“2020-ci il İtaliyada “Azərbaycan ili” elan olunub”. Bunu İtaliya Respublikasının Prezidenti Sercio Mattarella geniş tərkibdə görüşdən sonra Prezident İlham Əliyevlə mətbuata bəyanatlarla çıxış edərkən deyib.
İtaliya Prezidentinin sözlərinə görə, ölkəsi Azərbaycanla Avropa İttifaqı arasında əlaqələrə hər zaman dəstək olmağa hazırdır: “Mən artıq cənab Prezidentə bu barədə bildirdim ki, 2020-ci il İtaliyada “Azərbaycan ili” elan olunub. Bu, bizim əlaqələrimizi, dostluğumuzu, əməkdaşlığımızı artırmağa kömək edəcək və iki ölkə arasında münasibətləri daha da intensivləşdirəcək”.
S.Mattarella onu da bildirib ki, İtaliya Avropa İttifaqı və Azərbaycan arasındakı əlaqələrə stimul olmaq üçün bu sahədə də çox geniş formada əməkdaşlıq etməyə hazırdır: “İtaliya Azərbaycanı, həmçinin, Avroatlantik Tərəfdaşlıq üzrə də ən əsas tərəfdaş kimi görür. Əfqanıstanda terrorizmə qarşı mübarizədə və gördüyünüz kimi, hər bir sahədə bizim ölkələrimiz arasında əməkdaşlıq çox yüksək səviyyədədir. Azərbaycan hər zaman bu əməkdaşlıqda İtaliyanın dostluğuna və dəstəyinə əmin ola bilər”.
İtaliya böyük iqtisadiyyata və mədəniyyətə malik aparıcı dövlətlərdən biridir. Həmçinin, bu ölkə Azərbaycanla əlaqələrə xüsusi önəm verir. Bu baxımdan İtaliyada “Azərbaycan ili”nin elan olunmasından ölkəmiz nə qazanacaq?
“Söhbət bir sıra sferalardan gedir”
Məsələyə münasibət bildirən Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, tarix elmləri doktoru Vaqif Abışovun sözlərinə görə, ölkəmizin təbliği baxımından bunun əhəmiyyəti böyükdür: “Hesab edirəm ki, İtaliyada “Azərbaycan ili” elan olunması ölkəmizin daha çox təbliğ olunmasında mühüm önəm daşıyacaq. Çünki Azərbaycan torpaqlarının 20 faizi ermənilər tərəfindən işğal olunub. Ermənilər haqsız olduğu halda, özlərini haqlı çıxarmağa çalışırlar. Azərbaycan da öz haqlarını dünya miqyasında qorumağa çalışır. Orada “Azərbaycan ili” elan edilməsi İtaliyada həm dövlət, həm də xalq səviyyəsində ölkəmizin daha yaxından tanınması üçün əlverişli şərait yaradacaq. Nəzərə almaq lazımdır ki, erməni lobbisi İtaliyada ciddi əlaqələrə malikdir. Hesab edirəm ki, Azərbaycan bu minvalla qarşı tərəfin bizə yönəlik apardığı siyasəti neytrallaşdıracaq. Azərbaycan erməni lobbisinə qarşı ideoloji baxımdan silah əldə edəcək. Bütün hallarda, bu, Azərbaycanın İtaliyada təbliğ olunması üçün geniş imkanlar yaradacaq. Söhbət bir sıra sferalardan gedir. Ölkəmizin turizmi, mədəniyyəti, mətbəxi və digər sahələr İtaliyada təbliğ olunacaq. İtaliyada Azərbaycanı daha yaxından tanımaqla bağlı yeni imkanlar yaranacaq. O baxımdan bu, ölkəmizə ancaq müsbət fayda gətirəcək. Bu baxımdan hesab edirəm ki, bunun ölkəmiz üçün əhəmiyyəti böyükdür”.
Vidadi ORDAHALLI
