Bu gün cəmiyyətimizdə aktual, diqqətlə izlənən hadisə 9 fevral növbədənkənar parlament seçkilərinin nəticələridir. Seçki prosesi zamanı əminamanlığın, sabitliyin təmin olunmasında Azərbaycan polisinin yaxından iştirakı diqqəti çəkdi.
Başqa ölkələrdə keçirilən seçkilərdən fərqli olaraq, ölkəmizdə keçirilən səsverməyə hər hansı bir qanunsuz polis müdaxiləsi olmayıb. Bu faktı Daxili İşlər Nazirliyi (DİN) də təsdiqləyib. DİN-dən mətbuata bildirilib ki, fevralın 9-da keçirilmiş Azərbaycan Respublikasının Milli Məclisinə növbədənkənar seçkilər zamanı daxili işlər orqanları tərəfindən qanunla müəyyən olunmuş vəzifələrin icrası təmin edilib, təhlükəsizlik və hüquq qaydası etibarlı qorunub. Qeyd edilib ki, saat 19.00-a olan müddətə ictimai asayişin kobud surətdə pozulması, seçki prosesinə polisin qanunsuz müdaxilə etməsi faktı qeydə alınmayıb. “Polis yalnız Seçki Məcəlləsi ilə nəzərdə tutulmuş halda – rəsmi dəvət əsasında seçki məntəqələrinə gəlib asayişi bərpa edib, qanunauyğun tədbirlər görüb”, - DİN-dən bildirilib.
“Bizim polisin nümunəvi davranışı, seçkilərə heç bir qanunsuz müdaxilə etməməsi Avropa polisinin özünə bir nümunə olmalıdır”
“Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə açıqlamasında vurğuladı ki, bu, Azərbaycan polisinin nümunəvi xidmət göstərdiyinin bariz örnəyidir. “Azərbaycan polisinin nəinki seçki prosesində, eyni zamanda, ölkəmizin evsahibliyi ilə keçirilən beynəlxalq tədbirlər zamanı öz vəzifəsini çox yüksək səviyyədə yerinə yetirməsi faktdır. Bizim polisin nümunəvi davranışı, seçkilərə heç bir qanunsuz müdaxilə etməməsi Avropa polisinin özünə bir nümunə olmalıdır. Çünki biz Avropa ölkələrində keçirilən seçkilər zaman polisin seçkiyə qanunsuz müdaxiləsinin şahidi oluruq”.
Azərbaycan polisinin sabitliyin təmin edilməsi sahəsində öz fəaliyyətini, vəzifəsini tam olaraq yerinə yetirdiyini deyən Ş.Əliyev hesab edir ki, polislər DİN rəsmiləri tərəfindən verilən tapşırıqları qüsursuz yerinə yetiriblər: “Bu onu göstərir ki, yuxarı rəhbərlik polisə doğru-dürüst təlimat verib və polis də bu təlimatı lazımi qaydada yerinə yetirib. Azərbaycan polisi bu işin məsuliyyətini öncədən görüb. Bu işin yüksək səviyyədə həyata keçirilməsi üçün onlara tapşırıqlar verilib. Polisin bu işə məsuliyyətlə yanaşmasının digər səbəbləri də var. Bu da seçki prosesini beynəlxalq təşkilatların təmsilçilərinin yaxından izləməsi ilə bağlıdır. Beynəlxalq təşkilatlar da seçki prosesində Azərbaycan polisinin xidmətindən məmnunluq duyublar. Hətta onlar bunu verdikləri açıqlamalarda da qeyd etdilər. Seçkinin heç bir insident baş vermədən həyata keçirilməsi, polisin bu prosesə heç bir qanunsuz müdaxilə etməməsi, insanların heç bir maneə olmadan öz seçki hüquqlarından istifadə etmələri 60 faiz olmasa da, heç olmasa 50 faiz polisin xidmətinin düzgün təşkili ilə bağlıdır. Bu da polisin peşəkarlığından, öz işinə məsuliyyətlə yanaşmasından, içdiyi anda sədaqətindən irəli gəlir. Bunu beynəlxalq müşahidəçilər də qeyd etdilər” - deyə Ş.Əliyev vurğuladı.
İradə SARIYEVA
