Məhəmməd Əsədullazadə: “Ölkəmizin ərazisi işğala məruz qalıb və ən başlıcası isə etnik separatizmdən əziyyət çəkirik”
Azərbaycan xarici işlər naziri Elmar Məmmədyarov Brüsseldə Yaxın Şərqdə etnik və dini zorakılığın qurbanları mövzusunda keçirilən beynəlxalq konfransda çıxış edib. O sözügedən tədbirdə çıxışı zamanı bir sıra məqamlara toxunub.
E.Məmmədyarovun sözlərinə görə, bu gün qaçqınların və məcburi köçkünlərin vəziyyəti aidiyyəti ölkələrdə ən mürəkkəb və problemli məsələ olmaqda davam edir: “Biz çox sevinirik ki, məcburi köçkünlərin layiqli şəkildə öz evlərinə geri qayıtmasının vacibliyinə dair ortaq anlaşma və dəstək var. Azərbaycan məcburi köçkünlərin problemlərinə dair məlumatlılığı artırmaq üçün bütün səyləri tam dəstəkləyir. Məcburi köçkünlər məsələsinə dair həssaslığımız başadüşüləndir, belə ki, Azərbaycan dünyada adambaşına düşən ən çox sayda məcburi köçkünə sahibdir”.
Nazirin fikrincə, qaçqın böhranının aradan qaldırılmasına töhfə vermək bəhanəsi ilə bəzi gizli maraqlar naminə Yaxın Şərqdən qaçqınların problemlərindən faydalanmaq kimi davamlı cəhdlər olur. Onun sözlərinə görə, Suriyada vəziyyət pisləşdikdən sonra Ermənistan Suriya ermənilərini işğal altında olan Azərbaycan ərazilərinə yerləşməyə təşviq edir: “Müxtəlif hesabatlara əsasən, yüzlərlə Suriya ermənisi Azərbaycanın işğal olunmuş bu ərazilərində yerləşdirilib. Həqiqətən də beynəlxalq ictimaiyyətin diqqəti Suriyadakı böhrandan çıxmağın yollarını axtarmağa yönələrkən, bu ölkənin əhalisinin problemlərinin başqa bir bölgədə sülh səylərini daha da mürəkkəbləşdirmək üçün istifadə olunduğunu bilmək dərindən narahatedicidir. Bu tamamilə qəbuledilməz və yolverilməzdir”.
Bütün bunların fonunda, E.Məmmədyarovun sözügedən tədbirdə iştirakı, çıxış etməsi Azərbaycana nə verəcək? Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Məsələ ondadır ki, dünyada qlobal təhlükəsizlik böhranı dərinləşməkdədir. Bu bir sıra sahələrdə özünü göstərir. Çünki bu gün dünyada etnik, dini zəmində ayrıseçkilik halları, ekstremizm aktual olaraq qalır. Yaxın Şərqdə baş verən müharibə, dini-məzhəb ayrıseçkiliyi, həmçinin, Arakan müsəlmanlarına qarşı soyqırım siyasəti dünyanı təhdid edə biləcək hadisələrdir. Təəssüf ki, bu gün dünyanın mütərəqqi təşkilatları və dövlətləri bu qarşıdurmaların qarşısını almaqda acizdir. Brüsseldə keçirilən konfransın bu problemlərə həsr edilməsi, çıxış yollarının araşdırılması göstərir ki, dünya artıq bu problemlərdən narahatdır. Azərbaycanın belə bir konfransda iştirak etməsinə gəldikdə isə, ölkəmizin ərazisi işğala məruz qalıb və ən başlıcası isə etnik separatizmdən əziyyət çəkirik. Mövcud reallıq ondan ibarətdir ki, bu gün ölkəmizin 20 faiz ərazisi Ermənistan tərəfindən işğal olunub. İşğal olunmuş ərazilərdə yaxın tarixdə Ermənistan azərbaycanlılara qarşı etnik soyqırım cinayətləri həyata keçirib. Ona görə də bu konfransda ölkəmizin iştirakı vacib idi. Çünki bir daha ölkəmizin üzləşdiyi bu problemi dünyanın diqqətinə çatdırmaq üçün sözügedən tribunadan istifadə etmək dövlət maraqlarımıza uyğundur. Qeyd edim ki, Ermənistan sülh deyə-deyə bu gün soyqırım törətməyə hazır olan bir ölkədir. Xarici işlər nazirinin Brüsselə səfəri, orada çıxışı Azərbaycanın informasiya müharibəsində Ermənistan üzərində üstünlük qazanmasını şərtləndirəcək. Hesab edirəm ki, biz ermənilərlə informasiya müharibəsində hər zaman bu kimi imkanlardan maksimum səmərəli istifadə etməliyik. Bütün tribunalarda erməniləri ifşa etməliyik”.
Vidadi ORDAHALLI
