Məlumat verildiyi kimi, fevralın 17-19-da Almaniyada 53-cü illik Münhen Təhlükəsizlik Konfransı keçiriləcək və burada Azərbaycan, Ermənistanın xarici işlər nazirləri də iştirak edəcək. Konfrans çərçivəsində keçiriləcək görüşlərdə əsas iştirakçılardan biri də ATƏT-in Minsk Qrupunun həmsədrləri olacaq.
Onu da bildirək ki, Münhen Təhlükəsizlik Konfransı çərçivəsində Azərbaycanın xarici işlər naziri Elmar Məmmədyarovun ATƏT-in Minsk Qrupunun həmsədrləri ilə görüşü nəzərdə tutulub. Elə Ermənistanın xarici işlər naziri Edvard Nalbandyan da Dağlıq Qarabağ münaqişəsinin nizamlanması üzrə ATƏT-in Minsk Qrupunun həmsədrləri ilə görüşəcək. Amma nazirlərin bir-birilə görüşünün baş tutub-tutmayacağı hələ dəqiq bəlli deyil. Halbuki, ATƏT-in Minsk Qrupunun rusiyalı həmsədri İqor Popov Münhendə Azərbaycan və Ermənistanın xarici işlər nazirlərinin görüşünü təşkil etməyə hazır olduqlarını bildirib. Onun sözlərinə görə, həmsədrlər görüşlə bağlı Elmar Məmmədyarov və Edvard Nalbandyanla ayrı-ayrılıqda məsləhətləşmək barədə razılığa gəliblər: "Nazirlər maraqlı olsalar, biz onların görüşünü təşkil etməyə hazırıq".
Qeyd edək ki, Elmar Məmmədyarov belə bir görüşə hazır olduğunu bildirib. Amma Ermənistan tərəfi görüşlə bağlı hələ də dəqiq cavab verməyib. Belə görünür ki, erməni tərəfi danışıqlardan yayınmağa üstünlük verir. Digər tərəfdən, Azərbaycan görüşdə konkret nəticələrin əldə olunmasını tələb kimi qoyur. Erməni tərəfi bu məqamdan da yayınır. Ekspertlər isə hesab edir ki, belə vəziyyət Ermənistanın mövqeyi üzündən hərbi toqquşmalar risqini artırır. Kremlə yaxınlığı ilə seçilən rusiyalı politoloq Sergey Markov da indiki durumda təhlükəli vəziyyətin yarandığını bildirir: "ATƏT-in Minsk Qrupunun həmsədrləri Azərbaycan və Ermənistan xarici işlər nazirlərinin Münhendə görüşünü keçirməyə çalışacaq. Rusiya da Ermənistanın görüşdə iştirak etməsi üçün təzyiq edə bilər. Lakin təəssüflə proqnozlaşdırıram ki, bu danışıqlar nəyəsə nail olmayacaq. Çünki ötən il "Kazan düsturu", yəni Qarabağ ətrafındakı rayonların qaytarılması çərçivəsində böyük razılaşmanın imzalanması mümkün idi, lakin şans əldən qaçırıldı. Ermənistan rəhbərliyi bunu imzalamaqdan boyun qaçırdı. Bu baxımdan, Münhen görüşündən sonrakı vəziyyəti təhlükəli hesab edirəm".
Markovun fikrincə, Münhen görüşündən sonra böyük hadisələr olacaq: "Qorxu ilə qeyd edirəm ki, ya hərbi toqquşmalar başlayacaq, ya da başqa nələrsə olacaq. Lakin o da dəqiqdir ki, Ermənistan rəhbərliyi Qarabağ münaqişəsinin nizama salınması üzrə öz mövqeyini dəyişməyəcək". Məhz bu da bölgədə hərbi toqquşmalar risqini əhəmiyyətli dərəcədə yüksəldir.
Digər tərəfdən ermənilərin atdığı daha bir addım münaqişənin dinc yolla həllinə müsbət heç nə vəd etmir. Söhbət Ermənistanın birtərəfli qaydada Azərbaycan torpaqlarının işğalını rəsmiləşdirməyə çalışmasından və Qarabağ separatçılarının "konstitusiya islahatları" ilə bağlı "referendum" keçirmək cəhdlərindən gedir. Bununla erməni tərəfi sülh prosesindən qaçdığını göstərir və belə vəziyyət də bölgədə yeni müharibənin başlanması kimi qəbul edilə bilər. Aydındır ki, bu fonda mümkün hərbi toqquşmalar ötən ilin apreli ilə müqayisədə daha genişmiqyaslı olacaq. Amma bu vəziyyətdə məğlub duruma düşəcəklərini ermənilər özləri də yaxşı bilir. Çünki bu ölkənin ordusunda tənəzzül gedərək daha da dərinləşir. Bu xüsusda Ermənistanın müdafiə naziri Vigen Sarkisyanın Azərbaycanla həmsərhəd bölgələrə "təftiş" məqsədli səfərini şərh edərkən hərbi ekspert, ehtiyatda olan polkovnik Ədalət Həsənov çox maraqlı fikirlər səsləndirib. O qeyd edib ki, Qarabağ savaşını, ümumiyyətlə müharibə və ordu həyatını foto və videolentlərdən izləyən, kitab, qəzet və internetdən oxuyan, "müharibə"də iştirakı yalnız kompyuter oyunları ilə məhdudlaşan gənc nazirin Ermənistan ordusunda nüfuzu döşəmə haşiyəsi səviyyəsindən də aşağıdır: "Peşəkar hərbçi olmayan, ümumiyyətlə hərbi işdən başı çıxmayan, qoşunların idarə olunması və döyüş əməliyyatlarının aparılması haqqında təsəvvürü belə olmayan V.Sarkisyanın silahlı qüvvələrlə bağlılığı onun tərcümeyi-halında yalnız bir sətirlə ifadə olunub. O, 2000-2003-cü illərdə müdafiə nazirinin referenti vəzifəsində xidmət edib. Bununla belə, V.Sarkisyanın Ermənistanda baş verən irili-xırdalı əksər korrupsiya qalmaqallarında, digər mənfi hallarda adı hallandırılan Serj Sarkisyan administrasiyası ilə birbaşa bağlılığı var. Məhz bu, onun belə bir strateji posta təyin olunmasına təkan verən amildir.
Hərbi hissələrə səfərləri zamanı hərbçilər qarşısında şəxsi təkəbbürü və ambisiyaları xətrinə səsləndirdiyi bəsit, hərb işindən uzaq, qeyri-peşəkar fikirlər Ermənistan ordusunda hazırda xidmət edən Seyran Ohanyana sadiq "köhnə qvardiya"nın və Qarabağ müharibəsi iştirakçılarının ciddi, eyni zamanda, hələlik üstüörtülü etirazları ilə qarşılanır. Erməni politoloq və şərhçilərinin də fikrincə, belə davam edərsə, qısa müddətdə V.Sarkisyanın ən pis halda fiziki məhvi, ən yaxşı halda isə vəzifədən uzaqlaşdırılması prosesi qaçılmazdır". Aydındır ki, müdafiə naziri bu səviyyədə olan ordu Azərbaycan qarşısında heç cür tab gətirə bilməz. Məhz bu fonda aydındır ki, yeni hərbi toqquşmalar ermənilərin daha tez müddətdə darmadağın olması ilə nəticələnəcək.
Nahid SALAYEV