Elşən Mustafayev: "Bu məsələdə yaxın qonşuluq münasibətlərinə ciddi önəm verilməlidir"
Məlum olduğu kimi, ABŞ prezidenti Donald Tramp Səudiyyə Ərəbistanına ilk xarici səfəri çərçivəsində etdiyi çıxışlarda İran əleyhinə sərt bəyanatlar səsləndirib.
Ər-Riyaddakı çıxışı zamanı o bildirib ki, dünya terror qurbanlarının 95 faizini müsəlmanlar təşkil edir: "Terrorizmə qarşı mübarizəni bir dinə qarşı müharibə kimi deyil, xeyirlə şər arasındakı döyüş kimi gerçəkləşdirmək lazımdır".
Bundan başqa, D.Tramp bütün dünya ölkələrini İranı təcrid etməyə çağırıb. Tramp rəsmi Tehranı ekstremist qüvvələri dəstəkləməkdə, onlara silah verməkdə və terrorizmi maliyyələşdirməkdə ittiham edib. Həmçinin, Tramp İranı Bəşər Əsədi dəstəklədiyi üçün sərt şəkildə tənqid edib.
İranla qonşu olan dövlət kimi Azərbaycan Trampın çağırışına qoşulmalıdırmı?
Ekspert Elşən Mustafayevin sözlərinə görə, Trampın Səudiyyə Ərəbistanından başlayan ilk xarici səfərinin ardınca İran üçün arzuolunmaz dövlət olan İsrailə yollanması da çox mətləblərdən xəbər verir: "Təsadüfi deyil ki, Trampın iştirak etdiyi toplantını "İran əleyhinə görüş" kimi də təqdim etdilər. Ancaq mən bu fikri tam olaraq bölüşmürəm. Çünki həmin tədbirdə iştirak etmək o demək deyil ki, bütün dövlətlər İranın təcridi kampaniyasında yer alacaq. Qeyd edim ki, toplantıda bizim prezident də iştirak edib. Həmin toplantıda Azərbaycanın iştirakını doğru sayıram. Ərəb və müsəlman dövlətləri liderlərinin, o cümlədən ABŞ prezidentinin iştirakı ilə Səudiyyə Ərəbistanında keçirilən zirvə toplantısı, nəticəsindən asılı olmayaraq, mühüm hadisədir. Təbii ki, Azərbaycanın özü də belə formatların formalaşmasında az iş görməyib. Zirvə toplantısında diqqətçəkən məqamlardan biri ABŞ prezidentinin İslam ölkələrini İranı izolyasiya etməyə çağırması, Səudiyyə Ərəbistanı liderinin isə İranı İŞİD terror təşkilatı ilə eyniləşdirməsidir. İranın növbəti sanksiyalarla təhdid olunduğu heç də yaxşı perspektivlərdən xəbər vermir. Ən azından bizim üçün. Çünki həmin ölkə ilə biz həmsərhədik. İranda çoxlu sayda bizim soydaşımız olan azərbaycanlılar yaşayır. Obama administrasiyası vaxtında da biz ABŞ-İran münasibətlərində gərginləşməni hiss etdik. Ancaq Azərbaycan açıq şəkildə bəyan etdi ki, bizim ərazimizdən İran əleyhinə istifadə edilə bilməz. Baxmayaraq ki, biz ABŞ-la formalaşan antiterror koalisiyasında iştirak edirik. Düşünürəm ki, Azərbaycan əvvəlki siyasətinə sadiq qalaraq, İran əleyhinə formalaşan blokda və atılacaq addımlarda iştirak etməyəcək. Bu məsələdə yaxın qonşuluq münasibətlərinə ciddi önəm verilməlidir".
Məhəmmədəli QƏRİBLİ