Ramil Hüseynov: “Müsəlman ölkələri prinsip etibarilə Ermənistanla məsafə saxlamalıdır”
“Ermənistan müsəlman ölkələri ilə əlaqə yaratmağa çalışır, amma bu sözlərə inanmamalıyıq”. Məlum olduğu kimi, bu sözləri bir müddət əvvəl Prezident İlham Əliyev İslam Əməkdaşlıq Təşkilatının Astanada keçirilən sammitində deyib.
O, müsəlman ölkələrinə çağırış edərək Ermənistanla əlaqələri kəsməyi təklif edib və bunu tutarlı arqumentlərlə əsaslandırıb: “Ermənistanda islamofobiya pik həddə çatıb. Ermənistan çox çalışır ki, müxtəlif müsəlman ölkələri ilə əlaqələrini genişləndirsin. Müqəddəs yerlərimizi məhv edən Ermənistan müsəlman ölkələrinin dostu ola bilməz. İşğal edilmiş torpaqlarımızda Ermənistan rəhbərliyinin göstərişi ilə bütün məscidlərimiz dağıdılıb. Şuşa, Ağdam və digər şəhərlərimizin dağıdılmış məscidlərinin fotoşəkilləri erməni vandalizminin sənədli sübutudur”.
Çox təəssüflər olsun ki, bəzi müsəlman ölkələri nədənsə bundan ciddi
nəticə çıxarmağa tələsmirlər. Bunun nəticəsidir ki, Ermənistan prezidenti Serj Sarkisyan Türkmənistana işgüzar səfər edib, daha doğrusu dəvət olunub.
Sarkisyanın səfərində məqsəd V Asiya Oyunlarının açılışında iştirak etməkdir. Sarkisyan Türkmənistan prezidenti Qurbanqulu Berdiməhəmmədovla da görüşüb. Bundan əvvəl isə, yəni avqustun 24-də Sarkisyan Türkmənistana rəsmi səfər etmişdi.
Nəzərə alsaq ki, Ermənistan işğalçı dövlət olmaqla yanaşı, iqtisadi baxımdan da cəlbedici ölkə deyil, o baxımdan Sarkisyanın qəbul olunması anlaşılan deyil. Ona görə ki, Ermənistan iqtisadiyyatı bərbad vəziyyətdədir. Başqa bir tərəfdən, Türkmənistan öz zəngin qaz ehtiyatlarını daha alternativ marşrutlarla dünya bazarına çıxarmaq istəyir. Bunun üçün də ən sərfəli yol Xəzərin dibi ilə boru xətti çəkib onu Azərbaycana birləşdirməkdir. Çünki müşahidələr göstərir ki, digər variantlar Türkmənistan üçün iqtisadi baxımdan sərfəli deyil. Belə olan halda, Ermənistan prezidentinin Türkmənistanda təmtəraqla qarşılanması anlaşılan deyil. Eyni zamanda bu, islam həmrəyliyinə ziddir.
Sözügedən məsələ ilə bağlı fikirlərini “Bakı-Xəbər”lə bölüşən VİP-in sədr müavini Ramil Hüseynovun sözlərinə görə, Türkmənistanın dövlət başçısının Sarkisyana göstərdiyi iltifat təəssüf doğurur: “Bütün mənalarda Sarkisyanın müsəlman ölkəsi olan Türkmənistanda məhz indiki məqamda xoş qarşılanması utancverici haldır. Ona görə ki, bir həftə əvvəl İKT-nin Astanada keçirilən görüşündə Ermənistanın işğalçılıq, vandalizm aktları Prezident İlham Əliyev tərəfindən bir daha ifşa edildi. İslam ölkələri bir daha gördülər ki, Ermənistan təkcə Azərbaycan ərazilərini işğal etməklə kifayətlənməyib. Eyni zamanda, oradaki tarixi abidələri, islam dinini təmsil edən məscidləri məhv edərək yer üzündən silib. Bu baxımdan müsəlman ölkələri prinsip etibarilə Ermənistanla məsafə saxlamalıdır. Eyni zamanda, Ermənistanla olan əlaqələrə yenidən baxmalıdırlar. Başqa bir tərəfdən, Ermənistan iqtisadi baxımdan hansısa müsəlman dövlətinə fayda gətirən deyil. Ancaq çox təəssüflər olsun ki, Türkmənistanın timsalında biz bunun əksini gördük. Bu da çox utancverici haldır”.
Vidadi ORDAHALLI
