“Ermənistan-Azərbaycan Dağlıq Qarabağ münaqişəsinin həlli ilə bağlı, cənab Prezident dediyi kimi, biz məsələni müzakirə etdik”. Bunu geniş tərkibdə görüşdən sonra Prezident İlham Əliyev İtaliya Respublikasının Prezidenti Sercio Mattarella ilə mətbuata bəyanatlarla çıxış edən zaman deyib.
Ölkə başçısının sözlərinə görə, bu məsələnin həlli yolları imzalanmış Birgə Bəyannamədə də göstərilir: “Orada göstərilir ki, İtaliya və Azərbaycan bir-birinin ərazi bütövlüyünə, suverenliyinə, sərhədlərin toxunulmazlığına hörmətlə yanaşır və bunu dəstəkləyir. Eyni zamanda, Ermənistan-Azərbaycan Dağlıq Qarabağ münaqişəsinin məhz bu prinsiplər əsasında, Helsinki Yekun Aktı, BMT və ATƏT tərəfindən qəbul edilmiş qətnamə və qərarların əsasında həll olunması göstərilir. Hesab edirəm ki, bu, çox ədalətli və beynəlxalq hüquqa əsaslanmış mövqedir və bu mövqeyə görə biz İtaliya tərəfinə minnətdarıq”.
Prezident onu da qeyd edib ki, Dağlıq Qarabağ Azərbaycandır və bunu tarix, beynəlxalq hüququn norma və prinsipləri göstərir: “Azərbaycanın ərazi bütövlüyü, o cümlədən, Dağlıq Qarabağ daxil olmaq şərtilə, bütün dünya tərəfindən tanınır və qəbul edilir. Ona görə münaqişənin həlli yalnız beynəlxalq hüququn norma və prinsipləri əsasında, Azərbaycanın ərazi bütövlüyü çərçivəsində öz həllini tapmalıdır”.
O da məlumdur ki, İtaliya Avropa İttifaqının aparıçı dövlətlərindən biridir. 1992-ci ildə ATƏT-in Minsk Qrupu yaradılanda onun ilk rəhbəri italiyalı diplomat Mario Rafaello idi. M.Rafaello münaqişənin həlli ilə bağlı fəal siyasət yeritdi. Bununla belə, İtaliya həmişə münaqişənin həllində pozitiv mövqe tutub. Bütün bunları nəzərə alsaq, iki ölkənin yaxınlaşması fonunda Qarabağ münaqişəsinin həllində İtaliyanın iştirakında hansı yenilik və fəallaşmalar gözlənir?
“İmzalanan sənədlər, verilən bir sıra bəyanatlar Qarabağ münaqişəsinin həlli baxımından Azərbaycanın maraqlarına cavab verir”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, İtaliya münaqişənin həllində səylərini artıra bilər. O bunu bir sıra faktorlarla əlaqələndirdi: “Məsələ ondadır ki, İtaliya Avropanın açar dövlətidir. Prezident İlham Əliyevin ölkə rəsmiləri ilə keçirdiyi yüksək səviyyəli görüşlərdən hiss olunurdu ki, İtaliya Azərbaycanla əlaqələrin genişləndirilməsində maraqlıdır. İki ölkə arasında enerji sahəsində əməkdaşlıq genişdir. TAP layihəsi hazır olandan sonra Cənub Qaz Dəhlizi vasitəsilə Azərbaycan qazı İtaliya bazarına çıxarılacaq. Bu özlüyündə müsbət bir amildir. Nəzərə almaq lazımdır ki, iki ölkə arasında 17 sənəd imzalandı. Hesab edirəm ki, bunun özü böyük diplomatik uğurdur. Çünki imzalanan sənədlər çoxşaxəlidir və müxtəlif sahələri əhatə edir. Görün, münasibətlər necə üstün səviyyədədir ki, bu il İtaliyada “Azərbaycan ili” elan edilib. Bütün bunlar İtaliya tərəfindən çox maraqlı, önəmli və Azərbaycanın xeyrinə olan addımlardır. Eyni zamanda, o da bir reallıqdır ki, Azərbaycanla Avropa İttifaqı arasında imzalanacaq saziş baxımından belə bir səfər çox önəmlidir. Düşünürəm ki, imzalanan sənədlər, verilən bir sıra bəyanatlar Qarabağ münaqişəsinin həlli baxımından Azərbaycanın maraqlarına cavab verir. Bu baxımdan hesab edirəm ki, İtaliya münaqişənin həllində səylərini artıra bilər”.
Vidadi ORDAHALLI
