Ələsgər Əhmədoğlu: "Bu legitim mənafelərdən biri də "ərazi bütövlüyü" anlayışıdır"
Bu günlərdə Belarusda saxlanaraq Azərbaycana ekstradisiya edilən blogger Aleksandr Lapşinin müdafiəsinə daha çox qalxan zümrələrdən biri də Ermənistan KİV-idir. Blogger Lapşinin Azərbaycana təhvil verilməsi müxtəlif yanaşmalarla gündəmə gəlir.
Ermənistan KİV-i bəzi qondarma ekspertlərinə əsaslanaraq, Lapşinin həbsini söz azadlığına müdaxilə kimi dəyərləndirir. Lapşinin etdiyi qanunsuzluqların fonunda, ifadə azadlığı faktorunun qabardılması nə dərəcədə doğru sayıla bilər?
Media eksperti Ələsgər Əhmədoğlu hesab edir ki, bu məsələnin ifadə azadlığı çərçivəsində qiymətləndirilməsi doğru deyil: "Lapşin Azərbaycanın BMT tərəfindən tanınan sərhədlərini qanunsuz pozmaqla və ərazi bütövlüyünü şübhə altına alan açıqlamalarla gündəmə gəlib. Yerli və beynəlxalq qanunvericiliyə əsasən, məsləyindən asılı olmayaraq, hər kəs bu pozuntuya görə məsuliyyət daşıya bilər. İfadə azadlığı mütləq azadlıq deyil və müəyyən legitim mənafelər baxımından məhdudlaşdırıla bilər. Bu legitim mənafelərdən biri də "ərazi bütövlüyü" anlayışıdır. Avropa İnsan Hüquqları Konvensiyasının 10-cu maddəsinin 1-ci hissəsi ifadə azadlığını qoruyur, 2-ci hissəsi isə ifadə azadlığının konkret hansı hallarda qanunla legitim mənafelər üçün məhdudlaşdırıla biləcəyini göstərir. Bu mənafelərdən biri də "Milli təhlükəsizlik, ərazi bütövlüyü və ya ictimai asayiş" çərçivəsidir.
Lapşinin Azərbaycana verilməsini hüquqi baxımdan mübahisəli məsələ kimi görmürəm. Çünki o, bir neçə dəfə Azərbaycanın rəsmi ərazisinə Azərbaycan tərəfinə xəbər vermədən və razılıq almadan daxil olub, Azərbaycanın ərazi bütövlüyünü davranış və deyimləri ilə şübhə altına alıb, bir sözlə, qanunvericiliyə görə suç işləyib. Suç işləyən bunu bilərəkdən, qəsdən etdiyinə görə məsuliyyətini dərk etməli və daşımalıdır.
Yəqin ki, bu qərarın qəbul olunmasında siyasi münasibətlərin də rolu olub. Amma bu rol qanunun işləməsi lehinə olan roldur.
Bu proses Azərbaycanın ərazilərində qondarma "dövlət" qurduğunu düşünən tərəfə də, bu saxta rejimlə əməkdaşlıq edən tərəflərə də, fərdlərə də bir xəbərdarlıqdır".
Məhəmmədəli QƏRİBLİ