Məhərrəm Zülfüqarlı: "Dünya ermənilərin törətdiyi vandalizm aktlarını pisləyəcək"
Xəbər verildiyi kimi, xarici ölkələrin Azərbaycanda akkreditə olunmuş diplomatik nümayəndələri və beynəlxalq təşkilatların təmsilçiləri Cəbrayıl rayonunun işğaldan azad edilmiş Cocuq Mərcanlı kəndinə səfər ediblər. 60-a yaxın nümayəndə Cocuq Mərcanlıda həyata keçirilən yenidənqurma və tikinti işləri ilə yaxından tanış olub.
Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov işğal altında qaldığı müddətdə ermənilərin Cocuq Mərcanlıda törətdikləri vəhşiliklər, eləcə də Azərbaycan Prezidentinin sərəncamı ilə hazırda burada görülən bərpa işləri barədə nümayəndə heyətinə ətraflı məlumat verib.
Məlumata görə, xarici ölkə diplomatları Cocuq Mərcanlı kəndində erməni vəhşiliklərinə çox təəccüblənib. Belə ki, səfirlər və beynəlxalq təşkilatların nümayəndələri erməni işğalı dövründə baş vermiş dağıntıları, söküntüləri, kəndin necə xarabalığa çevrilməsini öz gözləri ilə görüb. Onlara izah olunub ki, bu kənd cəmi 4 ay erməni işğalında olmaqla belə xarabalığa çevrilib.
Bu mənada xarici diplomatlar ermənilərin düz 30 ilə yaxın müddətdə işğal yerlərində törətdikləri vəhşilikləri tam təsəvvürə gətirmək üçün yaxşı material əldə etdilər. Hansı ki, ermənilər bunun yayılmasının qarşısını həmişə almağa çalışıblar. Deməli, diplomatların səfəri Ermənistanın işğal vandalizmini bütünlüklə ifşa edən tarixi əhəmiyyətə malikdir.
Sözügedən məsələni dəyərləndirən tarix elmləri üzrə fəlsəfə doktoru Məhərrəm Zülfüqarlının fikrincə, bu, erməni xislətinə xas olan bir xüsusiyyətdir: "Ermənilər harada məskunlaşıbsa, oranı "özününküləşdirməyə" çalışıb. Yaxud da mümkün olan qədər oradakı tarixi abidələri yer üzündən silməyə çalışıblar. Cocuq Mərcanlı bunun əyani nümunəsidir. Nəinki həmin kənddə, ümumiyyətlə işğal olunmuş yaşayış məntəqələrinin hamısında bənzər vəhşilikləri törədiblər. Hər vasitə ilə çalışıblar ki, Azərbaycana aid olan bütün tarixi izləri silsinlər. İşğal nəticəsində necə ki, yaşayış məntəqələri məhv edilib, tarixi abidələrin böyük hissəsinin izləri də yer üzündən silinib. Məhv etmədiklərini də öz adlarına çıxmağa çalışırlar. Məsələn, qədim alban abidələrini erməni abidəsi kimi təqdim edirlər və s. Hesab edirəm ki, ermənilərin bütün bu cəhdləri, gec-tez, iflasa uğrayacaq. Dünya ermənilərin törətdiyi vandalizm aktlarını pisləyəcək. Bütün bunların fonunda, diplomatların orada törədilən vəhşilikləri öz gözləri ilə görməsi müsbət haldır".
Namiq QULİYEV