Günel Fərhadqızı: "Azərbaycan qazı, Yunanıstana olmasa da, İtaliyaya mütləq nəql olunacaq"
Energetika naziri Natiq Əliyevin ABŞ Dövlət Departamentinin Enerji Ehtiyatları Bürosunun Enerji Diplomatiyası ofisinin direktoru Uilyam Silkvortla görüşü zamanı bir sıra mövzular ətrafında müzakirələr aparılıb.
Görüşdə DESFA-nın özəlləşdirilməsi layihəsinə xitam verilməsi və İtaliyadakı referendumun Azərbaycan yataqlarından çıxarılan təbii qazı İtaliyaya nəql edəcək "Trans-Adriatik" (TAP) qaz kəməri layihəsinin icrasına mümkün təsirləri ilə bağlı müzakirələr aparılıb. ABŞ nümayəndə heyəti OPEC-in növbəti görüşü ərəfəsində Azərbaycanın mövqeyi ilə maraqlanıb.
N.Əliyev Azərbaycanın dünya neft bazarında qiymətin sabitləşdirilməsi prosesinə qoşularaq, neft bazarının tənzimlənməsi və neftin qiymətinin qalxması üçün neft hasilatını və ixracını artırmayacağı ilə bağlı mövqeyini xatırladıb. Nazir deyib: "Rəsmi Bakı digər neft ölkələrini də oxşar addımlar atmağa çağırmaqla yanaşı, OPEC tərəfindən aparılan məsləhətləşmələrə dəstəyini ifadə edib".
N.Əliyev Azərbaycanın Neft İxrac Edən Ölkələr Təşkilatına (OPEC) üzv olan və kartelə daxil olmayan neft hasil edən ölkələrin dekabrın 10-da Vyanada keçiriləcək növbəti görüşünü mühüm hesab edərək iştiraka qərar verdiyini deyib: "Bu görüş OPEC üzvü olmayan ölkələrdə vəziyyətin öyrənilməsi baxımından əhəmiyyətli olacaq. Hesab edirəm ki, davamlı sabitlik və neftin qiymət artımının uzunmüddətli olması üçün nəinki OPEC və qeyri-OPEC ölkələri, həm kartel daxilində, həm də təşkilata üzv olmayan dövlətlər arasında ümumi anlaşma və həmrəylik olmalıdır. Bütün tərəflərin maraqları uzlaşacağı təqdirdə neftin qiymətinin tənzimlənməsi istiqamətində prosesi irəli aparmaq və razılaşmanın uzunmüddətliyini təmin etməklə hər kəs üçün sərfəli qiymətin müəyyənləşməsinə nail olmaq mümkündür".
DESFA-nın özəlləşdirilməsi layihəsinə xitam verilməsi və İtaliyadakı referendum Azərbaycan yataqlarından çıxarılan təbii qazı İtaliyaya nəql edəcək "Trans-Adriatik" (TAP) qaz kəməri layihəsinin icrasına hansı formada təsir edə bilər?
Ekspert Günel Fərhadqızı qəzetimizə bildirdi ki, SOCAR-ın DESFA-dan imtina etməsi Yunanıstanın vədinə xilaf çıxması səbəbindən baş verdi: "Hesab edirəm ki, Azərbaycanın bu məsələdə itirəcək nəisə olmadı. Biz onsuz da qazı harasa ixrac etməliyik və bunun arzusunda olanlar az deyil. İtaliyada keçirilən referendum isə ölkədaxili proseslərə daha çox təsir edəcək. Avropa İttifaqı ilə münasibətlərə isə, demək olar ki, təsir göstərməyəcək. Referendum İtaliyada bu günə qədər olan siyasi mexanizmi olduğu kimi saxlayıb. Yəni heç bir dəyişiklik baş verməyib. Əslində, referendum geniş islahatlara yol aça bilərdi. Lakin İtaliya xalqı referendumda yox deməklə, islahatları da rədd etdi.
Bu həm iqtisadi, həm də siyasi çətinliklər fonunda özünü göstərir. Mövcud vəziyyət bu prosesin hələ uzun müddət davam edəcəyini deməyə əsas verir. Bu gün Yunanıstanın fonunda Avropa İttifaqı dövlətlərinin bir-birinə yardım göstərdiyini və böhranlı vəziyyətdən çıxarmağa çalışdığını görürük. Böyük Britaniyadan fərqli olaraq, digər ölkələr elə də qüdrətli dövlətlər deyil. Bu dövlətlər ittifaq ətrafında birləşməyə meyllidir. Bu baxımdan da Azərbaycan qazı, Yunanıstana olmasa da, İtaliyaya mütləq nəql olunacaq. Çünki onların buna ehtiyacı var".
Məhəmmədəli QƏRİBLİ