Son illər ölkəmizdə çoxmərtəbəli binaların sayında artım müşahidə olunur. Bəzən bu "göydələnlər" iç-içə, digər fərdi yaşayış evlərinə, sosial tikililərə təhlükə yaratmaqla inşa edilir. Yaşayış binaları arasında bəlli bir məsafənin olması mütləqdir. Ancaq elə binalar var ki, onların arasında məsafə hətta santimetrlə ölçülür.
Yeni tikililərin çoxunda ara məsafəsinin gözlənilməməsi fövqəladə hallar zamanı bir sıra problemlərə səbəb olur. Elə bir neçə gün əvvəl Nərimanov rayonu ərazisindəki çoxmərtəbəli binanın tikintisində qaldırıcı kranın aşması nəticəsində ona bitişik olan digər yaşayış binasında baş verən olay kimi.
Baş vermiş hadisədən sonra binalar arasında 10-15 metr məsafənin olmaması yenidən gündəmə gəldi. Maraqlıdır, bu problemi birdəfəlik həll etmək mümkündürmü?
“Binalar arasındakı məsafə yan-yana binaların hündürlüyünün cəmi qədər olmalıdır”
Əmlak məsələləri üzrə ekspert Nüsrət İbrahimov bildirdi ki, binalar şəhərsalma qaydasına uyğun tikilməlidir. Binalar arasındakı məsafə yan-yana binaların hündürlüyünün cəmi qədər olmalıdır: “O ərazidə hər hansı xoşagəlməz hadisə ətraf ərazi üçün təhlükə mənbəyi olmamalıdır. Yəni burada partlayış, qaldırıcı qurğuların aşması, nəqliyyat vasitəsinin əyləcinin tutmaması, yaxud da tikinti obyektinin özündə uçuntu baş verə bilər. Bunlar tək tikinti obyektində yox, həmçinin də ətraf ərazi üçün potensial təhlükə olmamalıdır. Bunun üçün geniş tikinti ərazisi olmalıdır. O layihənin hazırlanması və əraziyə otuzdurulması elə aparılmalıdır ki, bütün təhlükəsizlik qaydalarına, müvafiq standartlara cavab versin. Memarlar deyirlər ki, binalar o qədər bir-birinə yaxın tikilib ki, sabah hansısa yanğın hadisəsi və digər fövqəladə hal baş versə, müdaxilə etmək imkanı olmayacaq. Hadisə baş verən əraziyə daxil ola bilməmək və vaxt itkisi digər binaların da zərər görməsinə səbəb olacaq”.
Qeyd edək ki, yalnız sahibkarlıq fəaliyyətinin həyata keçirilməsi üçün nəzərdə tutulmuş ərazilərdə və sənaye ərazilərində ara məsafəsi divar hündürlüyünün 0,25 hissəsi qədər nəzərdə tutulub. Binanın yanında başqa bir bina tikilirsə, həmin binanın da bu binaya münasibətdə ara məsafəsi olmalıdır. Bu iki obyekt arasında ümumi ara məsafəsi divar hündürlüyünün 1,2 hissəsi qədər edir. Məsələn, 10 metr hündürlüyü olan bir obyekt tikilirsə, bir binanın torpaq sahəsinin ara məsafəsi 6 metr olmalıdır. Cəm halında götürsək, bu iki obyektin arasında ara məsafəsi 12 metr olmalıdır.
Ara məsafənin gözlənilməsi havanın hərəkəti, gün işığının düşməsi, sağlam həyat şəraiti üçün də vacibdir. Bir-birinə çox yaxın tikilmiş çoxmərtəbəli binalarda mənzillərə nəinki günəş işığı düşmür, eyni zamanda, havanın hərəkətinin də qarşısı alınır.
Günel CƏLİLOVA
