Elşən Həsənov: “Belə ziqzaqlı gedişlərini pərdələmək üçün, Ermənistan məqsədli şəkildə ölkəmizi gündəmə gətirir”
Ölkəmizdə Azərbaycan və Türkiyə Hərbi Hava Qüvvələrinin iştirakı ilə “TurAz Qartalı-2017” birgə taktiki-uçuş təlimləri başlayıb. Müdafiə Nazirliyindən verilən məlumata görə, sentyabrın 30-dək davam edəcək təlimlərdə iki ölkənin Hərbi Hava Qüvvələrinə məxsus MiQ-29, F-16, Su-25, C-130 Herkules, CASA CN-235 təyyarələri və Mi-35, Mi-17, Sikorski S-70 helikopterlərindən ibarət 30-dək aviasiya vasitəsi iştirak edəcək.
Qeyd edək ki, bu arada Rusiya da öz ərazisində son illərin ən böyük hərbi təlimlərinə başlayıb. Təlim Avropa İttifaqının (Aİ) şərq sərhədlərində həyata keçirilir. “Zapad-2017” adlı bu hərbi təlim Rusiyanın qərb, Aİ-nin isə şərq sərhədlərinin kəsişdiyi yerdə - Belarusda baş tutacaq. Bu təlim, həmçinin, Rusiyanın Baltik dənizi sahillərində yerləşən Kalininqrad vilayətinin ərazisini də əhatə edəcək.
NATO Hərbi Komitəsinin rəhbəri Petr Pavel və Rusiya Silahlı Qüvvələrinin Baş Qərargah rəisi Valeri Gerasimov Bakıda Avropa və Yaxın Şərqdə beynəlxalq təhlükəsizlik məsələləri barədə danışıqlar apararkən bu təlimləri müzakirə etmişdilər. Həmin vaxt Gerasimov Pavelə təlimlərin müdafiə xarakterli olduğunu və üçüncü ölkələrə qarşı yönəlmədiyini bildirib.
Təlimlərin 20 sentyabra qədər davam edəcəyi ehtimal olunur.
Moskva hərbi təlimlərdə 12700 əsgərin iştirak edəcəyini deyib, ancaq NATO bu rəqəmlərin daha böyük olacağını ehtimal edir. Hərbi təlimlər “soyuq müharibə”dən bəri Rusiya və NATO arasında vəziyyətin ən gərgin olduğu zamanda həyata keçirilir.
Çox maraqlıdır ki, Ermənistan mətbuatı iki qonşu ölkənin keçirdiyi təlimlərin eyni zamana təsadüf etməsini özünəməxsus tərzdə yozmağa başlayıb. Onlar Azərbaycanı Qərb dairələrinin gözündən salmaq üçün iddia edirlər ki, həmin təlimlər guya Azərbaycanla Rusiya arasındakı koordinasiyalı fəaliyyətə əsasən eyni vaxtda keçirilir.
Ermənistanın bu cür dezinformasiya yaymaqda marağı nə ola bilər?
Ekspert Elşən Həsənovun sözlərinə görə, Ermənistan mətbuatının Azərbaycanla bağlı istənilən məsələdə qərəzli olması təbiidir: “Çünki onlar bu cür mövzularda professionallığın tələblərini arxa plana keçirir və daha çox dövlətlərinin marağından çıxış edirlər. Bilirsiniz ki, Ermənistan bu yaxınlarda NATO hərbi təlimlərilə bağlı ciddi problemlər yaşadı. Əvvəl NATO-nun təlimlərinə qatıldı, sonra isə alyansın təlimlərindən imtina etdi. Çünki sahibi olan Rusiya həmin özfəaliyyətinə görə Ermənistanı bərk danlamış oldu. Müstəqil qərarlar vermək qabiliyyəti və səlahiyyətində olmayan bu tip ölkələr başqalarının addımlarında belə özlərinə xas olan xüsusiyyətləri axtarır. Hesab edirlər ki, onlar kimi Azərbaycan da hansısa ölkənin istəyilə hərəkət etməyə məcburdur. Ancaq tam yanılırlar. Çünki Azərbaycan müstəqil ölkə kimi özü istədiyi qaydada hərəkət edir. İstədiyi zaman, istədiyi ərazidə hərbi təlimlər keçirir. Belə təlimlərin intensiv olmasının səbəbi də bəllidir. Biz ərazisi işğal olunmuş ölkəyik və hər an müharibə başlaya bilər. Ona görə də bizim ordumuz daim hazır olmalıdır. Hansısa təlimin qonşu ölkədə keçirilən analoji tədbirlə üst-üstə düşməsi heç də bu məsələnin razılaşdırıldığına və ya üçüncü tərəfə yönəldiyinə dəlalət edə bilməz. Bilirsiniz ki, Azərbaycan xarici siyasət kursunda balanslı davranışa üstünlük verir. Rusiya ilə bizim aramızda hər hansı hərbi ittifaqda təmsilçiliklə bağlı razılaşma yoxdur. Belə olan təqdirdə, hansısa ölkə ilə razılaşdırılmış hərbi təlim keçmək bizə niyə lazım ola bilər? Bu məsələdə Ermənistan mətbuatı öz yeri ilə bizi səhv salıb. Çünki Rusiya ilə hərbi ittifaqda təmsil olunur. Buna baxmayaraq, NATO-ya da meylləri ortada. Belə ziqzaqlı gedişlərini pərdələmək üçün, Ermənistan məqsədli şəkildə ölkəmizi gündəmə gətirir. Heç bir əsası olmayan şayiədir”.
Məhəmmədəli QƏRİBLİ
