Fevralın 9-da Azərbaycanda keçirilən növbədənkənar parlament seçkiləri hələ başa çatmamışdan və seçkinin nəticələri elan edilməmişdən bir neçə saat əvvəl bir sıra deputatlığa namizədlər sosial şəbəkələrdə, xüsusən də “Facebook”da “səsimi oğurladılar”, “seçicilər mənə daha çox səs vermişdi”, “saxtalaşdırma baş verdi” kimi bəyanatlarla çıxış etməyə başladılar. Müşahidələr isə onların iddialarının əsassız olduğunu ortaya qoydu.
Belə rəylər səsləndirildi ki, sosial şəbəkələrdə ən çox səs-küy salanlar seçicilər tərəfindən az səs qazananlardır. Hətta onların arasında 15-20, 30-50, 100 və 150 səs alanlar da var. Seçicinin yekdil səsini qazana bilməyən bəzi deputatlığa namizədlərin belə hay-küy salmaları ekspertlər tərəfindən normal qəbul edilmir. Onlar bildirirlər ki, səsvermə başa çatmadan və seçkinin nəticələri elan olunmadan bəzi namizədlərin özlərini bu cür bəyanatlarla sığortalamasının özü anormal haldır.
“Qalib gələn rəqibi təbrik etməyin özü bir siyasi mədəniyyətdir, amma bizdə təəssüf ki, bu mədəniyyət hələ tam formalaşmayıb”
“Səs” qəzetinin və eyniadlı informasiya agentliyinin rəhbəri Bəhruz Quliyev hesab edir ki, bəzi namizədlərin sosial şəbəkələrdə bu cür çıxış etməsi təbiidir. Onun sözlərinə görə, hər namizəd böyük siyasi mədəniyyətə malik olmadığı üçün mövcud hallar baş verir. Azərbaycanda parlament seçkilərinin şəffaf, demokratik və ədalətli keçirildiyini deyən B.Quliyevin bildirdiyinə görə, bu faktı beynəlxalq qurumların keçirdiyi exit-pollar da təsdiqləyib: “Əvvəlcə onu deyim ki, bu seçki zamanı Azərbaycan xalqı bir daha öz iradəsini ortaya qoydu və ölkəmizdə demokratik şəkildə parlament seçkisinin keçirilməsinə nail oldu. Bu, xalqın qələbəsidir və hesab edirəm ki, Azərbaycan xalqı indi də, keçən dövrlərdə də öz taleyini özü həll edib. Azərbaycan xalqı müdrik xalqdır və lazım gələndə öz qərarını verir və taleyini özü həll edə bilir. Digər tərəfdən də seçkini izləyən beynəlxalq müşahidəçilər, exit-poll keçirən müxtəlif təşkilatlar Azərbaycanda seçkinin demokratik standartlarla keçirildiyini bəyan etdilər. Beynəlxalq təşkilatların rəyi onu göstərdi ki, Azərbaycanda şəffaf, ədalətli seçki keçirildi, vətəndaşlar istədikləri namizədə səs verib seçdilər. Narazılıqlara gəldikdə isə, namizədlərin seçkinin nəticələrindən narazı qalması təbiidir. Seçkiyə qatılan namizədlərin sayının çoxluğu seçkiyə nə qədər marağın olduğunu göstərir. Bir yerə qarşı təxminən 10 nəfər mübarizə aparırdı. Namizədlər arasından 125 nəfər seçildikdən sonra geridə qalan təxminən min nəfər namizədin isə narazı qalması təbiidir. Ümumiyyətlə, seçkidə, hanısa bir rəqabətdə uduzan şəxslər özlərindən güclü rəqibin əlini sıxıb onu təbrik etmək və rəqibinin daha güclü olduğunu etiraf etmək istəmirlər. Qalib gələn rəqibi təbrik etməyin özü bir siyasi mədəniyyətdir, amma bizdə təəssüf ki, bu mədəniyyət hələ tam formalaşmayıb. Seçkidə uduzan, məğlub olan şəxs ya qarşı tərəfi ittiham edir, ya da başqa xoşagəlməz fikirlər səsləndirir. Bunu təbii də qəbul etmək lazımdır. Əsl siyasət adamları, siyasi prosesləri dərindən analiz edib qiymətləndirməyi bacaran insanlar yaxşı bilirlər ki, hər bu cür hal hansısa namizədin narazılığına səbəb ola bilər. Təcrübədə bu var. Ona görə də namizədlərin bu şəkildə narazılıqları gözlənilən idi”.
B.Quliyev qeyd etdi ki, seçilməyən namizədlərin narazılıqlarına baxmayaraq, Azərbaycan dövləti modern şəkildə, sivil və demokratik standartlara cavab verən seçki təşkil etdi, MSK da seçkinin keçirilməsinə məsul olan bir qurum kimi bu prosesi uğurla təmin etdi.
İradə SARIYEVA
