"Ermənistan çalışır ki, KTMT-ni Azərbaycan istiqamətində təxribata qoşsun"
Azərbaycan Prezidenti İlham Əliyev fevralın 9-da Milli Qəhrəman Çingiz Qurbanovun ailə üzvləri ilə görüşündə ermənilərin daha bir məkrli niyyətini açıqlayıb.
Dövlət başçısı xatırladıb ki, Azərbaycan Ordusu, Azərbaycan dövləti işğal edilmiş torpaqların bir hissəsini işğalçılardan azad edib, indi o torpaqlarda bərpa işləri aparılır və vətəndaşlarımız o torpaqlara qayıdacaq: "Ermənistan çox çalışdı ki, aprel döyüşlərindən sonra bu məsələyə beynəlxalq don geyindirsin, çox çalışdı ki, Ermənistanın üzv olduğu Kollektiv Təhlükəsizlik Müqaviləsi Təşkilatı bu məsələ ilə bağlı mövqeyini bildirsin. Halbuki, bunun üçün heç bir hüquqi əsas yoxdur. Biz öz torpağımızdayıq, bizim Ermənistan torpağına iddiamız yoxdur, baxmayaraq ki, hamımız yaxşı bilirik ki, bugünkü Ermənistan tarixi Azərbaycan torpaqlarında yaradılmışdır. Ancaq biz öz torpağımızı heç kimə verən deyilik. Ona görə aprel döyüşləri və təmas xəttində yaşanan gərginlik və toqquşma bizim daxili işimizdir".
Prezident qeyd edib ki, Dağlıq Qarabağ Azərbaycanın ayrılmaz hissəsidir. Bütün dünya Dağlıq Qarabağı məhz belə tanıyır və münaqişə yalnız ölkəmizin ərazi bütövlüyü çərçivəsində öz həllini tapa bilər: "Apreldən sonra Ermənistan müxtəlif yollarla çalışırdı ki, bu məsələyə digər ölkələri cəlb etsin. Ancaq onların bütün səyləri boşa çıxdı, heç bir nəticə vermədi. Məhz Azərbaycan-Ermənistan sərhədində növbəti təxribatın törədilməsi bu məqsədi güdürdü ki, Ermənistan üzv olduğu təşkilatı bu işə cəlb etsin. Bu dəfə də alınmadı. Ona görə ki, Azərbaycan Çingizin simasında bir daha qəhrəmanlıq göstərdi. Ona görə ki, Ermənistan bir daha gördü ki, hətta bir əsgərimiz onların canlı qüvvəsinə bərpaolunmaz zərbə vura bilər və belə də oldu. Biz öz torpağımızı müdafiə edirik, bizim işimiz haqq işidir".
Göründüyü kimi, Prezident ermənilərin prosesə üzvləri olduğu KTMT-ni qoşmaq istəyindən danışıb. Ermənilər bununla nəyə nail olmaq istəyirmiş?
Politoloq Mübariz Əhmədoğlunun sözlərinə görə, ermənilər daim bu istiqamətdə çalışıb, ancaq səyləri heç bir nəticə verməyib: "Buna görə də onlar Kollektiv Təhlükəsizlik Müqaviləsi Təşkilatından daim narazılıq ifadə edirlər. Ermənilər təxribatları Azərbaycan-Ermənistan dövlət sərhədində törətdilər ki, KTMT prosesə qoşulsun. Əslində, onların təxribatları məhz KTMT-yə qarşı yönəlmiş bir addımdır. Ermənistan çalışır ki, KTMT-ni Azərbaycan istiqamətində təxribata qoşsun.
Ermənistan bəzi üsullarla çalışır ki, KTMT-ni şantaj edərək Azərbaycanla üz-üzə qoysun. Bəzi adamlarda belə bir təsəvvür var idi ki, aprel ayındakı kimi döyüşlər başlasa, Rusiya bizim üstümüzə gələ bilər. Bəlli oldu ki, nəinki Ağdamda, Tərtərdə, hətta Azərbaycan-Ermənistan dövlət sərhədində baş verən toqquşmalara Rusiya qoşulmur. Bununla da ermənilər bildi ki, KTMT-yə bu məsələdə arxayın olub təxribatlar törətməyin xeyri yoxdur".
Məhəmmədəli QƏRİBLİ