Fikrət Sadıqov: "Ermənistan bu mövqeyindən geri çəkilməsə, heç bir razılaşmadan söhbət gedə bilməz"
Rusiyanın xarici işlər naziri Sergey Lavrov azərbaycanlı həmkarı Elmar Məmmədyarovla görüşü zamanı olduqca təəccüblü açıqlamamalrı ilə yadda qalıb. O, görüşdə Dağlıq Qarabağ münaqişəsinin nizamlanması perspektivlərinin müzakirə olunduğunu söyləyib:
"Biz hesab edirik ki, Dağlıq Qarabağ münaqişəsi həllə yönümlüdür. Məzmunlu prosesə başlamaq üçün, ilk növbədə, Azərbaycanla Ermənistan arasında inamsızlığın səviyyəsini azaltmaq lazımdır. Bu barədə uzun illər təmasların nəticələri deməyə əsas verir. Onların nəticələrinə əsasən, həll edilməli olan əsas məsələlərlə bağlı ümumi yanaşmanı hazırlamaq mümkün olub. Bu humanitar məsələlər, Dağlıq Qarabağ ətrafında olan və hazırda Azərbaycan tərəfindən nəzarət edilməyən rayonların qaytarılması ilə bağlı məsələlərdir. Eyni zamanda bura Dağlıq Qarabağın statusunun müəyyənləşdirilməsi daxildir. Sözsüz ki, orada yaşayan insanları nəzərə almaq şərti ilə. Həmçinin beynəlxalq sülhməramlı qüvvələrin parametrlərinin razılaşdırılmasıdır".
Nazir qeyd edib ki, bu aspektlərin əksəriyyəti ilə bağlı anlaşma var: "Lakin yekun paket üçün əsas olan 2-3 konkret mövzu hələ müzakirə olunur. Gizlətməyəcəyəm, tərəflər bu aspektlərə ümumi anlaşmaya gəlməkdən çox uzaqdır".
Lavrov bildirib ki, Moskvada müzakirə olunan Qarabağ nizamlanmasına aid 2-3 əsas məsələ əlavə səylər tələb edir.
Lavrov açıqlamasında faktiki olaraq bildirib ki, Dağlıq Qarabağ ətrafında işğal olunan rayonların qaytarılması, sülhməramlı qüvvələrin həmin əraziyə yerləşdirilməsi və nəhayət, Dağlıq Qarabağın yekun statusunun müəyyənləşməsilə bağlı aspektlərdə razılaşma əldə olunub. Doğrudanmı belə anlaşma var, varsa, onun şərtləri necədir və bu barədə ictimaiyyətin niyə məlumatı yoxdur?
Politoloq Fikrət Sadıqov qəzetimizə açıqlamasında bildirdi ki, Lavrovun açıqlaması çox fərqli aspektlərdən təqdim edilir: "Mən original variant ilə tanış oldum. Lavrov qeyd edir ki, tərəflər arasında müəyyən məsələlərdə yaxınlaşma var. Ancaq bəzi məsələlərdə mövqelər çox uzaqdır. Hesab edirəm ki, sizin sadaladığınız məsələlər məhz həlli müşkül olanlar sırasına aiddir. Ermənilərin mövqeyini biz və Moskva bilir. Qısa və konkret olaraq bunu belə izah edə bilərik. Ermənistan istəyir ki, biz Dağlıq Qarabağın müstəqilliyini tanıyaq, sonra işğal etdikləri ətraf rayonları azad etsinlər. Onların bu mövqeyində zərrə qədər də olsun dəyişiklik yoxdur. Sülhməramlıların yerləşdirilməsi məsələsi də bizim mövqeyimizə tam uyğun olmalıdır. Hesab edirəm ki, bu mövzular ətrafında fikir ayrılıqları qalmaqdadır. Ermənistan bu mövqeyindən geri çəkilməsə, heç bir razılaşmadan söhbət gedə bilməz. Təbii ki, bu mövqe Azərbaycana sərf etmir. Son hadisələr göstərdi ki, biz qarış-qarış da olsa, torpaqlarımızı işğaldan azad edəcəyik. Yaxşı olardı ki, Rusiya bir qədər də Ermənistana təzyiq variantının vacibliyindən danışardı".
Məhəmmədəli QƏRİBLİ