Məhərrəm Zülfüqarlı: "Güclü olmasaydı, belə tez mövqe ortaya qoymazdılar"
Məlum olduğu kimi, sentyabrın 26-da keçirilən referendumu izləmək üçün nüfuzlu beynəlxalq təşkilatları təmsil edən müşahidəçilər qrupu ölkəmizdə olub. Seçki prosesini izləyən müşahidəçilər referendum günü müxtəlif məntəqələrdə olub, prosesə qiymət verib.
Məsələn, prosesi izləyən Avropa İttifaqı Regional Komitə üzvlərindən ibarət müşahidə qrupu referendumun yekunlarına dair gəldiyi nəticəni keçirdiyi mətbuat konfransında elan edib. Komitənin 4 üzvündən ibarət müşahidə qrupunun üzvləri bildirib ki, səfəröncəsi referenduma çıxarılan konstitusion dəyişikliklərin məzmununu və legitimliyini araşdırıb, ümumxalq səsverməsi günü isə 10 dairənin 2 məntəqəsində prosesi izləyib. Müşahidə qrupu araşdırmalar və müşahidələr əsasında belə bir nəticəyə gəlib ki, referendumun keçirilməsi suveren Azərbaycan dövlətinin səlahiyyətinə aiddir və bu barədə qərar milli qanunvericiliyə uyğun qəbul edilib. Eləcə də referenduma çıxarılan dəyişikliklər əsasən ölkədə idarəetmə sisteminin gücləndirilməsinə və insan hüquqlarının müdafiəsinin təkmilləşdirilməsinə xidmət edir.
Beləliklə, qrup belə bir nəticəyə gəlib ki, Konstitusiyaya dəyişikliklərə dair 26 sentyabr 2016-cı il tarixli referendum legitimdir və onun nəticələri Azərbaycan xalqının iradəsinin müstəqil və azad şəkildə ifadəsini əks etdirir.
Bu arada ABŞ Dövlət Departamentinin rəsmi nümayəndəsi Mark Toner referenduma münasibət bildirib. Onun sözlərinə görə, ABŞ Azərbaycanda keçirilən referendumun nəticələrini tanıyır və dövlət başçısının səlahiyyət müddəti ilə bağlı məsələyə müdaxilə etmək fikrində deyil. Bənzər açıqlamanı AŞPA və digər tanınmış beynəlxalq təşkilatlar da verib.
O baxımdan referendumun nəticələrinin əsas beynəlxalq təşkilatlar, müşahidəçilər tərəfindən tanınması beynəlxalq münasibətlərdə Azərbaycanın mövqeyinə və nüfuzuna necə təsir edəcək?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu, Azərbaycanın mövqelərinin daha da möhkəmlənməsinə xidmət edəcək: "Əvvəla bu, Azərbaycanın mövqeyinin indi güclü olmasıdır ki, hətta ABŞ Dövlət Departamenti də referendumun nəticələrini tanıdığını bəyan edib. Güclü olmasaydı, belə tez mövqe ortaya qoymazdılar. Belə ki, sözügedən qurum referendumun baş tutduğunu bildirib. Bunun özü böyük uğurdur ki, Birləşmiş Ştatlar kimi superdövlət seçkiləri tanıdığını bildirir. Ona görə də bundan sonra Azərbaycanın mövqelərinin daha da möhkəmlənəcəyi gözlənir. Çünki müşahidələr göstərir ki, aparıcı beynəlxalq təşkilatların referendumla bağlı fikirləri müsbətdir. Eyni zamanda, bu fikirlər üst-üstə düşür. Hesab edirəm ki, bundan sonra Azərbaycanın sözü beynəlxalq müstəvidə daha keçərli olacaq. Bir sıra dövlətlər, beynəlxalq təşkilatlar Azərbaycanla hesablaşacaq".
Vidadi ORDAHALLI