Elşən Həsənov: "Onsuz da nüfuzdan düşmüş Ermənistan ordusuna inamı bir qədər də azaldacaq"
Ermənistanda çağırışçılar 200 min dram (təxminən 417 ABŞ dollları) ödəməklə 27 yaşına qədər həqiqi hərbi xidmətdən möhlət hüquq ala biləcək. Erməni mətbuatının verdiyi məlumata görə, təklif layihəsi diaspor komitəsi tərəfindən irəli sürülüb. Ermənistanın müdafiə naziri Vigen Sarkisyan bu təklifi çox müsbət qarşılayıb.
Bildirilir ki, məcburi xidmətdən yayınmaya görə müxtəlif illərdə bir çoxlarına qarşı cinayət işi açılıb. Həmin şəxslər cinayət işini üzərindən götürmək üçün ötən illər ərzində müəyyən məbləğdə vəsait ödəyərək bu cəzadan yaxa qurtara bilib. Diaspor komitəsinin məlumatına görə, 2014-cü il ərzində 954 nəfər, 2015-ci ilin birinci rübündə isə 61 nəfər xidmətdən yayınmaya görə cinayət məsuliyyətini öz üzərindən götürmək üçün bu üsuldan istifadə edib.
Qeyd edək ki, Ermənistanda il ərzində iki dəfə hərbi xidmətə çağırış olur. Yeni qanuna əsasən, hər çağırışda 200 min dram ödəməklə 27 yaşa qədər xidmətdən möhlət hüququ veriləcək.
Bu qərar Ermənistanda ciddi fikir ayrılığı yaradıb. Müdafiə nazirindən fərqli olaraq, qurumun rəhbərliyində təmsil olunan əksər yüksək vəzifəli zabitlər belə bir qərara qarşı çıxır. Müdafiə Nazirliyində yaranan fikir ayrılığı nə vəd edir?
Ekspert Elşən Həsənov qəzetimizə bildirdi ki, müharibə aparan ölkədə belə bir qərarın verilməsi doğrudan da ciddi narazılıq doğuracaq: "Bu, faktiki olaraq, pul gücünə hərbi xidmətdən yayınmaq anlamına gəlir. Məlumat üçün qeyd edək ki, Ermənistan parlamenti ilə hökumət arasındakı razılığa əsasən, məcburi hərbi xidmətdən yayınmaya görə cinayət məsuliyyətinin aradan qaldırılıb müəyyən edilmiş məbləğdə vəsait ödəməklə cəzanın əvəz olunmasına dair son dəyişikliklər 2015-ci il aprelin 30-da qəbul edilib. Qanun qəbul edilərkən cinayət məsuliyyətinin aradan qaldırılması 2014-cü il dekabrın 31-dək 27 yaşı tamam olmuş, orduda məcburi xidmətdən yayınan vətəndaşlar üçün nəzərdə tutulmuşdu. Sonradan qanuna edilmiş dəyişikliyə əsasən isə, bu tarix dəyişdirilərək 2015-ci il mayın 1-dək 27 yaşı tamam olmuş vətəndaşlar üçün nəzərdə tutulub. Bu cür dəyişikliyin edilməsi yalnız Müdafiə Nazirliyində fikir ayrılığına səbəb olmayıb. Həmçinin, minlərlə sadə vətəndaş arasında etiraza səbəb olub və qeyri-müəyyən vəziyyət yaradıb. Bəlkə də bu, hansısa stabil ölkədə olsaydı, rezonansı belə olmazdı. Pulla ordudan möhlət hüququndan imkanlı ailələr yararlanacaq. Çünki heç kim övladının müharibədə ölməsini istəmir. Ermənistanda vətən üçün ölməyin yalnız kasıbların alnına yazıldığı mənzərəsi isə kütləvi şəkildə etiraz yaradacaq. Onsuz da nüfuzdan düşmüş Ermənistan ordusuna inamı bir qədər də azaldacaq".
Məhəmmədəli QƏRİBLİ