Ənvər Fərəcov: "Bu məsələdə hər şey istəklə ölçülmür"
Məlum olduğu kimi, Türkiyə prezidenti Rəcəb Tayyib Ərdoğan Rusiya prezidenti Vladimir Putinə ticarət dövriyyəsində yerli valyutadan istifadə etməyi təklif edib: "Təklif etdim ki, Rusiyadan məhsulları rublla alaq, Rusiya isə Türkiyədən aldığı məhsullara görə lirə ilə ödəniş etsin.
Təklifi Çin rəhbərliyinə də etmişəm. Tərəflər bu təklifi müsbət qarşılayıb. Biz Rusiya, Çin və İranla alış-verişimizi yerli pulla həyata keçirmək üçün addımlar atdıq. Rusiya ilə ticarətimizi yerli pulla həyata keçirmək üçün addımlar atacağıq. Onlardan nəsə alsaq, onların pulu ilə, onlar bizdən alanda bizim pulla alacaq. Mərkəzi Banka təlimat verdik. Bu oyunlar tutmayacaq. Biz də öz oyunumuzu oynayacağıq".
Türkiyə rəhbəri qlobal böhranın ölkəyə az təsir etdiyini vurğulayıb: "2008-ci ildəki böhrandan necə çıxmışıqsa, indiki böhrandan da o cür keçəcəyik".
Ümumilikdə, Ərdoğanın çağırışına münasibət birmənalı deyil. Bəzilərinin fikrincə, bu müəyyən effekt verəcək və Türkiyə ilə yanaşı, digər ölkələrin də iqtisadiyyatını dollar asılılığından xilas edəcək. Ancaq fərqli düşünənlər də var. Maraqlıdır, bəs ekspertlər məsələyə necə yanaşır, Ərdoğanın bu təklifinin perspektivini necə dəyərləndirir? Məsələyə münasibət bildirən ekspert Ənvər Fərəcovun sözlərinə görə, dollardan imtina ölkə daxilində dollara olan tələbatın səviyyəsini aşağı salmayacaq: "Nəzərə almaq lazımdır ki, həm Rusiyanın, həm Türkiyənin dollara ehtiyacı var, milli valyutalarının məzənnəsi aşağı düşüb. Nəinki əhalinin və biznes dairələrinin, dövlətlərin belə dollara ehtiyacı var. Ona görə də Türkiyə və Rusiyada dollarlaşma səviyyəsinin aşağı düşəcəyi real deyil. Bu məsələdə hər şey istəklə ölçülmür. Ona görə ki, gərək bunun arxasında güclü iqtisadiyyat dayansın. Bu tipli təşəbbüslər İran və Çin arasında da olub. Rusiya təşəbbüs göstərib, indi də Türkiyə qoşulmaq istəyir. Bütün hallarda, bunun heç bir perspektivini görmürəm. Ona görə ki, bu ölkələrin dünya ticarətində payı elə də böyük deyil. Əsasən Çin dünyada ən böyük 2-ci iqtisadiyyata malikdir. Amma ticarət dövriyyəsində bu ölkələrin, o cümlədən Türkiyənin böyük bir payı yoxdur. Ona görə də onların təşəbbüsünün dollara hansısa bir təsir edəcəyi inandırıcı görünmür".
Vidadi ORDAHALLI
