"Bu səbəbdən də daha çox Qərbdən gələ biləcək təzyiqləri neytrallaşdırmaqla bağlı səslənən versiya inandırıcıdır"
Parisə etdiyi səfər zamanı Ermənistan prezidenti Serj Sarkisyan Fransa prezidenti Fransua Ollandla yanaşı, digər nüfuzlu qurumların rəhbərləri ilə də görüşüb. Serj Sarkisyanın Avropada Avropa Komissiyasının başçısı Donald Tusk və NATO-nun baş katibi Yens Stoltenberqlə də görüşü olub.
Sarkisyanın bu görüşləri birmənalı qarşılanmır. Bəziləri onun bu jestini Moskvanı Avropaya meyllənə biləcəyilə şantaj etmək, digərləri isə Dağlıq Qarabağ məsələsində tutduğu qeyri-konstruktiv mövqe və ölkə daxilindəki insan haqlarını pozduğuna görə Qərbin təzyiqlərini neytrallaşdırmaq cəhdi kimi qiymətləndirir.
Sarkisyanın son səfərindəki əsl məqsədi nə ola bilər?
Politoloq Vəfa Heydərli qəzetimizə açıqlamasında bildirdi ki, Sarkisyanın Fransaya səfəri daha çox seçki təbliğatına hesablanıb: "Apreldə keçiriləcək parlament seçkilərilə bağlı Sarkisyanın ciddi narahatlığı var. Onun Rusiyadan çəkinəcəyi yoxdur. Çünki Rusiya onun kimi vassallığa meylli rəhbərlə gələcək əməkdaşlıqda daha çox maraqlıdır. Ermənistanın daxilində olan müxalif qüvvələr əsasən Qərbə meyllidir. Yəni Sarkisyan tam məsuliyyətilə dərk edir ki, seçkinin nəticələrilə bağlı baş qaldıracaq etirazlara Qərbdən lazımi dəstək verilsə, onu hakimiyyətdən sala bilərlər. Bu baxımdan da o, real təhlükəni neytrallaşdırmağa çalışır. Rusiya ilə onun arasında hazırda ciddi fikir ayrılığı yoxdur. Ehtimal ki, Sarkisyan Qərb səfərinin bütün detallarını da Moskva ilə razılaşdırıb. Kənardan Moskvaya qarşı soyuqluq görüntüsünü yaratmaq Sarkisyanın növbəti blefi sayılmalıdır. Real vəziyyətdə onun Moskvanın sözündən çıxa bilməsi mümkün deyil. Bu səbəbdən də daha çox Qərbdən gələ biləcək təzyiqləri neytrallaşdırmaqla bağlı səslənən versiya inandırıcıdır. Çünki son vaxtlar Qərb ona Dağlıq Qarabağ probleminin nizama salınması istiqamətində tutduğu qeyri-konstruktiv mövqeyə görə də təzyiqlər edir".
Məhəmmədəli QƏRİBLİ