Məlum olduğu kimi, koronavirus pandemiyası ilə əlaqədar hökumət mart-aprel, avqust-sentyabr aylarında özəl müəssisələrə yardım etdi.
Belə ki, koronavirus (COVID-19) pandemiyasının sahibkarlıq subyektlərinə mənfi təsirinin azaldılması məqsədilə Nazirlər Kabinetinin qəbul etdiyi Tədbirlər Planına uyğun olaraq, İqtisadiyyat Nazirliyi koronavirus pandemiyasından zərər çəkmiş sahibkarlara və onların muzdlu işçilərinə maliyyə dəstəyi proqramını həyata keçirir. Görünən odur ki, dövlət koronavirusla əlaqədar sahibkarlara maliyyə vəsaiti ayırıb. Yəni işçilərin məvacibinin yarısını dövlət ödəyir. Bu o deməkdir ki, sahibkar işçinin məvacibini verməklə yanaşı, sözügedən yardımı da ödəməlidir.
Ancaq bu arada belə məlumatlar var ki, bəzi sahibkarlar bu vəsaiti işçilərdən əsirgəyirlər. Müxtəlif vasitələrlə bu vəsaiti öz şəxsi maraqları üçün mənimsəyirlər. Nəzərdə tutulduğu həcmdə işçilərə ödəniş edilmir. İşçilərə bu vəsaiti avans əvəzi və yaxud da maaş əvəzi verirlər. Bəzən elə olur ki, yardım veriləndən sonra onu maaşdan çıxırlar. Hansı ki, sözügedən məvacibin yarısı dövlət tərəfindən ödənilir. Ancaq bir sıra müəssisələr işçilərin məlumatsızlığından istifadə edərək, sonra həmin pulu onların maaşından çıxırlar. Belə xoşagəlməz hallar xüsusən də şəhərətrafı parniklərdə daha çox baş verir. Məsələ ondadır ki, orada çalışanlar əhalinin daha yoxsul və maariflənmə səviyyəsi aşağı olan təbəqəsi olduğuna görə müəyyən sahibkarlar bundan sui-istifadə edib belə neqativ hallara yol verirlər.
“Ciddi ictimai nəzarət olmalıdır və bu kimi qanunsuzluqlara yol verən sahibkarlar cəzalandırılmalıdırlar”
Sözügedən məsələ ilə bağlı fikirlərini “Bakı-Xəbər”lə bölüşən Azad İstehlakçılar Birliyinin sədri Eyyub Hüseynovun sözlərinə görə, bu tamamilə qanunsuzluqdur: “Faktiki olaraq, bu, işçilərin əmək hüquqlarının pozulması deməkdir. Əslində, işçinin həm məvacibi verilməli, həm də sözügedən vəsait onların hesabına köçürülməlidir. Hökumət sahibkarlar üçün hərtərəfli şərait yaradır. Pandemiya ilə əlaqədar onlara maliyyə yardımı edir ki, ciddi çətinliklərlə üzləşməsinlər. Sahibkarlar isə bu kimi pozuntulara yol verərək, faktiki olaraq, qanunları pozurlar və hökumətin qərarlarına əməl etmirlər. Hesab edirəm ki, bu anormaldır və paralel olaraq, işçilərin əmək hüquqlarının pozulması deməkdir. Həqiqətən də belə məlumatlar var və hesab edirəm ki, bu cür hallar araşdırılmalıdır. Müəyyən sahibkarlar işçilərin məlumatsızlığından və digər məsələlərdən sui-istifadə edərək, dövlətin bu yöndə apardığı siyasətə kölgə salırlar. Fikrimcə, bu, yolverilməzdir və ciddi monitorinqlər aparılmalıdır. Ciddi ictimai nəzarət olmalıdır və bu kimi qanunsuzluqlara yol verən sahibkarlar cəzalandırılmalıdırlar”.
Ekspertin fikrincə, bu kimi qanunsuz hallarla üzləşən işçilər nə qədər fəal olsalar, o zaman belə neqativ halları tez aşkar etmək mümkün olacaq.
Vidadi ORDAHALLI
