04/04/2020 23:31
728 x 90

Azərbaycan - İtaliya strateji əməkdaşlıq bəyannaməsi iki ölkənin münasibətlərini yeni mərhələyə çıxaracaq

img

Məlum olduğu kimi, fevralın 20-də Azərbaycan Respublikasının Prezidenti İlham Əliyev ilə İtaliya Respublikası Nazirlər Şurasının Sədri Cüzeppe Kontenin geniş tərkibdə görüşü başa çatandan sonra Azərbaycan-İtaliya sənədlərinin mübadiləsi mərasimi olub.

Azərbaycan Prezidentinin Mətbuat Xidmətindən verilən məlumata görə, Prezident İlham Əliyev və İtaliya Nazirlər Şurasının Sədri Cüzeppe Konte “Azərbaycan Respublikası ilə İtaliya Respublikası arasında Çoxölçülü Strateji Tərəfdaşlığın gücləndirilməsinə dair Birgə Bəyannamə”ni mübadilə ediblər.

Eyni zamanda, bir sıra digər sahələr üzrə də tərəflər arasında mühüm razılaşmalar əldə olunub. Tərəflər arasında imzalanan Çoxölçülü Strateji Tərəfdaşlığın gücləndirilməsinə dair Birgə Bəyannamənin əhəmiyyətini necə dəyərləndirə bilərik?

  • Rauf Zeyni: “İmzalanan yeni sənəd bütün sahələr üzrə iki ölkə arasındakı münasibətlərin inkişafına təkan verəcək”

Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, görüş zamanı imzalanan Azərbaycan və İtaliya arasında strateji tərəfdaşlığın inkişafı və gücləndirilməsi üzrə Birgə Bəyannamə qarşıdakı uzun illər ərzində iki ölkə arasında sıx əməkdaşlığı müəyyən edən vacib siyasi sənəddir: “Bu sənəd ölkələr arasında strateji tərəfdaşlığın gələcək istiqamətlərini müəyyən edir, ikitərəfli münasibətlərin yeni mərhələyə qədəm qoyduğunu göstərir.

Bir sözlə, cənab Prezidentin səfəri və səfər çərçivəsində imzalanan sənədlər Azərbaycanın İtaliya vasitəsilə Avropaya hərtərəfli inteqrasiyasını asanlaşdıracaq. Bu gün İtaliya dünyanın yeddi böyük ölkəsindən biridir və dünya siyasətində, iqtisadiyyatında çəkisi olan ölkədir. İtaliya Azərbaycanın mühüm ticarət ortaqlarından biridir. Hesab edirəm ki, Prezident İlham Əliyevin bu səfəri və səfər zamanı imzalanan strateji əməkdaşlıq bəyannaməsi ölkələrimiz arasında münasibətlərə yeni dinamizm verəcək.

Azərbaycan Respublikasının dünyanın ayrı-ayrı dövlətləri ilə qurduğu ikitərəfli əlaqələr, mehriban dostluq və əməkdaşlıq münasibətləri ildən-ilə genişlənərək məzmunca yeni keyfiyyət mərhələsinə qədəm qoyur. Bu zaman diqqətçəkən əsas reallıq odur ki, Azərbaycanın Cənubi Qafqazın lider dövləti olması bütün dünyada etiraf edilir. Azərbaycanla İtaliya arasındakı yüksək siyasi dialoq həm indi, həm də gələcək illərdə əlaqələrin daha da şaxələnməsinə, beynəlxalq əhəmiyyətli məsələlərdə səmimi tərəfdaşlığa xidmət edəcək.

Azərbaycan və İtaliya arasında siyasi sahədə olduğu kimi, iqtisadi əməkdaşlıq da uğurla davam edir. Hazırda İtaliya ölkəmizin əsas ticarət tərəfdaşlarından biridir. Şübhəsiz ki, ikitərəfli əlaqələrin inkişafında qarşılıqlı rəsmi səfərlərin əhəmiyyəti mühüm önəm daşıyır. Müstəqillik illərində tərəflərin qarşılıqlı olaraq bir-birinə əhəmiyyətli həcmdə investisiya yatırması əlaqələrin etibarlığı və möhkəmliyindən xəbər verir.

İtaliya ilə Azərbaycan arasında iqtisadi əlaqələr əsasən neft-qaz, qeyri-neft sektoru, sənaye sahələrini əhatə edir. İqtisadi sahədə əlaqələrin genişləndirilməsi üçün hər iki ölkə böyük potensiala malikdir. Enerji, kənd təsərrüfatı, sənaye, ticarət, investisiya, nəqliyyat, ekologiya və s. sahələrdə əməkdaşlığın inkişafı üçün geniş imkanlar mövcuddur. İmzalanan yeni sənəd bütün sahələr üzrə iki ölkə arasındakı münasibətlərin inkişafına təkan verəcək”.

Məhəmmədəli QƏRİBLİ

Son xəbərlər