Əli Orucov: "Azərbaycanı çıxmaq şərtilə, hər 3 dövlətin ərazi bütövlüyü məsələsində sərgilənən mövqe daha konkretdir"
Rusiyaya qarşı tətbiq edilən sanksiyaların ləğvindən danışmaq hələ ki, tezdir. Bu barədə ABŞ Dövlət Departamentinin nümayəndəsi bildirib Məlumata görə, rəsmi Vaşinqton adıçəkilən məsələdə Avropa ölkələrinin ABŞ-la həmrəy olacağına ümid bəsləyir.
Bu arada Ağ Evin mətbuat katibi Şon Spayser bildirib ki, ABŞ prezidenti Donald Tramp Rusiyanın Ukraynanın şərqindəki vəziyyəti normallaşdıracağını və Krımı bu ölkəyə qaytaracağını gözləyir.
Qeyd edək ki, yanvarın 27-də ABŞ prezidenti D.Tramp Böyük Britaniyanın baş naziri Tereza Mey ilə keçirdiyi birgə mətbuat konfransında Rusiyaya qarşı sanksiyaların tezliklə ləğv olunmayacağını bildirib. Məlumat üçün bildirək ki, Rusiyaya sanksiyalar 2014-cü ildən tətbiq edilir. Rusiya ilə Qərb arasında münasibətlər 2014-cü ildə Ukrayna hadisələri ilə əlaqədar pisləşib. Əvvəlcə Avropa İttifaqı ölkələri, ABŞ və Kanada fiziki şəxslərə qarşı fərdi sanksiyaların tətbiqinə başlayıb. Sonra isə sektorlar üzrə məhdudlaşdırıcı tədbirlər iqtisadiyyatın bütün sahələrini tədricən əhatə etməyə başlayıb. Cavab tədbiri olaraq Rusiya ona qarşı sanksiya tətbiq edən ölkələrdən ərzaq idxalını qadağan edən qərar qəbul edib.
O da məlumdur ki, Ermənistan 20 ildən çoxdur Azərbaycanın 20 faiz ərazisini işğal altında saxlayır. Dağlıq Qarabağla bağlı BMT-nin 4 qətnaməsi var. Ancaq indiyə qədər nə beynəlxalq qurumlar, nə də dövlətlər səviyyəsində Ermənistana qarşı hansısa formada sanksiya tətbiq olunmur. Bircə Türkiyə Ermənistanın işğalçılıq siyasətinə etiraz olaraq bu dövlətlə sərhədləri bağlayıb. Ukrayna məsələsində olduğu kimi, Dağlıq Qarabağ məsələsində də ABŞ və digər Qərb dövlətləri Ermənistana qarşı sanksiya tətbiq edə bilərmi? Bunun üçün nə etmək lazımdır? Məsələyə münasibət bildirən AMİP Siyasi Şurasının üzvü Əli Orucovun fikrincə, bənzər sanksiyaların Ermənistana qarşı da tətbiq olunması çox yaxşı olardı: "Bu sanksiyaların çox az hissəsinin tətbiq olunması kifayətdir ki, Ermənistan sarsılsın və işğalçılıq fəaliyyətinə son qoysun. Ancaq təəssüflər olsun ki, Birləşmiş Ştatların postsovet məkanında etnik münaqişələrin həllinə yanaşması bütün ölkələrə münasibətdə heç də eyni deyil. Məsələ ondadır ki, Azərbaycanla yanaşı, Gürcüstan, Moldova və Ukrayna da separatizmdən əziyyət çəkir. Azərbaycanı çıxmaq şərtilə, hər 3 dövlətin ərazi bütövlüyü məsələsində sərgilənən mövqe daha konkretdir. Azərbaycana gəldikdə isə, işğalçı ilə işğala məruz qalan dövlətə eyni gözlə baxırlar. Ümumi sözlərlə kifayətlənirlər. Bildirirlər ki, torpaqları Ermənistan yox, Dağlıq Qarabağdakı etnik ermənilər işğal edib. Halbuki, özləri bizdən də yaxşı bilirlər ki, torpaqları məhz Ermənistan silahlı qüvvələri işğal edib. Onlara da dəstəyi Rusiya verib. Ukraynanın ərazi bütövlüyü məsələsində Rusiyaya qarşı sanksiya tətbiq edən ABŞ və Avropa İttifaqı bənzər addımları Ermənistana qarşı da ata bilər. Sadəcə, Azərbaycana münasibətdə sərgilənən ikili standartlar səbəbindən bunu etmirlər. Budur mövcud reallıq. Hesab edirəm ki, bu istiqamətdə Azərbaycan bütün mümkün vasitələrlə səylərini artırmalıdır".
Vidadi ORDAHALLI