"Ermənistanla danışıqlar dayanıb"
“Vaşinqton müzakirələr üçün çətin tərəfdaşdır, onlar heç də hər zaman səni eşitmirlər”
"Dağlıq Qarabağ münaqişəsinin həlli Azərbaycanın xarici siyasətinin əsas prioritetidir". APA-nın Moskva müxbirinin verdiyi məlumata görə, bunu Azərbaycanın xarici işlər naziri Elmar Məmmədyarov Rusiya Diplomatik Akademiyasında çıxışında deyib.
Nazir münaqişənin bu günə kimi həll edilməməsinin regionun inkişafına əsas maneə olduğunu söyləyib: "Artıq 30 ilə yaxındır, həm Azərbaycan, həm də Ermənistan bu problemlə üz-üzə qalıb. Dünən biz Rusiyanın xarici işlər naziri Sergey Lavrovla Dağlıq Qarabağ münaqişəsinin nizamlanması yollarını detallı müzakirə etdik. Təkcə biz nazirlər yox, Azərbaycan və Rusiya prezidentləri də görüşlərində bu məsələni mütəmadi müzakirə edirlər".
Azərbaycan XİN başçısı Dağlıq Qarabağ münaqişəsinin həll edilməsi üçün Ermənistanın siyasi iradə göstərməli olduğunu vurğulayıb: "Bu münaqişənin həlli ilə məşğul olanlar yaxşı bilirlər ki, əsas problem nədən ibarətdir. Münaqişənin həlli üçün ilk növbədə Ermənistan qoşunları işğal altındakı Azərbaycan ərazilərini tərk etməli, regionun təhlükəsizliyi təmin olunmalıdır. Daha sonra azərbaycanlı məcburi köçkünlər doğma yurdlarına qayıtmalıdırlar. Sonra regionun kommunikasiyası bərpa olunmalı, dəmiryolu xətti bərpa edilməlidir. Bütün bunlar regionun iqtisadi inkişafına kömək edəcək. Daha sonra isə Dağlıq Qarabağın statusu məsələsinə baxılmalıdır. Dünən Lavrovla görüşdə də bunları müzakirə etdik. Bir daha qeyd edirəm ki, əsas məsələ Ermənistan qoşunlarının kazarmaya qayıtmasıdır. Bütün bu məsələlər ardıcıllıqla həll olunacaq".
Qoşunların təmas xəttində yaşanan gərginlikdən danışan Azərbaycan XİN başçısı bildirib ki, təmas xəttində insidentlərin araşdırılması üzrə monitorinqin aparılması ilə Azərbaycan tərəfi razıdır: "Deyirlər ki, gəlin qoşunların təmas xəttində insidentləri araşdırılması üçün monitorinq quraq. Biz də deyirik ki, buyurun. Lakin bu, böyük planın tərkib hissəsi olmalıdır. Ermənistan qoşunları həmin ərazilərdən çıxsın, sonra bunu edək. Qoşunlar orda olduğu müddətdə əlbəttə ki, insident də baş verəcək".
E.Məmmədyarov deyib ki, Ermənistanla Dağlıq Qarabağla bağlı danışıqlar hazırda dayanıb. Onun sözlərinə görə, Ermənistan tərəfi danışıqlara getmir: "Biz təklif etmişik ki, substantiv danışıqlar davam etdirilsin, lakin Ermənistan tərəfi buna yaxın durmur.
Ermənistanda aprelin 2-də parlament seçkiləri keçiriləcək. Biz danışıqların bu tarixdən sonra aparılmasını da təklif etmişik".
E.Məmmədyarov onu da deyib ki, ATƏT-in Minsk qrupunun həmsədrləri Riçard Hoqland (ABŞ), Stefan Viskonti (Fransa) və İqor Popov (Rusiya) martın 11-də Azərbaycana səfər edəcəklər. Nazir həmsədrlərin Bakıda Dağlıq Qarabağ münaqişəsinin həllinə dair müzakirələr aparacaqlarını söyləyib.
Qeyd edək ki, həmsədrlərin bu ay Ermənistana da səfəri nəzərdə tutulur.
E.Məmmədyarov deyib ki, Azərbaycanın Avropa İttifaqı ilə münasibətlərə öz baxışı var. Bu, strateji tərəfdaşlıq münasibətləridir.
"Biz Avropa İttifaqı ilə strateji tərəfdaşlıq münasibətlərinin səviyyəsinin müəyyən edilməsinə başlamışıq", - deyə o qeyd edib.
Azərbaycan-ABŞ münasibətlərinə toxunan E. Məmmədyarov bildirib ki, Vaşinqton müzakirələr üçün çətin tərəfdaşdır: “Onlar hər zaman səni eşitmirlər. Bununla belə münasibətlərimiz olduqca möhkəmdir. Biz Əfqanıstanla bağlı da birgə fəaliyyət göstəririk. ABŞ-la tərəfdaşlıq münasibətlərimiz olduqca uğurlu inkişaf edir. Lakin insan hüquqları sahəsində Rusiya kimi bizi də tənqid edir. Bu oyunun qaydası belədir”.
Nazir deyib ki, Azərbaycan daha bir təhdid və çağırışla üzləşir. Bu, terrordur. Nazir qeyd edib ki, terror ümumi bəladır: “Azərbaycana kifayət qədər yaxın olan Yaxın Şərqdə baş verənlər daim ölkəmizin gündəmindədir. Azərbaycan aparıcı tərəfdaşları ilə bu istiqamətdə fəal işləyir. Terrorizmə qarşı mübarizə Azərbaycanın Avropa İttifaqı, ABŞ və Rusiya ilə əməkdaşlıqda prioritet hesab etdiyi sahədir. Rusiya ilə müzakirələrdə bu məsələ hər zaman qaldırılır. Bizim müvafiq strukturlarımız daim təmasdadır”.
“Hökumət biznesin yenidən təşkili və özəlləşdirmə üzrə böyük islahatlar həyata keçirir”
“İyirmi faiz işğal olunmuş ərazi, bir milyondan çox qaçqın və məcburi köçkün - bütün bunlar ciddi sosial yükdür. Buna görə də Azərbaycan iqtisadiyyatını intensiv şəkildə inkişaf etdirir. İqtisadiyyatın inkişafı bu əsrin əvvəlində bizim ölkəmiz üçün lokomotiv rolunu oynadı. İlk növbədə buna enerji sektoru, Bakı-Tbilisi-Ceyhan boru xəttinin çəkilişi zəmin yaratdı. Bu layihə Bakı və regionların iqtisadiyyatının inkişafına ciddi töhfə verdi”. Bu sözləri də E.Məmmədyarov deyib.
Nazir dünya bazarına neftin qiymətinin düşməsinə toxunub: “Hazırda neftin qiymətinin düşməsi ilə biz elə bir vəziyyətlə üzləşmişik ki, iqtisadiyyatın diversifikasiya edilməsi çox vacibdir. Qiymətin üç dəfə düşməsi Azərbaycan büdcəsinə ciddi təsir edib və hətta ÜDM bir qədər azalıb. Hazırkı dövlət büdcəsində biz neftin qiymətini 40 dollardan hesablamışıq. Azərbaycan neftinin qiyməti hazırda 55 dollardır. Ona görə də, stabillik mümkündür”.
E. Məmmədyarov qeyd edib ki, hökumət biznesin yenidən təşkili və özəlləşdirmə üzrə böyük islahatlar həyata keçirir: “Azərbaycanda investisiyanın bir neçə istiqamətləri var, biz bu istiqamətləri çox vacib hesab edirik. İlk növbədə bu, nəqliyyatla bağlıdır. Biz Şimal-Cənub və Qərb-Şərq nəqliyyatlarından danışırıq. Lakin bunların hansının daha prioritet olması hələlik məlum deyil. Hazırda Azərbaycanın yerləşdiyi coğrafi mövqeni nəzərə alaraq hər iki variantın maraqlı və cəlbedici olduğunu söyləmək olar. Bu bazar günü Azərbaycan prezidenti İlham Əliyev Tehranda səfərdə olub. Ötən il Azərbaycan, Rusiya və İran prezidentlərinin sammitində Şimal-Cənub nəqliyyat dəhlizi üzrə bəyannamə qəbul edilib. Hər 3 ölkə bu istiqamətdə böyük “ev tapşırığı” yerinə yetirib. İran tərəfi 150 km-lik dəmir yolu xətti tikməlidir. Azərbaycan hətta bu layihəyə investisiya qoymağa hazırdır. Orada bir qədər gömrük və sərhəd xidməti məsələsində bəzi problemlər var. Bu nəqliyyat xəttinin yaxın 2-3 ildə yaxşı şəkildə işləməsi də mümkündür”.