Paşinyan Münhen iflasından sonra daha da aqressivləşdi - Azərbaycana torpaq güzəşti olmayacaq
Ermənistanın Baş naziri Nikol Paşinyan Qarabağa dair növbəti avantürist bəyanatla çıxış edərək faktiki olaraq danışıqlar prosesini pozub. Erməni KİV-inin verdiyi məlumata görə, Paşinyan Ermənistanın İctimai Televiziyasına müsahibəsində işğal edilmiş ərazilərin Azərbaycana qaytarılmasını istisna edib.
Paşinyan birmənalı şəkildə deyib ki, işğal edilmiş ərazilərin qaytarılması barədə Azərbaycanla danışıqlar aparmaqdan imtina edir və “Bu haqda söhbət belə gedə bilməz”, - deyə o bildirib. Onun sözlərinə görə, Azərbaycanla ancaq Dağlıq Qarabağdakı rejimin “təhlükəsizliyi məsələsi” üzrə danışıqlar apara bilər. “Ərazilər məsələsi yoxdur, təhlükəsizlik məsələsi var”, - o əlavə edib. Paşinyan artıq neçənci dəfədir müxtəlif formalarda avantürist bəyanatlar verərək danışıqlar prosesini pozur, faktiki olaraq, danışıqların davamını istisna edir. Hansı ki, Dağlıq Qarabağ ətrafındakı işğal edilmiş rayonların qaytarılması danışıqlar prosesinin bütün dövrlərində və mərhələlərində müzakirə edilib. Bu məsələ hətta Ermənistan üçün ən sərfəli nizamlanma variantlarında belə başlıca element kimi əksini tapıb. O cümlədən, “Madrid prinsipləri” ətraf rayonların qaytarılmasına və Dağlıq Qarabağın yekun statusunun referendumla müəyyən edilməsinə əsaslanır.
Görünən budur ki, Paşinyan Dağlıq Qarabağ münaqişəsinin “mərhələli həll” planını qəbul etməyəcək. O, Dağlıq Qarabağ ətrafındakı ərazilərdən danışarkən “Qarabağ klanı”nın yanaşmasını təkrarlayır: “Dağlıq Qarabağ ətrafındakı rayonların nəzarət altında saxlanması bölgədə yaşayan ermənilərin təhlükəsizliyi baxımından vacibdir. Təhlükə Dağlıq Qarabağdan uzaq olmalıdır”. Başqa sözlə, Paşinyan demək istəyir ki, rəsmi Bakı onları “qane edən” təkliflər hazırlamayınca, Dağlıq Qarabağ ətrafındakı rayonları boşaltmayacaqlar. “Qane edən” təkliflər dedikdə isə, böyük ehtimalla, Dağlıq Qarabağın statusunun bəri başdan müəyyənləşdirilməsini və bölgədə separatçılarla Azərbaycan Ordusu arasında sülhməramlı qüvvələrin yerləşdirilməsini nəzərdə tutur.
- Akif Nağı: “Razılaşmadığı təqdirdə biz müharibə variantını gündəmə gətirməliyik”
Paşinyanın son avantürist bəyanatı ilə bağlı fikirlərini “Bakı-Xəbər”ə şərh edən Qarabağ Azadlıq Təşkilatının sədri Akif Nağının sözlərinə görə, bütün bunlar Ermənistandakı vəziyyətin gərginliyindən xəbər verir: “Həm inqilabdan əvvəl verdiyi sözləri həyata keçirə bilmir, həm də Dağlıq Qarabağ problemində heç bir irəliləyişə imza atmır. Bütün bu amillər Paşinyanla bağlı bir yalançı, yalnız populist çıxışları etməyi bacaran, əslində isə əlindən heç bir iş gəlməyən siyasətçi obrazını formalaşdırıb. Bütün bu daxili basqılar onu özündən çıxarır. Digər tərəfdən isə artıq müəyyən beynəlxalq qüvvələr də məsələyə, az da olsa, obyektiv yanaşmağa başlayıblar. ATƏT-in Minsk Qrupu həmsədrləri də bəyan edirlər ki, münaqişənin həlli Azərbaycanın ərazi bütövlüyü çərçivəsində mümkündür. Azərbaycanın da bununla bağlı mövqeyi konkretdir və bəllidir. Başqa cür də ola bilməz. Paşinyanın çıxışlarında heç bir ardıcıllıq yoxdur. Diletantlığını onunla təsdiqləyir ki, hər auditoriya üçün fərqli mövqe sərgiləyir. Mən erməni KİV-ini də yaxından izləyirəm. Onlar məhz sabit olmayan mövqeyinə görə Paşinyanı yaylım atəşinə tuturlar. Artıq Ermənistan mediası da yazır ki, Paşinyanın siyasəti tam iflasa uğrayıb. Bütün biabırçılıqdan və reytinqinin sürətlə aşağı düşməsindən yaxa qurtarmaq üçün Paşinyan ictimai rəyi kökləməyə çalışır və nəticədə onun belə açıqlamaları meydana gəlir. Münhen konfransının gedişində də nəsə deyə bilmədi. Orada da təhlükəsizlik məsələsini qabartdı. Bu da uğursuz yanaşmadır. Çünki biz dəfələrlə bəyan etmişik ki, Dağlıq Qarabağın erməni əhalisinin təhlükəsizliyinə tam təminat veririk. Təhlükəsizliyi təmin ediriksə, onda Paşinyanın bu bəhanəsi də öz qüvvəsini itirmiş olur. Ortada olan mənzərə budur ki, artıq Paşinyan Azərbaycanla danışıqları aparmaq iqtidarında deyil. Azərbaycan öz təzyiqlərini bir qədər də artırmalıdır. Bundan sonra Paşinyan bizimlə razılaşmağa məcbur olacaq. Razılaşmadığı təqdirdə biz müharibə variantını gündəmə gətirməliyik. Buna biz tam hazırıq”.
Məhəmmədəli QƏRİBLİ
