Elşən Əliyev: “Doğrudan da Paşinyanın işlətdiyi fikirlərlə Merkelin fikirləri arasında kəskin ziddiyyət var”
Avqustun 25-də Almaniya Kansleri Angela Merkel Azərbaycan Prezidenti İlham Əliyevlə keçirilən birgə mətbuat konfransında deyib ki, Azərbaycan Avropa İttifaqının enerji şaxələndirilməsində də güclü bir amildir və “Cənub Qaz Dəhlizi”nin açılması Avropanın enerji təminatında böyük rol oynayacaq:
"Biz Azərbaycanda Bakı-Tbilisi-Qars dəmir yolunun açılmasını yüksək qiymətləndiririk. Bu, Avropa ilə ticarət əlaqələrini genişləndirəcək, mübadilə aparılmasını yaxşılaşdıracaq. Bizim ikitərəfli münasibətlərimiz onunla xarakterizə olunur ki, bu regionda Azərbaycanın simasında ən böyük, ən vacib ticarət tərəfdaşımız var. Azərbaycanda xarici ticarət palatamız var, burada 150 alman müəssisəsi fəaliyyət göstərir. Azərbaycan da, öz növbəsində, iqtisadiyyatın şaxələndirilməsinin həyata keçirilməsində maraqlıdır və Almaniya bu sahədə öz ciddi töhfəsini verə bilər. Bu gün birgə biznes forumu da buna xidmət edəcək və orada detallar barədə danışacağıq”.
Qeyd edək ki, Merkelin Azərbaycanı regionda ən böyük, ən vacib ticarət tərəfdaşı sayması Ermənistan baş nazirinin kanslerlə görüşdə işlətdiyi fikirləri büst-bütün alt-üst edir. Çünki Paşinyan bildirmişdi ki, Almaniya Ermənistanın dünyada 3-cü, Avropada isə 1-ci ticarət tərəfdaşıdır. Bununla Merkel Paşinyanın səsləndirdiyi fikirləri alt-üst etmiş oldumu?
İqtisadçı Elşən Əliyevin sözlərinə görə, Paşinyan, görünür, hələ də meydan ab-havasından çıxa bilmir: “Doğrudan da Paşinyanın işlətdiyi fikirlərlə Merkelin fikirləri arsında kəskin ziddiyyət var. Paşinyan deyəndə ki, Almaniya onların Avropada birinci ticarət portnyorudur, onda belə çıxır ki, biz onlardan sonra gəlməliyik. Merkel isə Azərbaycanı ən vacib tərəfdaş saydığını bəyan etdi. Bilirsiniz ki, Ermənistan iqtisadiyyatı dağılmış vəziyyətdədir. Ermənistanın özü dilənçi kökündə yaşayırsa, dünyanın güclü iqtisadiyyata malik olan ölkəsinin necə geniş ticarət partnyoruna çevrilə bilər? Bunun ağ yalan olduğunu kansler Azərbaycana ifadə etdiyi önəm notları ilə alt-üst etdi. Azərbaycanla Almaniya arasında əməkdaşlığın genişləndirilməsində qarşılıqlı səfərlər, xüsusilə də dövlət başçılarının səfərləri əhəmiyyətli rol oynayır. İlin əvvəlinə olan məlumata görə, ölkələrimiz arasında 70-ə yaxın sənəd, o cümlədən iqtisadi sahədə investisiyaların təşviqi və qorunması, ikiqat vergitutma haqqında sənədlər imzalanıb. Ticarət dövriyyəsinin həcminə görə Azərbaycanın ticarət tərəfdaşları arasında Almaniya ön yerdə durur. Azərbaycanın Mərkəzi Avropa üzrə ticarət nümayəndəliyi, həmçinin, Almaniyanı əhatə edir. Bu nümayəndəlik Almaniya ilə ticarət əlaqələrinin inkişafında önəmli rol oynayır. Hazırda Azərbaycanda 200-dən çox alman şirkəti fəaliyyət göstərir. Almaniya tərəfindən əsas kapitala 555,8 mln. ABŞ dolları həcmində investisiya qoyulub. Hər iki ölkənin işgüzar dairələrinin iştirakı ilə indiyədək çoxsaylı biznes forum və işgüzar görüşlər keçirilib, Azərbaycan ötən il Almaniyada keçirilmiş müxtəlif sərgilərdə iştirak edib, Berlində Transxəzər Şərq-Qərb ticarət və tranzit dəhlizinin təşviqinə həsr olunmuş forum keçirilib. 2009-2017-ci illərdə 338 sahibkar və gənc menecer Almaniyada ixtisasartırma kursu keçib. Bundan başqa, Sumqayıt Kimya Sənaye Parkında Almaniya təcrübəsi əsasında sənaye sahəsində Peşə Tədris Mərkəzi yaradılır.
Bizim Almaniya ilə əczaçılıq, maşınqayırma, elektrotexniki avadanlıqların və kənd təsərrüfatı texnikasının birgə istehsalı, neft-kimya, nəqliyyat və tranzit yükdaşımaları sahələrində əməkdaşlıq imkanları genişdir. Son illər ərzində Azərbaycanda yaradılmış nəqliyyat infrastrukturu bu əlaqələrin möhkəmlənməsi və dərinləşməsinə böyük dəstək verir. Bakı Beynəlxalq Dəniz Ticarət Limanı, Bakı-Tiflis-Qars dəmir yolu, “Şimal-Cənub” nəqliyyat dəhlizi, Transxəzər Şərq-Qərb ticarət və tranzit dəhlizini buna misal göstərə bilərik. Almaniya hətta Azərbaycanın işğal altında olan ərazilərində alman şirkətlərinin fəaliyyəti məsələsinə də həssas yanaşır və mümkün qədər bunun qarşısını alır. Təbii ki, eyni sözləri Ermənistan barədə demək iztehza və gülüş doğura bilər. Bununla biz bir daha Paşinyanın səriştəsizliyinin şahidi olduq”.
Məhəmmədəli QƏRİBLİ
