Dünyanın ən böyük hərbi gücləri sayılan NATO ilə Rusiya arasında münasibətlər gedərək daha kəskin xarakter almağa başlayır. Moskva iddia edir ki, NATO onun sərhədlərinə doğru irəliləməkdə davam edir və buna mütləq şəkildə adekvat cavab veriləcək. ABŞ-ın müdafiə naziri Ceyms Mettis isə Kremlin narahatlığına əsas görümr.
O qeyd edir ki, NATO Rusiya üçün təhlükə kəsb etmir: "NATO Rusiya üçün təhlükə kəsb etmir. Bunu Moskvada gözəl anlayırlar. Bu gün Rusiyanın gələcəyi Avropa ilə bağlı olmalıdır. Onlar NATO-nu özlərinə əsas təhdid hesab edirlər. Mən bunu başa düşmürəm". Onun sözlərinə görə, Rusiya NATO-ya qarşı strateji rəqib yolunu seçib. Kreml isə məsələyə fərqli yanaşır.
Rusiyada bildirirlər ki, NATO-nun ölkə sərhədləri boyunca möhkəmlənməsi Moskvanı hərbi potensialını daha çox buna qarşı möhkəmləndirməyə vadar edir. Sankt-Peterburq beynəlxalq iqtisadi forumunda beynəlxalq informasiya agentliklərinin başçıları ilə görüşündə Rusiya prezidenti Vladimir Putin bunula bağlı bildirir: "Hərbi potensialın genişləndirilməsi Rusiyanın təşəbbüsü deyil". Putin qeyd edib ki, Rusiya, Cənubi Koreyada yerləşdirilən THAAD sistemləri də daxil olmaqla, öz sərhədlərində Amerika raket hücumundan müdafiə sistemlərinin yerləşdirilməsinə reaksiya verir: "Bu, regionda baş verənlərə cavabdır. Amerikanın raket hücumundan müdafiə sistemlərini genişləndirməsi qızğın silahlanmaya təhrik edir. Rusiya NATO-nun öz sərhədlərinə doğru irəliləyişinə sakit şəkildə baxmayacaq. Budur, NATO-nun bazaları bizim qərb sərhədlərimizə hərəkət edir, infrastruktur yaxınlaşır, hadisələr inkişaf edir. Yaxşı, biz nə etməliyik, buna sakit baxmalıyıq? Xeyr, belə olmayacaq. Biz müvafiq yolla reaksiya veririk".
Hələlik tərəflər, qızğın silahlanma ilə yanaşı, hərbi təlimlərlə qarşılıqlı güc nümayişini də xüsusi diqqətdə saxlayır. Ukraynanın Atlantika Şurasının sədri Yuri Romanyuk buna misal olaraq bildirir ki, NATO-nun Baltikyanı ölkələrində genişmiqyaslı hərbi təlimləri Moskvanın demarşına - Rusiyanın qərbində planlaşdırılan Rusiya-Belarus hərbi təlimlərinə cavabdır. Onun sözlərinə görə, Rusiya prezidenti bu il uzun illər ərzində ilk dəfə Baltikyanı ölkələrlə sərhəddə və Belarus ərazisində genişmiqyaslı Rusiya-Belarus hərbi təlimlərini planlaşdırıb: "Təlimlərin miqyası olduqca böyükdür. Daha əvvəllər Rusiya Müdafiə Nazirliyi texnika, silahlar və şəxsi heyətin daşınması üçün 400 vaqon cəlb edirdisə, qarşıdakı təlimlərə 4000 mindən çox vaqon cəlb ediləcək. Cəlb ediləcək hərbi qulluqçuların ümumi miqdarı 100 mindən çoxdur". Bu durumda, təşkilat sədrinin fikrincə, Baltikyanı ölkələrdə NATO-nun genişmiqyaslı təlimləri Rusiyaya dəqiq siqnaldır ki, NATO öz sərhədlərində güzəşt etməyəcək və Rusiyanın ittifaqa üzv ölkələrlə Ukrayna və Gürcüstanla davrandığı kimi davranmasına icazə verməyəcək. Ekspertlərin fikrincə, Rusiyanın keçirdiyi genişmiqyaslı təlimlər ya Belarusda hərbi nəzarətin təmin edilməsi, ya da Ukrayna, Baltikyanı ölkələr və Polşaya hücum üçün nəzərdə tutulur. Bundan başqa, Rusiyanın Xəzər və Qafqaza yeni hərbi qüvvələr cəmləşdirməsi də diqqətdən yayınmır. Belə bir vaxtda Şimali Qafqazda və Cənubi Osetiyada yerləşdirilən Cənub hərbi Dairəsinin 58-ci ümumqoşun ordu birləşmələrinə qoşunların yenidən təchizi proqramı çərçivəsində silah və hərbi texnikanın ən yeni və müasirləşdirilmiş nümunələri daxil olub. Cari ildə ümumqoşun ordu birləşmələrinin Cənub Hərbi Dairəsi bölmələrinə təxminən 50 ədəd hərbi və xüsusi texnika daxil olub. Onlar arasında modernizə edilmiş T-72B3 tankları, BM-21 "Qrad" reaktiv yaylım atəş sistemi, "Akasiya" özüyeriyən artilleriya qurğusu, pilotsuz uçuş aparatları (PUA), "Borisoqlebsk-2" radioelektron mübarizə kompleksi, "Ural" avtomobilləri və müasir avtobuslar olub.
Yeni modernizə edilmiş T-72B3 tankına son nəsil rabitə vasitələri quraşdırılıb, ən yeni idarəetmə sistemi ilə təchiz edilməsi texnikanın atış effektivliyini daha da artırır. Müasirləşdirildikdən sonra tanka, həmçinin, hesablamalar vaxtını azaltmağa və effektivliyini yüksəltməyə imkan verən rəqəmsal ballistik hesablayıcı da quraşdırılıb. Tankın əsas nişangahı hər cür hava şəraitində günün saatından asılı olmayaraq cihazların etibarlı işini təmin edir. Cənub Hərbi Dairəsinin ümumqoşun ordusunun silahlanmasına ilin sonunadək daha 200 ədəd müasir hərbi və xüsusi texnika əlavə etmək planlaşdırılır. Onlar arasında avtomobil, zirehli tank, raket-artilleriya silahları, radioelektron mübarizə sistemi, radiokimyəvi və bioloji müdafiə, tibbi xidmətin və mühəndislik qoşunlarının texnikaları və digərləri yer alacaq. Bütün bunlar Rusiya və NATO arasında Baltikyanıdan tutmuş Qafqaza qədər geniş məkanda yeni qarşıdurmanın başlanmasının göstəricisi kimi də dəyərləndirilir.
Tahir TAĞIYEV