidi, 72-si yeraltı piyada keçididir. Bundan əlavə, ölkəmizin respublika əhəmiyyətli magistral yollarında 64 yeraltı və yerüstü piyada keçidi tikilib.
Rayon və şəhərlərin daxilində 3 ədəd (Quba, Zaqatala, Qəbələ) piyada keçidi tikilərək istifadəyə verilib. Bu günədək ölkədə 180 ədəd piyada keçidi inşa olunub. Hazırda isə ölkə üzrə avtomobil yollarında 9 ərazidə piyada keçidinin inşası davam etdirilir.
Gizlin deyil ki, yeraltı və yerüstü keçidlərin istifadəyə verilməsi ölkəmizdə, xüsusən də paytaxtda avtomobil nəqliyyatının hərəkətini daha rəvan şəkildə təmin edən, ölkədə insan həyatının təhlükəsizliyi üçün önəmli sayılan infrastrukturlardan biri kimi böyük əhəmiyyətə malikdir.
Bu keçidlərin istifadəyə verilməsi piyadaların təhlükəsizliyində necə rol oynayır? Avtomobil nəqliyyatının rəvan fəaliyyətini necə təmin edir?
Ekseprtlər qeyd edirlər ki, bu yalnız sadə bir keçid rolunu oynamır, bu, dövlətin vətəndaşların həyatına dəyər verməsinin əlamətlərindən biridir, eyni zamanda da şəhər nəqliyyatının daha maneəsiz hərəkət etməsini təmin edən mühüm göstəricidir.
“Dövlət vətəndaşları düşünür, vətəndaşlar da dövlətin onlar üçün yaratdıqları bu infrastrukturlardan istifadə etməyə üstünlük verməlidirlər”
Məsələni şərh edən “Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abasbəyli “Bakı-Xəbər”ə bildirdi ki, ölkəmizdə, xüsusən də paytaxt Bakıda yeraltı və yerüstü piyada keçidlərin inşasına dövlət tərəfindən xüsusi diqqət yetirilməsi çox müsbət haldır. Ekspert bunun şəhərimizin həm müasir, həm də gələcək inkişafı üçün böyük əhəmiyyət kəsb etdiyini deməklə yanaşı, hesab edir ki, yerüstü və yeraltı keçidlərin inşa edilərək istifadəyə verilməsinin ən üstün cəhətlərindən biri burada vətəndaşların təhlükəsizliyinin təmin edilməsidir. “Azərbaycanda yerüstü və yeraltı keçidlərin tikilərək vətəndaşların istifadəsinə verilməsinin böyük əhəmiyyəti var. Burada bir neçə məqam diqqətimizi çəkir. Yeraltı və yerüstü piyada keçidlərin həm Bakıda, həm də respublikamızın digər yerlərində istifadəyə verilməsinin mərkəzində vətəndaşlarımızın təhlükəsiz hərəkətinin təmin edilməsi amili dayanır. Burada vətəndaşların heç bir qəza, problemlə üzləşmədən, rahat şəkildə hərəkətinin təmin edilməsi əsas götürülüb. Bu da nədir? Hər bir vətəndaş heç bir təhlükə ilə üzləşmədən çox rahat və maneəsiz şəkildə yeraltı və yerüstü piyada keçidlərindən istifadə edir və evinə, mənzil başına sağ-salamat, qorxusuz, əndişəsiz çatır. Bilirsiniz ki, çox zaman piyadalar üçün nəzərdə tutulan zolaqlı piyada keçidlərdə insanlar üçün müəyyən problemlər yaranır, onların həyatı təhlükəyə düşür. Amma vətəndaşlar istifadəyə verilən yeraltı və yerüstü piyada keçidlərindən adlayarkən heç bir təhlükə ilə üzləşmirlər. Xüsusən böyük magistral yollarda bu keçidlərin inşa edilərək istifadəyə verilməsi vətəndaşların təhlükəsizliyinə verilən dəyərdir. Bu keçidlərin istifadəyə verilməsi eyni zamanda da avtomobillərin rahat, maneəsiz, təhlükə ilə üzləşmədən hərəkət etməsinə böyük şərait yaradıb. Saysız yeraltı və yerüstü keçidin istifadəyə verilməsində əsas məsələ vətəndaşların təhlükəsizliyinin təmin edilməsinə dövlətin verdiyi böyük əhəmiyyətdir. Hər iki halda burada söhbət vətəndaşların təhlükəsizliyindən gedir. Yəni piyada keçiddən istifadə edənlər də, avtomobil sürənlər də bu ölkənin vətəndaşlarıdır və onların təhlükəsizliyini dövlət yüksək səviyyədə təmin edir. Yeraltı və yerüstü keçidlər ölkəmizdə, xüsusən də paytaxtda avtomobil nəqliyyatının hərəkətini daha rahat şəkildə təmin edən, vətəndaşların təhlükəsizliyinə yönəlik bir infrastrukturdur ki, bunun Bakı kimi meqapolis üçün əhəmiyyəti böyükdür. Bakı artıq meqapolisdir və şəhərimizdə həm insan, həm də avtomobil sıxlığı var. Amma yeraltı və yerüstü keçidlərin istifadəyə verilməsi bu sıxlığın da aradan qalxmasına imkan verir” - deyə bildirən Ə.Abasbəylinin sözlərinə görə, vətəndaşlar da yeraltı və yerüstü piyada keçidlərdən istifadə etməyə üstünlük verməlidirlər.
Ekspertin qeyd etdiyinə görə, şəhərimizdə, eləcə də respublikamızın digər yerlərində yeraltı və yerüstü piyada keçidlərinin olmasına baxmayaraq, bəzi vətəndaşlar öz həyatlarını təhlükəyə ataraq çoxzolaqlı, magistal yollardan keçirlər. Yeraltı və yerüstü keçidlərdən istifadə ilə bağlı vətəndaşlar arasında maarifçilik tədbirlərinin gücləndirilməsinə ehtiyac olduğunu deyən Ə.Abasbəylinin fikrincə, sürücülər arasında da maarifçilik aparılmalıdır. “Vətəndaşlar bilməlidirlər ki, dövlət bu vacib infrastrukturu yaratmaqla onların təhlükəsizliyini düşünür, rahatlıqlarını təmin etmək məqsədilə bu qədər yeraltı və yerüstü piyada keçidlər inşa edir. Dövlət vətəndaşları düşünür, vətəndaşlar da dövlətin onlar üçün yaratdıqları bu infrastrukturlardan istifadə etməyə üstünlük verməlidirlər” - deyə müsahibimiz qeyd etdi.
İradə SARIYEVA
