Məhəmməd Əsədullazadə: “Çünki TBMM üzvü, mənşəcə kim olursa-olsun, ölkə parlamentini təmsil edir”
Yayılan məlumata görə, Türkiyə Böyük Millət Məclisinin üzvü, erməni əsilli deputatı Karo Paylan Ermənistana gedib. Bu, müxalifətçi deputatın Ermənistana ilk səfəridir.
Paylanın səfərdə əsas məqsədi “Ermənistan-Diaspora” 6-cı ümumerməni forumunda iştirak etməkdir. Məlumatda o da qeyd olunub ki, sentyabrın 18-də başlayan forum ayın 20-nə qədər davam edəcək. Eyni zamanda, sentyabrın 19-da Paylan tədbirdə “Türkiyə “erməni soyqırımı”nı tanıya bilərmi?” mövzusunda nitq söyləyəcək.
Qeyd edək ki, Paylan Türkiyənin Xalqların Demokratik Partiyasının (HDP) üzvüdür. Sözügedən partiya kürd partiyası sayılır. Bununla yanaşı, Paylan sahib olduğu statusdan sui-istifadə edərək dəfələrlə Türkiyəni qərəzli şəkildə və ciddi əsası olmadan tənqid edib. Bir sıra hallarda bu tənqidlər ölkənin dövlət maraqlarına qarşı yönəlib. Aydın məsələdir ki, bu cür siyasi obraza malik olan bir şəxsin İrəvanda hansı mövqedən çıxış edəcəyi məlumdur. O üzdən, belələrinin fəaliyyəti arzuolunmazdır.
Maraqlıdır, ekspertlər bütün bunları necə dəyərləndirir?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “Türkiyədə, bildiyimiz kimi, erməni diasporu fəaliyyət göstərir və bu ölkədə ermənilər yaşayır. Burada yaşayan ermənilər və diaspor hazırda da Türkiyəyə qarşı düşmənçilik mövqeyindədirlər. Baxmayaraq ki, bu ölkədə yaşayır və işləyirlər. Məlum olduğu kimi, Türkiyədə AKP hakimiyyətə gəldikdən sonra Ermənistanla hava nəqliyyatı İstanbul-İrəvan reysi açılıb. Türkiyədə ermənilərin fəaliyyəti nəzərəçarpacaq dərəcədə genişlənib. Hətta baş nazirin baş məsləhətçisi vəzifəsinə kimi vəzifə bunlara həvalə olundu. TBMM-yə keçirilən seçkilərdə erməniləri parlamentə buraxmaq Türkiyə rəsmiləri tərəfindən qəbul edilməz strateji səhvdir. Məhz ermənilər TBMM-də “erməni soyqırımı” deməkdən çəkinməyən səviyyədədilər. Türkiyə parlamentinin erməni üzvünün İrəvanda qondarma "soyqırım" abidəsini ziyarət etməsi, məruzə ilə çıxışı TBMM adına yazılacaq. Bu, Türkiyə hakimiyyətinin dolayısı ilə ermənilərin "faciəsini" qəbul etməsi anlamina gələ bilər. TBMM üzvü, mənşəcə kim olursa-olsun, ölkə parlamentini təmsil edir. Hesab edirəm ki, Türkiyə iqtidarı, AKP belə bir avantüranın qarşısını almalıdır. İrəvanda "soyqırım" abidəsini ziyarət edən TBMM erməni üzvünün deputatlıq mandatı ləğv edilməlidir”.
Vidadi ORDAHALLI
