04/04/2020 22:57
728 x 90

İcra başçıları korpusunda kökündən yenilənmə vaxtı çatıb - rüşvət və seçkiyə müdaxilə faktlarını adi iş normasına çeviriblər

img

Fevralın 20-si, günün ikinci yarısında məlumat yayıldı ki, Dövlət Təhlükəsizliyi Xidmətinin əməkdaşları Neftçala Rayon İcra Hakimiyyətinin inzibati binasında əməliyyat həyata keçirirlər. Sonra xəbər yayıldı ki, aparılan əməliyyat nəticəsində rayonun icra başçısı və bir sıra digər vəzifəli şəxslər həbs ediliblər. Hələlik kimlərin konkret olaraq həbs edilməsilə bağlı rəsmi məlumat verilmir, ancaq fevralın 20-də Neftçala İcra Hakimiyyətinin başçısı İsmayıl Vəliyevin  vəzifəsindən azad edilməsi ilə bağlı Prezident İlham Əliyevin sərəncamı olub.

Bundan əvvəl DTX Neftçala Rayon İcra Hakimiyyətində vəzifəli şəxsləri şübhəli şəxs qismində həbs etməsi barədə məlumat yayıb. DTX-nın açıqlamasından bəlli olur ki, İcra Hakimiyyətinin vəzifəli şəxslərinin səlahiyyətlərindən qulluq mənafeyinə qəsdən zidd olaraq istifadə etməsi ilə bağlı cinayət işi başladılıb. Məlumata görə, vəzifəli şəxslərin hərəkətləri vətəndaşların hüquqlarına, cəmiyyətin və dövlətin qanunla qorunan mənafelərinə mühüm zərər vurub.

Onların çoxsaylı cinayət əməllərinə yol verdikləri bildirilir. Qurum kompleks əməliyyat-istintaq tədbirlərini həyata keçirdiyini açıqlayıb.

Vəzifəsindən azad edilən və həbs olunduğuna dair məlumatlar gəzən İsmayıl Vəliyev kimdir?

61 yaşlı İsmayıl Vəliyev 2011-ci ildə Neftçala Rayon İcra Hakimiyyətinin başçısı təyin olunub.

O bundan əvvəl 6 il müddətində Qobustan Rayon İcra Hakimiyyətinin başçısı olub.

2005-ci ilin yayında üç ay "Petrogeoaz" MMC-nin baş direktoru vəzifəsində işləyib. Onun karyerasının 10 ili gömrük orqanlarında keçib.

Elə həmin gün yayılan digər rəsmi məlumata görə, Bərdə İdarəetmə və Texnologiya Kollecinin direktorunun qanunsuz hərəkətləri barədə daxil olmuş məlumatlar əsasında Təhsil Nazirliyinin əməkdaşlarının iştirakı ilə Baş prokuror yanında Korrupsiyaya qarşı Mübarizə Baş İdarəsi tərəfindən təxirəsalınmaz əməliyyat-axtarış tədbirləri həyata keçirilib. Verilən məlumata görə, bu tədbirlərlə Bərdə İdarəetmə və Texnologiya Kollecinin direktoru Xaləddin Ələkbərovun kollecin direktor müavini İlqar Dursunovun vasitəsilə tələbələrin qış imtahan sessiyasından müvəffəqiyyətlə keçməsi, dərslərdə iştirak etməyənlərin davamiyyətinin nizama salınması, tələbələrin aylıq pul müqabilində dərslərdən buraxılması, digər təhsil müəssisələrindən köçürülməsi və sair hallarla bağlı kütləvi şəkildə rüşvət almasına əsaslı şübhələr müəyyən edilib.

Faktla bağlı Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 311.3.1 və 311.3.2-ci (Rüşvət alma, qabaqcadan əlbir olan bir qrup şəxs tərəfindən və təkrar törədildikdə) maddələri ilə cinayət işi başlanıb.

Cinayət işi üzrə hərtərəfli, tam və obyektiv istintaq aparılmasını təmin etmək məqsədilə Bərdə İdarəetmə və Texnologiya Kollecinin direktoru Xaləddin Ələkbərovun və direktor müavini İlqar Dursunovun xidməti otaqlarında məhkəmə qərarı ilə axtarış aparılıb, kollecin tələbələrinə məxsus tələbə biletləri və diplomlar, tələbələrdən alınmış müxtəlif məbləğlərdə pul vəsaitlərinə dair qeydlər və iş üzrə digər əhəmiyyətli sənəd və əşyalar aşkar edilərək götürülüb. İstintaq zamanı toplanmış ilkin sübutlarla Xaləddin Ələkbərovun və İlqar Dursunovun qeyd edilən qanunsuz hərəkətləri törətməsinə əsaslı şübhələr müəyyən edildiyindən, onlar şübhəli şəxs qismində tutulub.

Bütün bu faktlar bir daha sübut edir ki, ölkədə aparılan islahatlarla barışmayan bəzi vəzifəli şəxslər öz çirkin əməllərini davam etdirməkdə maraqlıdırlar. Xüsusilə də Prezidentin yerlərə təyin etdiyi köhnə zehniyyətin daşıyıcısı olan bəzi icra başçılarının özlərindən əvvəlki hadisələrdən düzgün nəticə çıxarmadıqları məlum olur. Qeyd edək ki, bir müddət əvvəl Ağstafanın icra başçısı və müavini vəzifə başındaca həbs ediliblər. Biz ölkədə keçirilən növbədənkənar parlament seçkiləri zamanı da bəzi icra başçılarının seçkiyə kobud müdaxilələrinin şahidi olduq. Bütün bu əməllər də özlkəmizdə keçirilən demokratik seçkilərin ümumi ruhuna zidd olaraq, proses barədə mənfi rəyin yaranmasına səbəb olurdu. Rüşvət və seçkiyə müdaxilə kimi neqativ faktları özlərinin iş normasına çevirmiş icra başçıları korpusunu kökündən yeniləmə zərurəti varmı?

  • İlqar Hüseynli: “Təklif edərdim ki, parlamenti buraxdıqları kimi, cənab Prezident icra başçılarının bütün korpusunu buraxıb, həmin vəzifələrə korrupsiyadan tam uzaq olan şəxsləri təyin etsin”

Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, bu mövzu dəfələrlə bizim qəzet vasitəsilə müzakirə edilib: “Sizə dərin təşəkkür edirəm ki, belə mövzuları daim diqqətdə saxlayırsınız. Yadınızdadırsa, biz sizinlə hələ icra başçılarının həbsindən əvvəl bu sahə ilə bağlı həyəcan təbili çalmışdıq. Sonra Ağstafanın icra başçısı və Yevlaxın sabiq icra başçısı həbs edildi. İndi də Neftçalaya rəhbərlik edən şəxsin həbs edildiyi söylənir. Baş vermiş hadisə yenidən bu mövzunu gündəmə gətirmiş oldu. Sosial şəbəkələrdəki reaksiyalara fikir verin. Demək olar ki, bütün rayonlardan çağırış edilir ki, DTX onların da rayonuna təşrif buyursun. Bir sözlə, belə mənzərə yaranır ki, uzun illər kresloda oturan icra başçılarının hər biri eyni metodla işləyib, bənzər problemlər yaradıblar. Uzun müddət icra başçısı işləyən hansı birini araşdırsan, onun külli miqdarda var-dövləti, qeyri-leqal biznesi üzə çıxacaq. Eyni zamanda, dövlət büdcəsindən, Prezidentin Ehtiyat Fondundan ayrılan vəsaitlərin amansızcasına talandığının şahidi olacağıq. Monitorinq etsək görəcəyik ki, bir çox adı hallanmayan rayonda da işsizliyə görə verilən sosial kartların böyük əksəriyyəti icra başçılarının qohumlarının cibindədir. Təəssüflər olsun ki, seçki prosesində də biz icra başçılarının seçkiyə kobud müdaxiləsini gördük. Bunların hamısı da özfəaliyyət idi. Nəticədə bütün prosesi gözdən salırdılar. Bütün bu neqativlikləri ayrı-ayrı icra başçıları ilə bağlı görülən sərt tədbirlərlə aradan qaldırmaq mümkün olmayacaq. Mən təklif edərdim ki, parlamenti buraxdıqları kimi, cənab Prezident icra başçılarının bütün korpusunu buraxıb, həmin vəzifələrə korrupsiyadan tam uzaq olan şəxsləri təyin etsin. Onda biz fəqri görəcəyik”.

Məhəmmədəli QƏRİBLİ

Son xəbərlər