Ramil Hüseynov: "Bütün dedikləri cəfəngiyyatdan başqa bir şey deyil"
Ermənistandan "müvəqqəti" sığınacaq alan "Tolişi Sədo" qəzetinin əməkdaşı Şahin Mirzəyev ətrafında gedən müzakirələr səngimək bilmir. Ş.Mirzəyev təkcə kənar şəxslər tərəfindən deyil, öz yaxınları, yerliləri tərəfindən də lənətlənir.
Onun işğalçı dövlətə sığınması azmış kimi, utanmadan Ermənistan mətbuatına həqiqətə uyğun olmayan məlumatlar verir. O bununla bağlı son açıqlamasında bildirib ki, guya son illər təxminən 300 min talış Azərbaycandan Rusiyaya, oradan isə başqa ölkələrə qaçıb. Halbuki, bu deyilənlərin heç bir əsası yoxdur.
Azərbaycanda 3 səmavi dinin (islam, xristianlıq, iudaizm) təmsilçiləri dinc və yanaşı yaşayırlar. Müsəlmanı məscidə, xristianı kilsəyə, yəhudisi sinaqoqa gedərək, bir-birinin dini bayramlarına hörmətlə yanaşır.
Biz son illər Avropa ölkələrində sığınacaq almaq üçün çoxlarının istifadə etdiyi metodları yaxşı bilirik: bir gün müxalifətin mitinqinə qatılmaq, hakimiyyət əleyhinə radikal şüarlar səsləndirmək, imkan varsa, həbs olunub adını "siyasi məhbus" siyahısına yazdırmaq, imkan yoxdursa, mitinqdə şəkil çəkdirmək və bununla da "hakimiyyətin təqib etdiyi əzabkeş müxalifətçi" obrazını tamamlamaq. Ş.Mirzəyev də güman ki, bu yolla getmək istəmişdi - Gürcüstana, oradan da Avropaya keçmək üçün "Azərbaycanda etnik və dini hüquqlarım pozulur" deyə bərkdən qışqırmaq, beynəlxalq təşkilatların diqqətini cəlb etmək və mühacirətə getmək. Bu ssenari istədiyi kimi alınmadığından, son addım kimi Ermənistana sığınmaq yolunu seçib.
Bütün hallarda, guya 300 min nəfər talışın Azərbaycanı tərk etdiyi barədə səsləndirdiyi fikirlərin əsası varmı? Sözügedən məsələ ilə bağlı fikirlərini "Bakı-Xəbər"lə bölüşən, əslən cənub bölgəsindən olan VİP-in sədr müavini Ramil Hüseynovun sözlərinə görə, onun səsləndirdiyi bütün fikirlərin heç bir əsası yoxdur: "Onun səsləndirdiyi fikirlərin hansının əsası var ki, bunun da olsun? O sadəcə dövlətə, millətə, xalqa dönük çıxan bir xəyanətkardır. Eləsinin səsləndirdiyi fikirlərə ümumiyyətlə münasibət bildirməyi məqsədəuyğun hesab etmirəm. Ona görə ki, bu hansısa formada onun tanıdılmasına xidmət edir. Onun heç vaxt talışların adından danışmaq haqqı yoxdur. Guya ölkəni 300 min nəfər talışın tərk etdiyi barədə səsləndirdiyi fikirlər də tamamilə absurddur. Heç ötən illər ərzində ümumən 300 min vətəndaş ölkəni tərk etməyib. Talışlar da, ölkənin digər vətəndaşları kimi, mövsümü olaraq Rusiyaya işləməyə gedir. Bu da elə kütləvi səviyyədə deyil. Talışlara qarşı hansısa diskriminasiyadan söhbət gedə bilməz. Bütün dedikləri cəfəngiyyatdan başqa bir şey deyil. Ş.Mirzəyev kimdir ki, talışların adından danışır?!".
Vidadi ORDAHALLI