Məhəmməd Əsədullazadə: "Bu siyasi əlaqələr inkişaf edərsə..."
Rusiya və İranla həmsərhəd olan Azərbaycan keçmiş Sovet İttifaqının Avropa hissəsində əhalisinin əksəriyyətinin müsəlman olduğu yeganə respublikadır. Bu barədə İsrail Demokratiya İnstitutunun beynəlxalq əlaqələr üzrə direktoru Maayan Yaffe-Hoffmanın "Jewishpress" qəzetində dərc olunan məqaləsində yazılıb.
Məqalədə qeyd olunur ki, ölkə xristian və müsəlman dünyasının kəsişməsində yerləşir. Azərbaycanda, həmçinin, qədim yəhudi qəsəbəsi də var və burada 35 minədək insan yaşayır. İsrailin Azərbaycandakı səfiri Rafael Harpaz dəfələrlə qeyd edib ki, Azərbaycanda antisemitizm mövcud deyil.
Materialda Azərbaycanın strateji və geosiyasi əhəmiyyətindən bəhs edilir. Böyük əksəriyyəti müsəlman olan, bununla belə, dünyəvi və tolerant Azərbaycan müasir dünya üçün bariz nümunədir.
Müəllif qeyd edir ki, Azərbaycan öz dövlət müstəqilliyini bərpa etdiyi vaxtdan regional və qlobal sistemlərin mərkəzində yerləşməsindən böyük uğurla istifadə edir və Birləşmiş Ştatlar da diplomatik və siyasi körpülər qurulması, sülhün bərqərar olması üçün bu imkanlardan istifadə etməlidir: "ABŞ Azərbaycanla əməkdaşlıq kursunu götürsə, bu, strateji baxımdan dünyada diplomatik və siyasi körpülərin yaradılması üçün ağıllı addım olar".
Maraqlıdır, ekspertlər bu yanaşmanı necə dəyərləndirir? Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, ABŞ və Azərbaycan daim enerji və təhlükəsizlik sahəsində əməkdaşlıq edib: "Obama dövründə Azərbaycanla müəyyən sahələrdə problemlər yaransa da, yeni administrasiya Azərbaycanla iqtisadi-siyasi, enerji və təhlükəsizlik sahəsində əməkdaşlığı inkişaf etdirmək siyasi kursunu götürüb. Əlbəttə, ABŞ-ın onun tərəfdaşı olan Avropa və İsraili qaz və neftlə təmin edən Azərbaycana diqqət ayırması regionda tutduğu geosiyasi mövqeyi ilə bağlıdır. ABŞ Əfqanistana yüklərin 70 faizini məhz Azərbaycan üzərindən aparır. Göründüyü kimi, bu kimi strateji əhəmiyyətli işlərə görə ABŞ Azərbaycanla əməkdaşlığı yeni mərhələyə gətirir. Respublika Günü və Xəzər neft-qaz sərgisində Trampın dövlət başçısı İlham Əliyevə iki məktubu ABŞ-ın Azərbaycanla siyasi-iqtisadi əlaqələrinin yeni dönəmə qədəm qoyduğunun göstəricisidir. Azərbaycan Mərkəzi Asiya və Avropanı birləşdirən bir qapıdır. ABŞ-ın Mərkəzi Asiya üzrə geostrateji planları var. Ona görə də Azərbaycanla bundan sonra siyasi dialoqu genişləndirərək, regionda öz təsir gücünü artıra bilər. ABŞ-Azərbaycan siyasi dialoqunun Cənubi Qafqaz üzrə əməkdaşlıq və təhlükəsizliyə töhfə verəcəyi şübhəsizdir. TAP və TANAP enerji layihələri Azərbaycanın regionda rolunu daha da artırmaqdadır. ABŞ bu layihələrə şəksiz dəstək verir. Bu siyasi əlaqələr inkişaf edərsə, ABŞ Qarabağ münaqişəsinin həllində Azərbaycanın mövqeyini müdafiə edə bilər. Cənubi Qafqaz regionu yenidən böyük dövlətlərin maraq dairəsini cəlb edib. ABŞ bu işdə fəal olaraq Azərbaycana diqqət ayırır. Azərbaycan da ABŞ-la ikitərəfli əməkdaşlığın hər iki ölkənin mənafeyinə uyğun aparılmasında maraqlıdır. Dünyada yeni nizam düzənləndiyi bir dövrdə bu əməkdaşlıq sülhə və təhlükəsizliyə ciddi şəkildə töhfə verəcək".
Vidadi ORDAHALLI