Məhəmməd Əsədullazadə: "Aprel seçkiləri ilə bağlı proseslər ölkədə dərin iqtisadi xaosun və daxili siyasi sabitliyin kövrək olduğunu göstərir"
Yeni konstitusiya üzrə Ermənistanda parlament idarəçilik sisteminin tətbiq edilməsini nəzərdə tutan parlament seçkiləri siyasi mübarizə yox, zorbalıq atmosferində pul kisələrinin davası olacaq. Xəbər verildiyi kimi, bunu Ermənistanın sabiq prezidenti Robert Köçəryan deyib.
Köçəryan aprel ayının 2-də keçiriləcək parlament seçkiləri ilə bağlı çoxdan müsahibə vermək vədlərinə baxmayaraq, ölkədə mövcud durumda siyasi proseslərə qarışmamaq qərarına gəldiyini deyir: "Doğrusu, son günlər mən nə isə yazıb, heç olmasa ən aktual sualları cavablandırmaq fikrində olmuşam. Lakin mövcud gerçəkliklərə tam bələd olaraq, nə bugünkü siyasi prosesləri şərh etmək həvəsindəyəm, nə də, ələlxüsus, onlarda iştirak etmək".
R.Köçəryan 2015-ci il konstitusiya dəyişikliyini Ermənistan üçün uzunmüddətli neqativ nəticələr ehtiva edən böyük səhv hesab edir. O, yeni seçki məcəlləsinin, xüsusilə partiyaların seçkilərdə məhəlli siyahıları üzrə iştirakının "bizim seçki sisteminə xas olan ən neqativ təzahürlərin katalizatoru"na çevriləcəyini bildirib. Köçəryan bu seçkilərdə ideoloji mübarizənin heç bir əhəmiyyəti olmayacağını qeyd edib. Onun fikrincə, dərc edilmiş məhəlli partiya siyahıları bunun bariz sübutudur: "Bu, zorbalıq atmosferində pul kisələri davası olacaq. Bir halda ki, seçicilərin bir çoxu elə ağır sosial vəziyyətdədir ki, puldan imtina edə bilməyəcək və güman ki, səslər hərracına qatılacaqlar. Bütün bunların nəyə gətirəcəyini duymaq çətin deyil".
Nəzərə alsaq ki, Köçəryan on il ölkənin prezidenti olub, o zaman onun bu açıqlaması müstəqillik dövründə Ermənistanda keçirilən bütün seçkiləri alt-üst etdi. Belə məlum oldu ki, seçkilərdə ideoloji mübarizə heç bir rol oynamayıb və təklif olunan pul seçicinin səsini idarə edib. Sözügedən məsələ ilə bağlı fikirlərini "Bakı-Xəbər"lə bölüşən ekspert Məhəmməd Əsədullazadənin sözlərinə görə, bütün bunlar Ermənistandakı rejimin mahiyyətindən irəli gəlir: "Aprelin 2-də Ermənistanda parlament seçkiləri keçiriləcək. Bu seçkilərdə hakim Respublika Partiyası və onun sədri, hazırkı prezident Serj Sarkisyan çalışacaq ki, parlamentdə üstünlüyü ələ alsın. Həmçinin, növbəti idarəçilik sistemində baş nazir olsun. Xüsusilə bu seçkilər Sarkisyanın hakimiyyətdə saxlanmasına hesablanmış konstitusiya dəyişiklikləridir. Təbii ki, Ermənistanda daxili siyasi vəziyyət yekcins deyil. Müxalif qüvvələrin hakimiyyətə qarşı müəyyən təzyiqləri baş verir. Çünki ölkədə iqtisadi-sosial vəziyyət gərgin olaraq qalır. Cəbhədə erməni ordusunun itkiləri, məğlub durumu müxalifətin reytinqini yüksəldir. Bundan istifadə edən müxalif qüvvələr əhalini meydanlara toplaya bilir. Ermənistanda əhalinin vəziyyəti o qədər acınacaqlıdır ki, onlar səsini hətta pulla satır. Köçəryanın dediyi kimi, burada ideoloji mübarizə və hakimiyyət bir o qədər əhəmiyyət kəsb etmir".
M.Əsədullazadənin fikrincə, Ermənistan əhalisinin 50-60 faizi illər boyu seçki zamanı səslərini satmağa öyrəşib: "Bu, erməni siyasi istibleşmentinin korrupsiya üzərində olduğunu göstərir. Qeyd edim ki, seçkilərdə seçki rüşvəti sayəsində əldə edilmiş səslər həlledici rol oynayacaq. Ermənistanın sabiq prezidenti ölkədə real vəziyyəti bilərək, hakimiyyətin bu metoddan istifadə edəcəyini qeyd edir. Çünki Sarkisyan vaxtilə Köçəryanın komandasında yer alıb, onlar məhz bu yolla hakimiyyəti ələ alıblar. Hazırda Sarkisyana müxalif Qagik Tsarukyanın partiyası da geniş maliyyə imkanlarına sahibdir. O da çalışacaq ki, bu seçki "texnologiyası"ndan istifadə etsin, əhalini öz tərəfinə çəksin. Həm müxalifətin, həm də hakimiyyətin pul ilə seçiciləri ələ alması Ermənistanda seçki mədəniyyətinin nə qədər aşağı və sosial vəziyyətin ağır olduğunu göstərir. Ümumi olaraq, bu seçkilərdə Sarkisyan həm inzibati, həmçinin, pulla seçkiləri öz lehinə təmin edəcək. Aprel seçkiləri ilə bağlı proseslər Ermənistanda dərin iqtisadi xaosun və daxili siyasi sabitliyin kövrək olduğunu göstərir". Vidadi ORDAHALLI