Arzuxan Əlizadə: "İnformasiya müharibəsində Azərbaycan ayıq-sayıq olmalı və qarşı tərəfə hər zaman adekvat cavab verməlidir"
Rusiya dünyada ikinci ən böyük silah satan ölkədir və bazara, beynəlxalq salonlara silah çıxarır. Oradan Azərbaycan, digər ölkələr kimi, bu silahı alır. Bu barədə "Rossiya seqodnya" BİA-nın rəhbəri Dmitri Kiselyov "Sputnik Ermənistan"ın multimedia mətbuat mərkəzində jurnalistlərə bildirib: "Bu məsələdə siyasi tərkib axtarmaq lazım deyil. Bu ticarət Azərbaycan və Rusiya arasındakı münasibətlərin bir hissəsidir. İşgüzar münasibətlərin olması münasibətlərin heç olmamasından yaxşıdır".
Kiselyovun sözlərinə görə, Rusiya bölgədə balansın qayğısına qalmalıdır və Ermənistanın təhlükəsizliyi regional konstruksiyanın nəticəsidir: "Söhbət Rusiyanın Azərbaycan, Türkiyə ilə qurduğu münasibətlərdən, Ermənistanın Azərbaycanla münasibətlərindən və s. gedir".
Ancaq hər zaman istənilən məlumatı saxtalaşdırmaq üzrə ixtisaslaşmış ermənilər bu açıqlamanı başqa formada təqdim etməyə çalışıb. Belə ki, Ermənistanın lragir.am saytı Kiselyovun məlum açıqlamasını təhrif olunmuş formada verib. Saytın yaydığı məlumatda bildirilir ki, Azərbaycan silah alışına milyardlarla dollar ödəyir. "Bu mənada, Rusiya və Azərbaycan arasında silah ticarəti Ermənistanın xeyrinədir".
Erməni saytı bir az da qabağı gedərək iddia edib ki, Rusiyanın tanınmış teleaparıcısı Vladimir Solovyov da eyni fikirdədir.
Maraqlıdır, ermənilər məlumatı bu dərəcədə təhrif etməklə nə məqsəd güdür?
Məsələyə münasibət bildirən AMİP-in baş katibi Arzuxan Əlizadənin sözlərinə görə, belə hallar hər zaman gözləniləndir: "Rusiyanı Ermənistanın müttəfiqi adlandırmaq bir qədər gülünc görünür. Əslində, Ermənistan Rusiyanın bir quberniyasıdır. O baxımdan burada hansısa təəccüblü bir şey yoxdur. Sadəcə, erməni həyasızlığı o həddə çatıb ki, onlar utanmadan istənilən məlumatı açıq-aşkar öz xeyirlərinə təhrif edir. Rusiya Azərbaycana silah satmasa, nə qazanacaq ki?! Azərbaycan bunu başqa ölkələrdən əldə edəcək. Necə ki, bunu edir. Yoxsa, "Azərbaycanın Rusiyadan silah alması Ermənistanın xeyrinədir" - demək anlaşılan deyil. Zatən, Ermənistan Rusiyanın forpostu olduğu üçün, rəsmi Moskva işğalçı dövlətə silahı ya ucuz, ya da müftə verir. Çünki Dağlıq Qarabağ münaqişəsinin həll olunmamış qalması Rusiyaya sərf edir. Bu minvalla hər iki ölkəyə təsir göstərir. Eyni zamanda, münaqişənin hesabına Azərbaycana dəyəri milyardlarla ölçülən həcmdə silah sataraq pul qazanır. Bunu ermənilər də bizdən yaxşı bilir. Ona görə də informasiya müharibəsində Azərbaycan ayıq-sayıq olmalı və qarşı tərəfə hər zaman adekvat cavab verməlidir".
Vidadi ORDAHALLI